King Taudia Iharuana 24:1-20
24 Iehoiakimi ena nega ai Babulonia ena king Nebukanesa+ be ia ia tuari henia, bona Iehoiakimi be ena hesiai tauna ai ia lao. To, lagani toi murinai Iehoiakimi ese ia dadaraia bona ia gwau-edeede.
2 Bena Iehova ese Iehoiakimi ia hahisia totona Kaledea,+ Suria, Moaba, bona Amono edia dadidadi tuari oreadia ia siaia matamaia. Ia ese idia ia siaia noho Iuda ibounai ia hadikaia ore totona, unai be Iehova ese ena hesiai taudia, peroveta taudia unai, amo ia gwauraia hereva hegeregerena.+
3 Momokani unai be Iehova ena oda hegeregerena Iuda dekenai unai ia vara, unai amo ena vairana amo idia do ia kokia+ badina Manase be kara dikadia momo ia karaia,+
4 bona kerere lasi taudia danu ia hamasea kava,+ badina edia rara amo Ierusalema ia hahonua bona Iehova ia ura lasi Iuda ena kara dika ia gwauatao.+
5 Iehoiakimi ena sivarai ibounai, ia karaia gaudia, be Iuda ena king taudia edia buka lalonai idia torea, ani?+
6 Bena Iehoiakimi ia mase.*+ Bona ena natuna Iehoiakini be king ai ia lao.
7 Aigupito ena king be ena tano ia rakatania lou lasi, badina Babulonia ena king ese ena tano ibounai ia abia,+ Aigupito Koura+ amo ia lao Euperate Sinavai dekenai.+
8 Iehoiakini+ ena mauri lagani be 18 neganai, king ai ia lao, bona hua toi lalonai Ierusalema ai ia lohia.+ Iena sinana ena ladana be Nehusuta, Ierusalema tauna Elanatana ena natuna kekeni.
9 Iehoiakini be Iehova vairanai ia kara dika noho, ena tamana ia karaia bamona.
10 Unai nega ai Babulonia ena king Nebukanesa ena hesiai taudia idia daekau lao Ierusalema idia tuari henia totona, bona unai siti idia koua hagegea.+
11 Babulonia ena king Nebukanesa ena hesiai taudia be unai siti idia koua hagegea lalonai, ia be unai siti dekenai ia lao.
12 Iuda ena king Iehoiakini, bona ena sinana, ena hesiai taudia, lada bada ofesa taudia,* bona ofesa taudia+ be Babulonia ena king+ dekenai sibona idia henia. Bona Babulonia ena king ena lohia lagani namba 8 ai ia ese Iehoiakini ia abia lao.+
13 Bena ia ese Iehova ena ruma bona king ena ruma ai idia noho dava bada kohudia ibounai ia abia.+ Israela ena king Solomona ese Iehova ena dubu ai ia karaia golo gaudia ibounai be Babulonia ena king ese ia hamakohia maragimaragi.+ Unai be Iehova ena hereva hegeregerena ia vara.
14 Ia ese Ierusalema ai idia noho taudia ibounai, lada bada ofesa taudia* ibounai,+ tuari tatau goadadia ibounai, bona imana gaukaradia idia karaia taudia bona auri gaukara idia karaia taudia ibounai,+ idia ibounai be 10,000 bamona, ia abia lao. To tano ena ogogami taudia sibona ia rakatania.+
15 Vadaeni Nebukanesa ese Iehoiakini+ be Babulonia dekenai ia abia lao.+ Ia ese king ena sinana, king ena adavadia, ena ofesa taudia, bona tano ena ladana bada taudia ia abia lao danu. Idia be Ierusalema amo Babulonia dekenai ia abia lao.
16 Danu Babulonia ena king ese tuari taudia goadadia ibounai 7,000, bona gaukara idauidau idia diba taudia bona auri gaukara idia karaia taudia 1,000 be Babulonia dekenai ia abia lao, idia ibounai be tatau goadadia bona tuari totona idia hegeregere.
17 Babulonia ena king ese Iehoiakini ena gabu ai ena vavana Matanaia be king ai ia halaoa,+ bona ena ladana ia haidaua bona ia gwauraia Sedekaia.+
18 Sedekaia ena mauri lagani be 21 neganai, ia be king ai ia lao, bona lagani 11 lalonai Ierusalema ai ia lohia. Iena sinana ena ladana be Hamutala,+ Libina tauna Ieremia ena natuna kekeni.
19 Sedekaia be Iehova vairanai ia kara dika noho, Iehoiakimi ia karaia karadia ibounai hegeregerena.+
20 Ierusalema bona Iuda dekenai unai gaudia idia vara noho ese Iehova ia habadua, unai dainai ia ese idia ibounai be ena vairana amo ia kokia.+ Bona Sedekaia be Babulonia ena king dekenai ia gwau-edeede.+
Futnout
^ Heb., “ena sene taudia ida ia hekure.”
^ Eiava “king ena natudia memero.”
^ Eiava “king ena natudia memero.”
