King Taudia Iharuana 3:1-27
3 Ahaba ena natuna Iehorama+ be Samaria ai Israela ena king ai ia lao, unai be Iuda ena king Iehosapata ena lohia lagani namba 18 ai, bona ia be lagani 12 ia lohia.
2 Bona ia be Iehova ena vairanai kara dika ia karaia noho, to ena tamana eiava sinana ese idia karaia kara dika ia hanaia lasi, badina ia ese Bala tomadiho henia totona ena tamana ese ia haginia nadi du helagana ia kokia.+
3 To, ia ese Nebata ena natuna Ieroboama, Israela taudia ia hakaua idia kara dika tauna unai, ena kara dikadia hegeregerena ia kara.+ Ia be unai kara dikadia amo ia raka-siri lasi.
4 Moaba ena king Mesa be mamoe naria tauna, bona ia ese mamoe natudia 100,000 bona edia huina idia utua lasi mamoe tatau 100,000 be Israela ena king dekenai davana bamona ia henia, unai be ena harihari gauna.
5 Ahaba ia mase neganai,+ Moaba ena king ese Israela ena king ia tuari henia.+
6 Vadaeni unai nega ai king Iehorama be Samaria amo ia lao bona Israela taudia ibounai be tuari totona ia haboua.
7 Danu ia ese Iuda ena king Iehosapata dekenai hereva ia siaia, ia gwau: “Moaba ena king ese lau ia tuari henia gwauraia. Do ita lao bona Moaba ita tuari henia, a?” Bena Iehosapata ia gwau: “Oi ida do lau lao.+ Oibe, lau bona egu taunimanima bona egu hosi be oi danu do ita lao.”+
8 Bena ia henanadai: “Edena dala amo do ita daekau lao?” Vadaeni ia haere: “Edoma ena tano kaukau amo do ita lao.”
9 Bena Israela ena king be Iuda ena king bona Edoma ena king ida idia laolao.+ Bona dina 7 murinai, idia ida idia lao tuari taudia bona animal idauidau totona ranu ia noho lasi.
10 Israela ena king ia gwau: “Ita be dika do ita davaria! Iehova ese inai king toi ia haboudia, Moaba ena king ena imana dekenai ia atodia totona!”
11 Unai nega ai Iehosapata ia gwau: “Iniseniai Iehova ena peroveta tauna ta ia noho, a? Ia amo Iehova ena lalohadai ita tahua diba, ani?”+ Bena Israela ena king ena hesiai tauna ta ia haere, ia gwau: “Sapata ena natuna Elisaia ia noho,+ ia be Elia ena imana dekenai ranu ia bubua tauna.”+
12 Bena Iehosapata ia gwau: “Ia ese ita dekenai Iehova ena ura do ia gwauraia.” Vadaeni Israela ena king bona Iehosapata bona Edoma ena king be ia dekenai idia diho lao.
13 Elisaia be Israela ena king dekenai ia gwau: “Dahaka dainai lau dekenai oi mai?*+ Emu tamana ena peroveta taudia bona emu sinana ena peroveta taudia dekenai oi lao.”+ To Israela ena king be ia dekenai ia gwau: “Unai bamona oi hereva lasi, badina Iehova ese inai king toi ia haboudia, Moaba ena king ena imana dekenai ia atodia totona.”
14 Unai nega ai Elisaia ia gwau: “Tuari oreadia edia Iehova,* lau hesiai henia mauri Diravana ena ladanai lau gwauhamata, bema lau ese Iuda ena king Iehosapata+ lau laloa bada lasi, oi do lau kamonai henia lasi.+
15 Hap* gadaralaia tauna ta umui mailaia.”+ Unai tauna be hap ia gadaralaia neganai, Iehova ena siahu be Elisaia ena latanai ia diho.+
16 Bena ia gwau, “Iehova be inai bamona ia hereva: ‘Inai koura ai guri momo umui geia,
17 badina Iehova be inai bamona ia gwau: “Lai do ia toa lasi bona medu do ia diho lasi, to inai koura be ranu amo do ia honu,+ bona umui bona emui animal idauidau be inai ranu do umui inua.”’
18 To unai be auka lasi Iehova ena vairanai,+ badina ia ese Moaba taudia danu be emui imana ai do ia atoa.+
19 Magu aukadia ai idia noho siti+ bona siti namodia ibounai umui hadikaia, au namodia ibounai danu umui utudia, sinavai idia aru daladia umui koua, bona tano namodia ibounai dekenai nadi umui negedia, unai amo tano be anina do ia havaraia lasi.”+
20 Bona daba ai, daba ena aniani boubou henia negana ai,+ maoromaoro ranu be Edoma ena kahana amo ia mai noho, bona koura be ranu amo ia honu.
21 Moaba taudia ibounai idia kamonai king taudia be idia tuari henidia totona idia mai, unai dainai tuari idia diba taudia ibounai idia boiria bona Moaba ena tano ena hetoana dekenai idia haboua.
22 Daba momokani idia noga neganai, dina ena diari be ranu latanai ia hedinarai noho, bona Moaba taudia be sinavai ena kahana ta dekenai idia noho, bona ranu ena kala be kakakaka rara bamona.
23 Bena Moaba taudia idia gwau: “Inai be rara! Momokani king taudia be kaia amo ta ta idia hamasea vadaeni. Unai dainai Moaba taudia e, ita lao bona edia kohu ibounai do ita abia!”+
24 Moaba taudia be Israela taudia edia kamepa dekenai idia vareai neganai, Israela taudia idia toreisi bona idia tuari henidia matamaia, bona unai Moaba taudia idia heau.+ Israela taudia ese idia hamasea noho ela bona Moaba hanua dekenai idia ginidae.
25 Siti idia hadikadia, bona tatau ta ta be nadi idia abia bona tano namodia ibounai dekenai idia negedia, bona nadi amo idia hahonua. Idia ese ranu lohilohi gabudia ibounai idia koua,+ bona au namodia ibounai idia utua.+ Bona dokonai, Kiri-haresete hanua ena magu sibona ia gini noho,+ to unai hanua idia hagegea tuari taudia be nadi idia negea bona idia hadikaia.
26 Moaba ena king ia itaia tuari ai ia lusi neganai, tuari kaia idia gaukaralaia tatau 700 ia abia bona idia ura Edoma ena king dekenai idia lao idia tuari henia totona,+ to idia hegeregere lasi.
27 Unai dainai Moaba ena king ese ena vara guna natuna, ena gabu do ia abia natuna unai, ia abia bona gabua boubou bamona haba latanai ia bouboulaia.+ Bona Moaba taudia be Israela taudia dekenai idia badu, unai dainai tuari taudia be unuseni amo edia tano dekenai idia giroa lao.
Futnout
^ Eiava “oi totona dahaka do lau karaia?”
^ Miusiki gauna ta mai ena varo, gita bamona, to ena toana be idau.
