King Taudia Iharuana 5:1-27
5 Namana be Suria ena king ena tuari biaguna, bona ia be ladana bada tauna bona king dekenai ia be mai anina bada tauna, badina ia amo Iehova ese Suria taudia ia durua tuari ai idia kwalimu totona. Ena be mai ena lepera gorerena, to ia be tuari tauna goadana.
2 Dina ta, Suria taudia be Israela ena tano ta ai idia tuari neganai, kekeni maragina ta idia abia mauri. Bona ia be Namana ena adavana ena hesiai kekenina ai ia lao.
3 Unai kekeni be ena biaguna dekenai ia gwau: “Bema egu lohia be Samaria dekenai peroveta tauna+ ta ia vadivadi henia, ia ese ena lepera gorerena do ia hanamoa!”+
4 Vadaeni Namana be ia lao bona ena lohia dekenai Israela kekenina ese ia gwauraia gauna ia hadibaia.
5 Bena Suria ena king ia gwau: “Oi lao! Bona lau ese Israela ena king dekenai revareva ta do lau siaia.” Vadaeni ia lao, bona 10 siliva talent,* golo ena metau sekele 6,000, bona dabua matamata 10 ia abia lao danu.
6 Ia ese Israela ena king dekenai revareva ia abia lao, bona unai revareva ia gwau: “Inai revareva be egu hesiai tauna Namana ida lau siaia, unai amo oi ese iena lepera gorerena do oi hanamoa.”
7 Israela ena king ese revareva ia duahia neganai, ena dabua ia darea bona ia gwau: “Lau be Dirava, a? Ta do lau hamasea bona hamauria diba, a?+ Dahaka dainai inai tauna be lau dekenai ia siaia, lau ia hamaoroa iena lepera gorerena lau hanamoa totona? Umui itaia ia ura lau ida ia hepapahuahu.”
8 To Dirava momokanina ena hesiai tauna, Elisaia, ese Israela ena king be ena dabua ia darea ena sivarai ia kamonai neganai, maoromaoro king dekenai hereva ia siaia, ia gwau: “Dahaka dainai emu dabua oi darea? Mani lau dekenai ia oi siaia mai, unai amo do ia diba Israela ai peroveta tauna ta ia noho.”+
9 Vadaeni Namana be mai ena hosi bona tuari kariota momo ida ia mai bona Elisaia ena ruma ena raka vareai gabuna ai ia gini.
10 To, Elisaia ese hesiai tauna ta ia siaia bona Namana dekenai ia gwau: “Oi lao bona Ioridane dekenai+ nega 7 oi digu,+ bona emu tauanina do ia namo lou, bona do oi goeva.”
11 Vadaeni Namana ia badu dikadika bona ia lao gwauraia neganai, ia gwau: “Lau laloa, ‘Ia be do ia raka-lasi bona iniseniai do ia gini bona ena Dirava, Iehova, ena ladana dekenai do ia boiboi, bona lepera gorere ia noho gabudia ai ena imana ia davea lao bona davea mai, unai amo gorere do ia namo.’
12 Damaseko ai, Abana bona Parapara sinavaidia+ ese Israela sinavaidia ibounai idia hereaia lasi, a? Unai sinavaidia dekenai lau digu diba bona do lau goeva, a?” Bena Namana ia giroa bona mai badu ida ia raka-oho.
13 Namana ena hesiai taudia be ia dekenai idia lao bona idia gwau: “Egu lohia* e, bema peroveta tauna ese oi ia hamaoroa gaukara aukana ta oi karaia, do oi karaia, a? Vadaeni ia ese oi ia hamaoroa, ‘Oi digu bona do oi goeva.’ Unai be auka lasi, ani?”
14 Unai nega ai ia diho lao bona Ioridane Sinavai dekenai nega 7 ia digu, Dirava momokanina ena hesiai tauna ena hereva hegeregerena.+ Bena ena kopina be mero matamata ta ena kopina bamona ai ia lao,+ bona ia goeva.+
15 Unai murinai ia bona ena tuari taudia be Dirava momokanina ena hesiai tauna dekenai idia giroa lou.+ Bona iena vairanai ia gini bona ia gwau: “Hari lau diba gabu ibounai dekenai Dirava ma ta be lasi, to Israela dekenai sibona.+ Vadaeni hari mani emu hesiai tauna ena harihari gauna oi abia dae.”
16 To, Elisaia ia gwau: “Ia mauri noho Diravana, Iehova, ena ladanai lau gwauhamata, lau ese harihari gauna do lau abia dae lasi.”+ Namana ese ia noia loulou harihari gauna ia abia dae totona, to ia ura lasi.
17 Dokonai Namana ia gwau: “Bema lasi, inai tano ena miri, doniki rua ese idia huaia diba gauna, be lau, emu hesiai tauna dekenai umui henia, badina lau ese gabua boubou eiava boubou ma ta be dirava ma haida dekenai do lau henia lasi, to Iehova sibona dekenai do lau henia.
18 To Iehova ese emu hesiai tauna ena dika ia gwauatao, inai gau tamona dainai: Egu king be Rimono dubu dekenai ia vareai, bona unuseni ia tui diho neganai, egu imana ia dogoatao dainai lau danu lau tui diho. Mani Iehova ese unai kara dainai egu dika ia gwauatao.”
19 Unai nega ai Elisaia be ia dekenai ia gwau: “Mai maino ida oi lao.” Namana be Elisaia ia rakatania bona ia lao sisina daudau murinai,
20 Dirava momokanina ena hesiai tauna Elisaia ena hesiai tauna+ Gehasi+ be sibona dekenai ia gwau: ‘Egu biaguna be Suria tauna Namana+ ese ia mailaia gauna ta ia abia dae lasi. Ia mauri noho Diravana, Iehova, ena ladanai lau gwauhamata, lau be iena murinai do lau lao haraga bona ia amo gau ta do lau abia.’
21 Vadaeni Gehasi be Namana ena murina amo ia lao. Namana ia itaia ta be iena murinai ia heau mai neganai, iena kariota amo ia diho, ia hedavari henia totona, bona ia gwau: “Gau ibounai idia namo, a?”
22 Bena Gehasi ia gwau: “Gau ibounai be namo. To egu biaguna ese lau ia siaia, ia gwau, ‘Eparaima ena ororo gabudia amo peroveta taudia edia bese taudia amo memero rua idia mai. Mani idia dekenai siliva talent ta* bona dabua matamata rua oi henia.’”+
23 Namana ia gwau: “Talent rua* oi abia.” Namana ese ia noia loulou dainai,+ Gehasi ese siliva talent rua be baege rua lalonai ia kumidia, bona dabua matamatadia rua danu. Bena ena hesiai taudia rua dekenai ia henidia, bona idia huaia lao.
24 Gehasi be Opele dekenai ia ginidae neganai, ia ese unai baege rua be ena hesiai taudia amo ia abidia bona ena ruma lalonai ia atodia bona unai tatau ia siaidia. Idia lao murinai,
25 ia vareai bona ena biaguna ena badinai ia gini. Bena Elisaia ese ia nanadaia: “Gehasi e, oi be edeseni amo oi mai?” To ia gwau: “Emu hesiai tauna be gabu ta ia lao lasi.”+
26 Elisaia be ia dekenai ia gwau: “Oi laloa oi ese unai tau ena murina amo oi lao bona ia be ena kariota amo ia diho oi ia hedavari henia karana lau diba lasi, a? Hari be siliva, dabua, olive audia, vain umadia, mamoe, boromakau, eiava hesiai tatau o hahine oi abia dae negana, a?+
27 Vadaeni Namana ena lepera gorere+ be oi bona emu bese taudia dekenai do ia noho daudau.” Maoromaoro Gehasi be lepera gorerena ia abia, bona Elisaia ena vairana amo ia raka-lasi, ena kopina be kurokuro, sinou bamona.+
Futnout
^ Heb., “Egu tamana.”
