King Taudia Iharuana 6:1-33
6 Peroveta taudia edia bese taudia+ be Elisaia dekenai idia gwau: “Itaia! Ita noho gabuna be bada momokani lasi.
2 Mani Ioridane dekenai ai lao. Unuseni ai ta ta be au ta ta do ai abia bona gabu ta do ai hegaegaelaia bona do ai noho.” Ia gwau: “Umui lao.”
3 Idia ta ia gwau: “Oi danu be ai* ida do oi mai, a?” Vadaeni Elisaia ia gwau: “Do lau mai.”
4 Unai dainai ia be idia ida ia lao, bona Ioridane dekenai idia ginidae bona au idia utudia matamaia.
5 Idia ta be au ia utua noho lalonai, ira ena kwarana be ranu lalonai ia moru. Vadaeni ia boiboi: “Egu lohia e, inai ira be ta amo lau abia!”
6 Dirava momokanina ena hesiai tauna ia gwau: “Edeseni ia moru?” Vadaeni ia moru gabuna ia hahedinaraia. Bena Dirava momokanina ena hesiai tauna be au ta ia utua bona unuseni ia negea lao neganai ira ena kwarana ia hure.
7 Dirava momokanina ena hesiai tauna ia gwau: “Oi abia isi.” Vadaeni ena imana amo ira ena kwarana ia abia.
8 Suria ena king be Israela tuari henia totona ia lao.+ Bona ena hesiai taudia ida ia herevahereva bona do idia kamepa gabuna ia hadibadia.
9 Dirava momokanina ena hesiai tauna+ be Israela ena king dekenai hereva ia siaia, ia gwau: “Inai gabu oi hanaia neganai oi naria namonamo, badina Suria taudia be iniseni amo do idia diho mai oi idia tuari henia totona.”
10 Vadaeni Israela ena king be ena taunimanima ia hadibaia Dirava momokanina ena hesiai tauna ese ia gwauraia gabuna dekenai idia lao lasi. Elisaia ese Israela ena king ia hadibaia loulou, unai dainai Israela ena king be unai gabu kahirakahira ia lao momo lasi.+
11 Unai ese Suria ena king ia habadua, unai dainai ena hesiai taudia ia boiria bona ia nanadaia: “Lau umui hamaoroa, ita huanai daika ese Israela ena king ia durua noho?”
12 Vadaeni ena hesiai tauna ta ia gwau: “Egu lohia bona king e, ai ta be unai bamona ai karaia lasi! To Israela ai ia noho peroveta tauna Elisaia ese emu daiutu ai oi gwauraia gaudia be Israela ena king ia hamaoroa.”+
13 Ia gwau: “Umui lao bona umui tahua ia be edeseniai, bena tatau do lau siaia ia idia dogoatao totona.” Gabeai ia idia hadibaia idia gwau: “Ia be Dotana dekenai ia noho.”+
14 Maoromaoro king ese hosi bona tuari kariota bona tuari orea badana ta be Dotana dekenai ia siaidia lao. Idia be hanuaboi ai idia ginidae bona siti idia hagegea.
15 Elisaia ena hesiai tauna be daba momokani ia toreisi bona murimuri dekenai ia lao neganai, ia itaia tuari oreana ta mai edia hosi bona tuari kariota ese siti ia hagegea. Karaharaga hesiai tauna be Elisaia dekenai ia gwau: “Egu lohia e, dahaka do ita karaia?”
16 To ia gwau: “Oi gari lasi!+ Badina iseda durua taudia be momo, to idia be momo lasi.”+
17 Vadaeni Elisaia ia guriguri matamaia bona ia gwau: “Iehova e, mani ena matana oi kehoa, unai amo do ia itaia.”+ Maoromaoro Iehova ese hesiai tauna ena matana ia kehoa bona ia itaia, ororo gabudia ai lahi bamona hosi bona tuari kariota idia noho+ bona Elisaia idia hagegea.+
18 Suria taudia be Elisaia dekenai idia mai neganai, ia ese Iehova ia guriguri henia bona ia gwau: “Mani inai bese taudia edia matana oi hakepulua.”*+ Vadaeni Dirava ese edia matana ia hakepulua, Elisaia ena noinoi hegeregerena.
19 Elisaia be idia dekenai ia gwau: “Dala be inai lasi, bona siti be inai lasi. Lau umui badinaia, bona umui tahua tauna dekenai umui do lau hakaua lao.” To, ia ese idia be Samaria dekenai ia hakaudia lao.+
20 Samaria ai idia ginidae neganai, Elisaia ia gwau: “Iehova e, mani edia matana oi kehoa, unai amo do idia itaia.” Unai dainai Iehova ese edia matana ia kehoa bona idia itaia idia be Samaria ena huanai idia noho.
21 Israela ena king be idia ia itaia neganai, Elisaia ia nanadaia: “Egu lohia e, idia do lau hamasea, a?”
22 To ia gwau: “Idia oi hamasea lasi. Oi ura tuari amo oi abia mauri taudia oi hamasea, a? Lasi, aniani bona ranu oi henia, unai amo do idia ania bona inua+ murinai edia lohia tauna dekenai do idia giroa lou.”
23 Unai dainai idia totona aria badana ia karaia, bona idia aniani bona inuinu, bena idia ia siaia edia lohia tauna dekenai idia giroa lou totona. Unai murinai Suria ena dadidadi tuari taudia+ be Israela tano dekenai idia giroa lou lasi.
24 Gabeai Suria ena king Bene-hadada be ena tuari taudia ia haboua bona idia daekau lao bona Samaria hanua idia hagegea.+
25 Samaria hanua idia hagegea dainai, hitolo bada ia vara.+ Unai nega ai doniki ena kwarana+ ena davana be siliva moni 80 bamona, bona pune manu ena kukuri maragina ta* ena davana be siliva moni 5.
26 Israela ena king be magu latanai ia raka hanai lalonai, hahine ta ia boiboi ia gwau: “Egu lohia bona king e, ai oi durua!”
27 Vadaeni king ia gwau: “Bema Iehova be umui ia durua lasi, heduru be edeseni amo do lau abia umui durua totona? Oi laloa oi dekenai aniani, wain eiava oela lau henia diba, a?”
28 King be unai hahine ia nanadaia: “Emu hekwakwanai be dahaka?” Unai hahine ia gwau: “Inai hahine be lau dekenai ia gwau, ‘Emu natuna oi henia, bona hari dina do ita ania, bona kerukeru egu natuna do ita ania.’+
29 Vadaeni egu natuna ai nadua bona ai ania.+ Murina dinana ai ia dekenai lau gwau, ‘Emu natuna mero oi henia unai amo do ita ania.’ To ia be ena natuna mero ia hunia.”
30 King be unai hahine ena hereva ia kamonai neganai, ena dabua ia darea.+ King be magu ataiai amo ia raka hanaia neganai, taunimanima idia itaia ena dabua lalonai puse dabua ia karaia.
31 Bena ia gwau: “Bema hari dina Sapata ena natuna Elisaia ena kwarana lau utua oho lasi, Dirava ese lau ia panisia momokani be namo!”+
32 Elisaia be tau badadia ida ena ruma ai idia helai noho. King be hesiai tauna ta ia siaia guna, to unai tauna ia do ginidae lasi neganai, Elisaia be tau badadia dekenai ia gwau: “Inai ala-ala tauna ena natuna+ ese ta ia siaia egu kwarana ia utua oho totona. Umui gima noho, ena hesiai tauna ia mai neganai, iduara umui koua auka, unai amo do ia vareai lasi. Umui ese iena lohia ia mai haraga noho ena regena umui kamonai, ani?”
33 Elisaia be idia dekenai ia hereva noho lalonai, king bona ena hesiai tauna idia ginidae, bona king ia gwau: “Inai dika bada be Iehova ese ia havaraia. Dahaka dainai Iehova ena heduru totona lau naria noho?”
Futnout
^ Heb., “emu hesiai taudia.”
^ Inai be matana korikori ia herevalaia lasi, to edia lalona ia hadiburaia karana ia herevalaia.
