King Taudia Iharuana 8:1-29
8 Elisaia ese ia hatorea isi lou merona ena sinana dekenai ia gwau:+ “Oi toreisi bona oi lao, oi bona emu ruma bese taudia, bona oi noho diba tanona ai idau bese hahinena ta bamona do oi noho, badina Iehova ia gwau lagani 7 lalonai inai tano ai hitolo bada do ia vara.”+
2 Unai dainai unai hahine be Dirava momokanina ena hesiai tauna ena hereva hegeregerena ia karaia. Ia bona ena ruma bese idia lao bona lagani 7 lalonai Filistia ena tano ta+ dekenai idia noho.
3 Lagani 7 idia ore murinai, unai hahine be Filistia amo ia giroa lou bona king dekenai ena ruma bona tano totona ia noinoi.
4 King ese Dirava momokanina ena hesiai tauna Gehasi ia hereva henia noho, ia gwau: “Mani lau dekenai Elisaia ia karaia hoa karadia ibounai oi herevalaia.”+
5 Gehasi be king dekenai Elisaia ese mase tauna ia hatorea isi lou ena sivarai ia gwauraia noho lalonai,+ unai hahine, mase amo ia hatorea isi lou merona ena sinana unai, be king dekenai ena ruma bona tano totona ia noinoi.+ Karaharaga Gehasi be king dekenai ia gwau: “Egu lohia bona king e, hahine be inai, bona ena natuna mero, Elisaia ese ia hatorea isi lou merona inai.”
6 Vadaeni king be hahine ia henanadai henia, bena hahine ese ia dekenai sivarai ia gwauraia. Bena king be ena ofesa tauna ta dekenai ia gwau: “Inai hahine ena gau ibounai umui henia lou, bona ena uma ena anina ibounai, ia rakatania negana amo idia vara gaudia unai, umui henia lou.”
7 Suria ena king Bene-hadada+ ia gorere neganai, Elisaia be Damaseko+ dekenai ia lao. Unai dainai haida ese king idia hadibaia: “Dirava momokanina ena hesiai tauna+ be iniseni ia mai vadaeni.”
8 Bena king be Hasaele+ dekenai ia gwau: “Harihari gauna ta oi abia bona Dirava momokanina ena hesiai tauna dekenai oi lao.+ Ia oi hamaoroa Iehova ia nanadaia bema lau be egu gorere amo do lau namo lou.”
9 Hasaele be kamelo 40 ai Damaseko ena harihari gaudia namodia idauidau ia atoa bona Elisaia ia hedavari henia totona ia lao. Hasaele ia mai bona ena vairanai ia gini bona ia gwau: “Emu natuna,* Suria ena king Bene-hadada ese lau ia siaia mai, oi lau nanadaia totona, bema ia be ena gorere amo do ia namo lou.”
10 Bena Elisaia ia gwau: “Oi lao bona ia oi hamaoroa, ‘Emu gorere amo do oi namo lou,’ to Iehova be lau dekenai ia hahedinaraia ia be do ia mase.”+
11 Bona Elisaia be Hasaele ia raraia noho ela bona ia hemarai. Bena Dirava momokanina ena hesiai tauna ia tai matamaia.
12 Hasaele ia henanadai: “Dahaka dainai egu lohia ia tai noho?” Elisaia ia haere: “Badina lau diba Israela taudia dekenai dahaka dika do oi havaraia.+ Edia gabu mai magu aukadia be lahi amo do oi gabua, edia tatau goadadia be tuari kaia amo do oi hamasedia, edia natudia be mai dagedage ida do oi hamasedia, bona idia rogorogo hahinedia edia bogana do oi utua kehoa.”+
13 Bena Hasaele ia gwau: “Edena bamona emu hesiai tauna, taunimanima idia laloa ia be anina lasi sisia ta bamona, be unai kara do ia karaia?” To Elisaia ia gwau: “Iehova be lau dekenai ia hahedinaraia vadaeni oi be Suria ena king ai do oi lao.”+
14 Bena Elisaia ia rakatania bona ena lohia dekenai ia giroa lou, bona ena lohia ia henanadai: “Elisaia be dahaka ia gwau?” Hasaele ia haere: “Lau ia hamaoroa oi be do oi namo lou.”+
15 To murina dinana ai, Hasaele ese blanketi ta ia abia, ranu lalonai ia atoa bena unai blanketi amo king ena vairana ia koua ela bona ia mase.+ Bona Hasaele be king ai ia lao.+
16 Israela ena king Ahaba ena natuna Iehorama+ ena lohia lagani namba 5 ai, Iehosapata ena natuna Iehorama+ be Iuda ena king ai ia lao. Unai nega ai Iehosapata be Iuda ai ia do lohia noho.
17 Iehorama ena mauri lagani be 32 neganai, king ai ia lao, bona lagani 8 lalonai Ierusalema ai ia lohia.
18 Iehorama be Israela ena king taudia edia kara ia badinaia,+ Ahaba ena bese taudia hegeregerena,+ badina ia ese Ahaba ena natuna kekeni ia adavaia.+ Bona Iehova vairanai kara dika ia karaia noho.+
19 To Iehova ese ena hesiai tauna Davida dainai, ia ura lasi Iuda basileia ia hadikaia.+ Badina Davida ia gwauhamata henia, ia bona ena bese taudia do idia lohia* noho.+
20 Iehorama ena lohia negana lalonai Edoma taudia ese Iuda ena lohia dalana idia dadaraia+ bona sibona edia king idia abia hidi.+
21 Vadaeni Iehorama bona ena kariota ibounai be Sairi dekenai idia hanaia lao, bona hanuaboi ai Edoma taudia, ia bona ena tuari biagudia idia hagegea taudia unai, idia tuari henia bona idia halusia. Bona tuari taudia be edia palai rumadia dekenai idia heau lao.
22 To Edoma taudia ese Iuda ena lohia dalana idia dadaraia ema bona hari. Danu unai nega ai Libina taudia+ ese Iuda ena lohia dalana idia dadaraia.
23 Iehorama ena sivarai ibounai, ia karaia gaudia ibounai danu, be Iuda ena king taudia idia sivarailaia buka lalonai idia torea, ani?
24 Vadaeni Iehorama be ia mase* bona ia be Davida Ena Siti ai idia guria.+ Bona ena natuna Ahasaia+ be king ai ia lao.
25 Israela ena king Ahaba ena natuna Iehorama ena lohia lagani namba 12 ai, Iuda ena king Iehorama ena natuna Ahasaia be king ai ia lao.+
26 Ahasaia ena mauri lagani be 22 neganai, ia be king ai ia lao, bona Ierusalema dekenai lagani tamona ia lohia. Ena sinana be Atalaia,+ ia be Israela ena king Omeri ena tubuna kekeni.+
27 Ahasaia be Ahaba ena bese taudia edia kara ia badinaia+ bona Iehova ena vairanai ia kara dika noho, Ahaba ena bese taudia hegeregerena, badina ia be Ahaba ena bese tauna ta.+
28 Vadaeni Ahasaia be Ahaba ena natuna Iehorama ida Ramoto-gileada+ dekenai idia lao, Suria ena king Hasaele idia tuari henia totona, to Suria taudia ese Iehorama+ idia haberoa.
29 Vadaeni King Iehorama be Ieserele+ dekenai ia giroa lou, ena bero idia namo totona, unai be Rama ai Suria ena king Hasaele ia tuari henia neganai, Suria taudia ese ia idia haberoa.+ Iuda ena king Iehorama ena natuna King Ahasaia be Ieserele dekenai ia lao Ahaba ena natuna Iehorama ia itaia totona, badina ia be ia gorere.
Futnout
^ Ta ese ta ia gwauraia “emu natuna” be hemataurai karana.
^ Heb., “ia dekenai lamepa ta ia henia.”
^ Heb., “ena sene taudia ida ia hekure.”
