Petero Ena Revareva Iharuana 2:1-22
2 Gunaguna peroveta koikoi taudia be Dirava ena taunimanima huanai idia noho, unai hegeregerena umui huanai danu hadibaia koikoi taudia do idia noho.+ Emui abidadama hadikaia totona, idia ese hehuni dalanai orea hapararaia karadia do idia havaraia, bona idia ia hoia lou tauna,*+ do idia dadaraia, vadaeni karaharaga idia sibona latanai dika do idia mailaia.
2 Ma danu, momo ese edia gwau-edeede hemarai karadia*+ do idia badinaia, bona idia dainai haida ese hereva momokani ena dala do idia gwauraia dika.+
3 Danu, mai mataganigani ida koikoi herevadia amo umui do idia koia toho. To Dirava ese idaunegai idia totona ia gwauraia hahemaoro+ be ia metairametaira lasi, bona edia hadikaia ore negana be do ia mai momokani.+
4 Dirava ese idia kara dika aneru ia panisia+ bona Tataros*+ dekenai idia ia negea. Unai dibura masemase gabuna dekenai seini amo ia guidia, unuseniai do idia noho ela bona hahemaoro negana.+
5 Bona ia ese guna ia noho tanobadana ia panisia+ bona ia idia badinaia lasi taudia latanai abata badana ia mailaia,+ to kara maoromaoro ia harorolaia tauna Noa,+ bona ma taunimanima 7+ ia hamauria.
6 Danu, ia ese Sodoma bona Gomora siti ia hahemaoro henia+ bona kahu ai ia halaodia, unai amo Dirava idia badinaia lasi taudia dekenai do idia vara gaudia ia hahedinaraia.+
7 Bona ia ese kara maoromaoro tauna Lota ia hamauria.+ Ia be taravatu utua taudia edia gwau-edeede hemarai karadia* dainai ia lalometau bada,
8 oibe, unai kara maoromaoro tauna be edia huanai ia noho, bona dina ta ta ai taravatu utua karadia ia itaia bona kamonai dainai, ena lalona ia hisihisi bada.
9 Iehova* ese hahetoho amo ia idia badinaia taudia ia hamauria dalana ia diba,+ to kara maoromaoro lasi taudia ia guidia, ena hahemaoro dinana ai ia hadikadia ore* totona.+
10 Unai taudia be ma haida hamiroa+ totona idia ida idia mahuta hebou bona lohia taudia idia matauraia lasi.+
Idia hekokoroku, sibodia idia laloa, bona idia gari lasi Dirava ese dagi ia henia taudia idia gwauraia dika totona,
11 to aneru, ena be edia siahu bona goada be bada, to Iehova* idia matauraia dainai, idia ese hadibaia koikoi taudia dekenai hadikaia herevadia idia gwauraia lasi.+
12 To unai tatau be animal bamona. Animal be mai edia lalona lasi, to edia ura sibona idia badinaia, idia vara bena taunimanima ese idia guidia bona idia hamasedia. Unai tatau be unai lalona lasi animal bamona, idia diba lasi gaudia idia gwauraia dika,+ idia be edia dala dikana ai do idia mase ore.
13 Dala dikana idia badinaia dainai, edia davana be dika do idia davaria.
Idia laloa dina ai edia tauanina ena ura idia hagugurua karana be moale gauna.+ Umui huanai idia be mai edia miro bona maka. Bona umui ida idia aniani hebou neganai, mai moale ida edia hadibaia hereva koikoidia amo umui idia hakaua kerere.+
14 Idia be heudahanai karana idia ura henia dikadika+ bona kara dika idia hadokoa be auka, bona manoka taudia idia koia. Edia lalona be mataganigani karana dekenai ia manada vadaeni. Idia be dika do idia davaria.
15 Dala maorona idia rakatania bona dala kererena idia badinaia. Idia ese Balama,+ Beoro ena natuna, ena dala idia badinaia, ia be kara kerere ena davana ia ura henia bada,+
16 bona taravatu ia utua dainai sisiba ia abia.+ Ia hereva diba lasi doniki be taunimanima ena gadona ai ia hereva bona peroveta tauna ena kavakava karana ia koua.+
17 Idia be idia kaukau ranu guridia bamona, bona lai gubana ese ia odaia lao ori bamona, bona dibura masemase gabuna be idia totona ia naria noho.+
18 Idia ese hekokoroku herevadia idia gwauraia, to edia hereva be anina lasi. Idia ese gwau-edeede hemarai karadia* idia karaia bona tauanina ena ura dikadia+ abia lou totona taunimanima idia tohoa, nega sisina lalonai idia rakatania kara dikadia idia karaia totona.+
19 Ena be unai taudia dekenai ura kwalimu idia gwauhamatalaia, to idia sibona be kara dika ena hesiai taudia.+ Badina bema tau ta ese ma ta ia biagua, ia be unai tauna ena igui hesiai tauna.*+
20 Momokani, haida be Lohiabada bona Hamauria Tauna Iesu Keriso idia dibaia namonamo murinai, inai tanobada ena kara mirodia amo idia heau mauri.+ To bema gabeai unai gaudia idia karaia lou bona unai gaudia ese idia biagudia, vadaeni hari edia dokona be ia dika momokani, guna bamona lasi.+
21 Idia be kara maoromaoro ena dala idia diba lasi be namo, badina unai idia diba namonamo murinai, Dirava ese idia dekenai ia henia taravatu helagana idia dadaraia.+
22 Idia dekenai inai aonega herevana ia momokani: “Sisia be ia giroa lou bona ena mumuta ia ania, bona boroma be ia digu murinai kopukopu dekenai ia giroagiroa.”+
Futnout
^ Gr., “edia biaguna,” unai be Iesu.
^ Gr., “utua oho.”
^ Eiava “gau ta ese ia biagua, ia be unai gauna ena igui hesiai tauna.”
