Petero Ena Revareva Iharuana 3:1-18
3 Egu lalokau taudia e, inai be umui dekenai lau torea revareva iharuana, ia be egu revareva ginigunana hegeregerena. Lau ura umui dekenai gau haida lau herevalaia lou do umui laloa maoromaoro totona,+
2 unai amo guna peroveta taudia helagadia ese idia gwauraia herevadia bona Lohiabada bona Hamauria Tauna ena taravatu do umui laloa lou. Unai be emui aposetolo taudia amo umui kamonai gaudia.
3 Inai umui diba guna be namo, dina gabedia ai, hevaseha taudia do idia mai bona hevaseha herevadia do idia gwauraia, bona sibodia edia ura do idia badinaia,+
4 bona do idia gwau: “Ia gwauhamata do ia mai, to ia be edeseni?+ Emai sene taudia be mase ai idia mahuta vadaeni, to gau ibounai idia vara negana amo gau ta ia idau lasi.”+
5 Idia be mai edia ura ida inai idia laloaboio, idaunegai Dirava ena hereva amo guba gaudia idia vara bona tanobada be ranu amo ia daekau bona ranu ese ia hagegea.+
6 Bena abata ia vara neganai, unai ranu ese unai nega ai ia noho tanobadana ia hadikaia ore.+
7 Bona Dirava ena hereva amo hari idia noho guba bona tanobada be lahi ese do ia araia negana idia naria noho, bona Dirava idia badinaia lasi taudia edia hahemaoro negana idia naria noho. Unai nega ai, unai taudia be do idia ore momokani.+
8 To egu lalokau taudia e, namona be inai umui laloatao, Iehova* dekenai dina tamona be lagani 1,000 bamona bona lagani 1,000 be dina tamona bamona.+
9 Iehova* be ena gwauhamata hagugurua totona ia metairametaira lasi,+ haida ese idia laloa bamona, to umui totona ia haheauka, badina ia ura lasi tau ta ia mase, to ia ura taunimanima ibounai be do idia helalo-kerehai.+
10 Iehova* ena dina+ be henaohenao tauna bamona do ia mai.+ Unai nega ai guba be mai regerege bada* ida do ia ore,+ to guba bona tanobada gaudia be do idia siahu momokani bona do idia veve, bona tanobada bona ia lalonai taunimanima ese idia karaia gaudia be lahi ese do ia araia ore.+
11 Unai gaudia ibounai be inai dala ai do idia veve ore dainai, namona be emui kara idia helaga bona Dirava badinaia karadia umui hahedinaraia,
12 danu Iehova* ena dina ena mai negana do umui naria bona umui laloa noho.*+ Unai nega ai guba be lahi ese do ia araia ore,+ bona guba bona tanobada gaudia be idia siahu momokani dainai do idia veve!
13 To iena gwauhamata hegeregerena, ita ese guba matamata bona tanobada matamata ita naria noho,+ bona unuseniai kara maoromaoro sibona do ia noho.+
14 Unai dainai egu lalokau taudia e, unai gaudia umui naria noho lalonai, do umui gaukara goada Dirava vairanai umui goeva bona kerere lasi totona, bona mai maino ida umui noho.+
15 Ma danu, namona be umui laloatao, iseda Lohiabada ena haheauka karana be emui hahemauri dalana. Dirava ese iseda lalokau tadikaka Paulo dekenai ia henia aonega hegeregerena, ia danu be umui dekenai revareva ia torea,+
16 bona iena revareva ibounai lalonai unai gaudia ia herevalaia. To, unai hereva haida umui lalopararalaia be auka. Unai hereva be diba lasi taudia bona manoka taudia ese idia mogea noho, Toretore Helagadia ena kahana haida danu idia mogea hegeregerena, unai amo sibodia idia hadikaia ore.
17 Unai dainai egu lalokau taudia e, unai gaudia umui diba vadaeni dainai, do umui gima noho, dika unai taravatu utua taudia edia lalohadai koikoi ese umui idia hakaua kerere, bena emui gini goada karana umui rakatania.+
18 Mani iseda Lohiabada bona Hamauria Tauna Iesu Keriso ena hebogahisi hereadaena do umui abia bona ia umui dibaia namonamo noho. Ia dekenai hairai do ia noho, hari ela bona hanaihanai. Amen.
Futnout
^ Unai be, gau ta ia hanaia haraga ena regena.
^ Eiava “umui laloa ia be kahirakahira.” Gr., “haharagaia.”
