Samuela Iharuana 11:1-27
11 Lagani ena matamana ai, king taudia be tuari totona idia lao negadiai, Davida ese Ioaba, iena* hesiai taudia, bona Israela ena tuari orea ibounai ia siaidia, Amono taudia idia hadikaia ore totona, bona idia ese Raba siti idia koua hagegea,+ to Davida be Ierusalema ai ia noho.+
2 Adorahi momokani ta ai, Davida be ena mahuta patana amo ia toreisi bona ena ruma ena guhi ai ia raka loaloa. Guhi amo ia ese hahine ta ia itaia ia digu, bona unai hahine be hairai momokani.
3 Vadaeni Davida ese ta ia siaia, do ia tahua unai hahine be daika, bena unai tau ia gwau: “Unai hahine be Bataseba,+ ia be Eliama ena natuna kekeni,+ bona Hiti tauna Uria ena adavana.”+
4 Bena Davida ese gwaukau taudia ia siaia ia idia mailaia totona.+ Vadaeni ia be Davida dekenai ia mai, bona Davida be ia ida ia mahuta hebou.+ (Unai nega ai ia be sibona ia hagoevaia noho.*)+ Unai murinai, hahine be ena ruma dekenai ia giroa lou.
5 Hahine ia rogorogo, bena Davida dekenai hereva ia siaia, ia gwau: “Lau be lau rogorogo.”
6 Vadaeni Davida ese Ioaba dekenai hereva ia siaia, ia gwau: “Hiti tauna Uria be lau dekenai oi siaia mai.” Vadaeni Ioaba ese Uria be Davida dekenai ia siaia lao.
7 Uria be Davida dekenai ia mai neganai, Davida ese ia nanadaia Ioaba bona tuari oreana be edena bamona, bona tuari ena sivarai totona ia henanadai danu.
8 Bena Davida be Uria dekenai ia gwau: “Emu ruma dekenai oi diho lao bona oi laga-ani.” Uria ese king ena ruma ia rakatania neganai, king ena harihari gauna be gabeai ia dekenai ia siaia lao.
9 To Uria be king ena hesiai taudia ma haida ida king ena ruma ena raka vareai gabuna dekenai ia mahuta, bona iena ruma dekenai ia diho lao lasi.
10 Vadaeni Davida idia hamaoroa: “Uria be ena ruma dekenai ia diho lao lasi.” Unai neganai Davida be Uria dekenai ia gwau: “Oi be gabu daudauna amo oi lou mai, ani? Dahaka dainai emu ruma dekenai oi diho lao lasi?”
11 Uria be Davida dekenai ia gwau: “Maua,+ bona Israela bona Iuda tatau be palai rumadia dekenai idia noho, bona egu lohia Ioaba bona ena taunimanima be tuari gabuna ai idia kamepa noho. Unai dainai egu ruma dekenai do lau lao bona lau aniani bona inuinu bona egu adavana ida do lau mahuta hebou, a?+ Oi lau hamaoroa momokani, lau be unai bamona do lau karaia lasi!”
12 Bena Davida be Uria dekenai ia gwau: “Hari dina iniseni oi noho danu, bona kerukeru oi do lau siaia lao.” Vadaeni unai dina bona murina dinana ai Uria be Ierusalema ai ia noho.
13 Bena Davida ese hereva ia siaia Uria do ia mai, ia ida ia aniani bona inuinu totona, bona Davida ese ia hakekeroa. To adorahi momokani ai, ia lao bona ena mahuta patana ai ia hekure, ena lohia ena hesiai taudia ida, bona ena ruma dekenai ia diho lao lasi.
14 Daba ai Davida ese Ioaba dekenai revareva ta ia torea bona Uria ida ia siaia lao.
15 Revareva dekenai ia gwau: “Tuari ia bada gabuna ai Uria be vaira kahanai do oi atoa. Bena iena murina kahana amo do umui heau, unai amo ia do idia alaia mase.”+
16 Ioaba bona ena tuari oreana ese siti idia koua hagegea, bona Ioaba ese Uria be tuari goadagoada taudia idia noho gabuna ai ia atoa.
17 Siti ena tatau idia raka-lasi bona Ioaba ida idia tuari neganai, Davida ena hesiai taudia haida idia moru, idia huanai Hiti tauna Uria ia mase danu.+
18 Vadaeni Ioaba ese Davida dekenai tuari ena sivarai ibounai ia gwauraia.
19 Ia ese gwaukau tauna ia hamaoroa, ia gwau: “Tuari ena sivarai ibounai be king dekenai oi gwauraia murinai,
20 king be reana do ia badu bona oi dekenai do ia gwau, ‘Dahaka dainai tuari totona siti kahirakahira umui lao? Umui diba lasi idia be magu ena ataiai amo umui do idia pidia, a?
21 Daika ese Ierubeseta ena natuna Abimeleka ia alaia mase?+ Tebese ai, hahine ta ese magu ena ataiai amo nadi badana ia negea bona ia ia hamasea, ani? Dahaka dainai magu kahirakahira momokani dekenai umui lao?’ Bena do oi gwau, ‘Emu hesiai tauna Uria, Hiti tauna unai, ia mase danu.’”
22 Vadaeni gwaukau tauna ia lao bona Ioaba ese ia hamaoroa hereva ibounai be Davida dekenai ia gwauraia.
23 Bona gwaukau tauna ese Davida ia hamaoroa, ia gwau: “Edia tatau edia goada ese emai goada idia hereaia, bona siti ena murimuri dekenai idia raka-lasi bona ai idia tuari henia, to idia ai lulua ela bona siti ena vareai gabuna ai.
24 Bona peva gaukaralaia taudia be magu ena ataiai amo emu hesiai taudia idia pidia, bona king ena hesiai taudia haida idia mase. Bona emu hesiai tauna Uria, Hiti tauna unai, ia mase danu.”+
25 Unai neganai, Davida be gwaukau tauna dekenai ia gwau: “Ioaba dekenai inai hereva oi gwauraia: ‘Namo lasi ia vara gauna dainai oi laloa momo, badina tuari lalonai ta ia mase diba. Unai siti umui tuari henia goada bona umui hadarerea.’+ Bona ia oi hagoadaia.”
26 Uria ena adavana ia kamonai ena tau Uria ia mase neganai, iena tau dainai ia taitai matamaia.
27 Taitai negana ia ore murinai, Davida ese hereva ia siaia bona ena ruma dekenai hahine idia mailaia, bona ia be Davida ena adavana ai ia lao+ bona natuna mero ta ia havaraia. To Davida ese ia karaia karana dekenai Iehova ia moale lasi.+
Futnout
^ Reana Davida idia durua tuari tatau ia herevalaia.
^ Reana ena hua gorerena dainai ia miro.
