Samuela Iharuana 13:1-39
13 Davida ena natuna Abesaloma be mai ena taihuna ta, iena ladana be Tamara+ bona ia be hairai kekenina, bona Davida ena natuna Aminona+ ese ia ura henia matamaia.
2 Aminona be ena taihuna Tamara dainai ia laloa momo bona unai ese ia hagorerea. Tamara be rami-hebou kekenina dainai, ia auka Aminona be ia dekenai gau ta ia karaia.
3 Vadaeni Aminona be mai ena turana ta, iena ladana be Iehonadaba,+ ia be Davida ena tadikaka Simeha ena natuna.+ Iehonadaba be kara koikoi tauna.
4 Vadaeni Aminona dekenai ia gwau: “Dahaka dainai daba ibounai oi, king ena natuna, be oi lalometau? Ia namo lau oi hamaoroa?” Aminona ese ia haere henia: “Lau be Tamara lau lalokau henia, egu tadikaka Abesaloma ena taihuna unai.”+
5 Iehonadaba be ia dekenai ia gwau: “Emu mahuta patana dekenai oi hekure bona do oi gorere koikoi. Emu tamana be oi itaia totona ia mai neganai, ia dekenai do oi gwau, ‘Mani egu taihuna Tamara oi siaia mai bona lau dekenai aniani do ia henia. Bema egu vairanai gorere taudia dekenai idia henia aniani ia hegaegaelaia, lau be iena imana amo unai aniani do lau ania.’”
6 Vadaeni Aminona ia hekure diho bona ia gorere koikoi, bona king be ia itaia totona ia lao. Bena Aminona be king dekenai ia gwau: “Mani egu taihuna Tamara oi siaia mai bona keke rua do ia gabua, unai be egu vairanai do ia karaia, unai amo iena imana amo do lau aniani.”
7 Tamara be ruma ai ia noho neganai, Davida ese hereva ia siaia, ia gwau: “Mani emu tadikaka Aminona ena ruma dekenai oi lao, bona ia totona aniani oi hegaegaelaia.”
8 Vadaeni Tamara be ena tadikaka Aminona ena ruma dekenai ia lao, ia hekure gabuna unai. Bona keke totona idia mikisia vadaeni paraoa ia abia bona ia hapalakaia bona Aminona ena vairanai ia gabua.
9 Bena pani amo keke ia abia bona Aminona dekenai ia henia. To Aminona be ia ura lasi ia aniani, bona ia gwau: “Taunimanima ibounai siaia raka-lasi!” Vadaeni ibounai be ia idia rakatania.
10 Vadaeni Aminona be Tamara dekenai ia gwau: “Aniani be egu mahuta daiutuna dekenai oi mailaia, unai amo emu imana amo lau ania diba.” Vadaeni Tamara ese ia gabua keke ia abia bona ena tadikaka Aminona ia mahuta daiutuna dekenai ia abia lao.
11 Tamara ese ia dekenai keke ia mailaidia neganai, ia ese Tamara ia dogoatao bona ia gwau: “Lauegu taihuna e, oi mai bona lau ida oi mahuta hebou.”
12 To Tamara be ia dekenai ia gwau: “Lasi egu tadikaka! Lau oi hahemaraia lasi, badina Israela dekenai inai bamona idia karaia lasi.+ Inai hemarai karana oi karaia lasi.+
13 Lauegu hemarai be edena bamona do lau hunia? Bona oi be Israela ai do idia gwauraia kavakava tauna. Vadaeni mani king oi hereva henia, badina lau dainai oi karaia noinoi be ia ese do ia abia dae.”
14 To Aminona be Tamara ena hereva ia abia dae lasi, bona ena goada be bada dainai ia ese Tamara ia reipia, unai amo ia hahemaraia.
15 Bena Aminona ese Tamara ia inai henia bada matamaia, vadaeni ena inai henia karana ese guna iena lalokau Tamara dekenai ia hereaia momokani. Aminona be ia dekenai ia gwau: “Oi toreisi, bona oi lao!”
16 Vadaeni Tamara be ia dekenai ia gwau: “Lauegu tadikaka e, lasi, badina bema hari lau oi siaia lao, unai ese lau dekenai oi karaia karana ena dika do ia hereaia momokani!” To Aminona ia ura lasi Tamara ena hereva ia kamonai.
17 Vadaeni Aminona ese ena hesiai mero matamata ia boiria bona ia dekenai ia gwau: “Mani egu vairana amo inai hahine oi abia siri, bona iduara oi lokaia.”
18 (Tamara be dabua latana namo hereana ia atoa, vaia king ena natudia kekeni, rami-hebou kekenidia unai, be unai bamona dabua idia atoa.) Vadaeni Aminona ena hesiai tauna ese Tamara be murimuri dekenai ia hakaua lao, bena iduara ia lokaia.
19 Bena Tamara ese ena kwarana dekenai lahi kahu ia atoa,+ bona ia hahedokilaia dabua namo hereana ia darea, bona ena imana be ena kwarana dekenai ia atoa bona mai taitai ida ia raka oho.
20 Vadaeni ena tadikaka Abesaloma+ ese ia nanadaia: “Aminona ese oi dekenai inai kara ia karaia, a? Lauegu taihuna e, ia vara gauna be ta dekenai oi herevalaia lasi. Ia be emu tadikaka.+ Namo lasi inai kara dainai oi laloa momo.” Bena Tamara be ena tadikaka Abesaloma ena ruma ai ia noho, bona ma haida ida ia noho hebou lasi.
21 King Davida ese unai ibounai ia kamonai neganai, ia badu dikadika.+ To ia ura lasi ena natuna Aminona ena lalona ia hahisia, badina ia ia lalokau henia, bona ia be ena vara guna natuna.
22 Bona Abesaloma ese Aminona ia inai henia, badina ia ese Tamara ia hahemaraia,+ unai dainai Aminona dekenai gau ta ia hereva lasi.+
23 Lagani rua murinai, Abesaloma ena mamoe edia huina utua taudia be Bala-hasoro ai idia noho, unai be Eparaima kahirakahira,+ bona Abesaloma ese king ena natuna memero ibounai be aria ta totona ia boiria.+
24 Vadaeni Abesaloma be king dekenai ia lao bona ia gwau: “Emu hesiai tauna be ena mamoe edia huina ia utua noho. Mani king bona ena hesiai taudia be lau ida idia lao.”
25 To king be Abesaloma dekenai ia gwau: “Lauegu natuna e, lasi. Bema ita ibounai ita lao, oi dekenai metau do ai henia.” Ena be Abesaloma ese king ia noia loulou, to ena hereva ia abia lasi, to ia ese Abesaloma ia hanamoa.
26 Bena Abesaloma ia gwau: “Bema do oi mai lasi, mani egu tadikaka Aminona oi siaia bona ai ida ia lao.”+ King be ia dekenai ia gwau: “Dahaka dainai ia be oi ida do ia lao?”
27 To Abesaloma ese king ia noia, vadaeni ia ese Aminona bona king ena natudia memero ibounai be ia ida ia siaia lao.
28 Bena Abesaloma ese ena hesiai taudia ia oda henia, ia gwau: “Umui itaia, bema Aminona ese wain ia inua dainai ena kudouna ia moale, lau be umui dekenai do lau gwau, ‘Aminona umui alaia mase!’ Bena ia do umui alaia mase. Do umui gari lasi, badina lau ese umui dekenai unai oda lau henia. Do umui lalogoada bona boga-auka.”
29 Vadaeni Abesaloma ena oda hegeregerena ena hesiai taudia be Aminona dekenai unai idia karaia. Bena king ena natudia memero ma haida idia toreisi, bona ta ta be edia doniki dekenai idia guia bona idia heau.
30 Idia lao noho lalonai, haida ese Davida idia hamaoroa idia gwau: “Abesaloma ese king ena natudia memero ibounai ia alaia mase, bona idia ta ia heau mauri lasi.”
31 King be unai ia kamonai neganai, ia toreisi bona ena dabua ia darea bona tano dekenai ia hekure, bona ena hesiai taudia ibounai be ia kahirakahira idia gini, edia dabua idia darea danu.
32 To Davida ena tadikaka, Simeha,+ ena natuna Ionadaba+ ia gwau: “Namo lasi egu lohia ia laloa idia ese king ena natudia memero matamata ibounai idia alaia, badina Aminona sibona ia mase.+ Abesaloma ena oda hegeregerena unai ia vara, Aminona ese Abesaloma ena taihuna Tamara ia hahemaraia+ dinana amo ia ura unai ia karaia.+
33 Vadaeni namo lasi egu lohia ese king ena natudia memero ibounai idia mase sivaraina ia abia dae, badina Aminona sibona ia mase.”
34 To Abesaloma be ia heau.+ Gabeai siti ena gima tauna ia roha isi bona ia itaia taunimanima momo herea be ororo badinai ia noho dalana amo idia mai.
35 Vadaeni Iehonadaba+ be king dekenai ia gwau: “Itaia, king ena natudia memero idia giroa mai. Emu hesiai tauna ia hereva hegeregerena.”
36 Iena hereva ia haorea neganai, king ena natudia memero idia vareai, mai taitai bada danu, king bona ena hesiai taudia ibounai danu idia taitai bada.
37 To Abesaloma ia heau bona Amihuda ena natuna Talamai dekenai ia lao,+ Amihuda be Gesuru ena king. Davida be ena natuna Aminona dainai dina momo ia taitai.
38 Abesaloma ia heau bona Gesuru dekenai ia lao murinai,+ unuseniai lagani toi ia noho.
39 Dokonai King Davida ia ura dikadika Abesaloma dekenai ia lao, badina Aminona ena mase dainai ena lalohisihisi ia ore vadaeni.
