Samuela Iharuana 15:1-37
15 Unai gaudia ibounai idia vara murinai, Abesaloma ese sibona totona kariota ta bona hosi ia abidia, bona tatau 50 danu, ena vairanai idia heau totona.+
2 Abesaloma be vaia daba momokani ai ia toreisi bona dala badinai ia gini, unai dala be siti ena geiti ia lao henia.+ Bema tau ta be mai ena kota herevana bona king dekenai ia mailaia,+ Abesaloma ese unai tauna ia boiria, bona ia gwau: “Oi be edena siti amo?” Bona do ia gwau: “Emu hesiai tauna be Israela ena iduhu ta amo.”
3 Bona Abesaloma be ia dekenai do ia gwau: “Oiemu hereva be namo bona maoro, to king ese ta ia abia hidi lasi emu kota herevana ia kamonai totona.”
4 Abesaloma ia gwau: “Lau ia abia hidi be namo inai tano ai hahemaoro gaukarana lau karaia totona. Vadaeni bema taunimanima be mai edia kota eiava hepapahuahu herevana, idia be lau dekenai idia mai diba, bona idia totona hahemaoro maoromaoro do lau karaia.”
5 Bona tau ta be ia kahirakahira ia mai bona ia ura ia dekenai ia tui diho neganai, Abesaloma ese ena imana amo unai tauna ia dogoatao bona ia kisi henia.+
6 King dekenai kota totona idia mai Israela taudia ibounai dekenai Abesaloma ese unai bamona ia karaia. Bona Abesaloma ese koikoi dalanai Israela taudia edia lalona ia veria noho.+
7 Lagani 4* edia dokona ai, Abesaloma be king dekenai ia gwau: “Mani Heberona dekenai lau lao,+ Iehova dekenai egu gwauhamata lau hamomokania totona.
8 Badina emu hesiai tauna be Suria tanona Gesuru ai ia noho neganai,+ ia ese inai gwauhamata metauna ia karaia:+ “Bema Iehova ese Ierusalema dekenai lau ia abia giroa lou, lau ese Iehova dekenai boubou do lau henia.’”
9 Vadaeni king be ia dekenai ia gwau: “Mai maino ida oi lao.” Unai neganai ia toreisi bona Heberona dekenai ia lao.
10 Abesaloma ese Israela ena iduhu ibounai dekenai spai taudia ia siaia, ia gwau: “Bema kibi regena umui kamonai, do umui gwau, ‘Abesaloma be Heberona dekenai king ai ia lao vadaeni!’”+
11 Ierusalema amo tatau 200 be Abesaloma ida unuseni idia lao. Unai tatau be ia vara gauna idia diba lasi, to Abesaloma ese idia ia boiria dainai, idia lao.
12 Ma danu, Abesaloma ese boubou gaudia ia henia neganai, ia ese Gilo tauna Ahitopela totona hereva ia siaia,+ Gilo siti+ amo ia mai totona, ia be Davida ena sisiba henia tauna.+ King kokia totona, Abesaloma ena palani idia durua taudia edia namba ia bada ia lao.+
13 Gabeai tau ta be Davida dekenai ia lao bona ia gwau: “Israela taudia be Abesaloma idia badinaia matamaia.”
14 Davida be ia ida Ierusalema ai idia noho hesiai taudia ibounai dekenai maoromaoro ia gwau: “Umui toreisi bona ita heau,+ badina ita ta be Abesaloma amo ia heau mauri diba lasi! Karaharaga, dika ia ese ita do ia davaria bona ita dekenai dika ia havaraia bona siti taudia be tuari kaia amo ia alaia mase!”+
15 King ena hesiai taudia be king dekenai idia gwau: “Emai lohia bona king be dahaka abia hidi ia karaia, ai be ai noho hegaegae ai badinaia totona.”+
16 Vadaeni king ia lao bona ena ruma bese taudia ibounai be ia murinai, to king ese ena hahine ma haida, idia ibounai 10 ia rakatania,+ ruma idia naria totona.
17 Bona king ia lao noho bona ena taunimanima ibounai be ia murinai, bona Bete-mehaka dekenai idia ginidae.
18 Ia ida idia lao hesiai taudia ibounai, bona Kereti taudia ibounai, Pelete taudia,+ bona Gata taudia ibounai,+ Gata amo ia idia badinaia tatau 600,+ be king ena vairanai idia hanaia lao.
19 Bena king be Gata tauna Itai dekenai ia gwau:+ “Dahaka dainai oi be ai ida do oi lao danu? Oi giroa lou bona unai king matamata ida oi noho, badina oi be idau tano tauna bona oi ese emu tano oi rakatania.
20 Oi be varani sibona oi mai, vadaeni hari maoro do lau henia ai ida oi loaloa totona, a? Oi giroa lou bona emu taunimanima danu oi abidia lao, bona Iehova ese oi dekenai lalokau* do ia hahedinaraia noho bona oi do ia rakatania lasi!”+
21 To Itai be king dekenai ia gwau: “Ia mauri noho Diravana, Iehova, ena ladana ai bona egu lohia bona king ena ladana ai oi lau hamaoroa momokani, egu lohia bona king ia lao gabudia ibounai dekenai emu hesiai tauna be oi ida do ia noho, bona lau noho hegaegae oi ida lau mase totona!”+
22 Unai neganai Davida be Itai dekenai ia gwau:+ “Oi lao bona oi hanaia.” Vadaeni Gata tauna Itai ia hanaia lao, ena tatau bona edia ruma bese ibounai danu.
23 Unai taunimanima ibounai idia hanaia noho lalonai, Ierusalema taudia ibounai idia taitai bada, bona king be Kiderona Kourana kahirakahira ia gini,+ bona taunimanima ibounai idia hanaia lao, taunimanima lasi gabuna ia lao henia dalana dekenai.
24 Sadoka+ danu be unuseniai bona ia be Dirava momokani ena Taravatu Maua+ idia huaia Levi taudia+ ida ia raka, bona idia ese Dirava momokani ena Maua idia atoa diho. Bona taunimanima ibounai be siti amo idia hanaia ore neganai, Abiatara+ be unuseni ia lao danu.
25 To king be Sadoka dekenai ia gwau: “Dirava momokani ena Maua be siti dekenai oi abia giroa lou.+ Bema Iehova ese lau ia lalonamo henia, ia ese lau do ia abia giroa mai bona unai Maua bona ena noho gabuna do lau itaia.+
26 To bema ia gwau, ‘lau be oi dekenai lau moale lasi,’ vadaeni iena ura hegeregerena lau do ia kara henia.”
27 King be hahelaga tauna Sadoka dekenai ia gwau: “Oi be matahanai itaia tauna, ani?+ Mai maino ida siti dekenai oi giroa lou, bona emui natudia memero rua danu oi abia lao, emu natuna Ahimasa bona Abiatara ena natuna Ionatana.+
28 Lau be taunimanima momo lasi gabuna kahirakahira ia noho Ioridane sinavai ena dobu lasi gabudia ai do lau naria ela bona oi amo hereva lau kamonai.”+
29 Vadaeni Sadoka bona Abiatara ese Dirava momokani ena Maua be Ierusalema dekenai idia abia giroa lou, bona unuseni idia noho.
30 Davida be mai taitai ida Olive Ororona dekenai ia daekau lao,+ iena kwarana ia koua bona aena kavakava ia raka. Ia ida idia raka taudia ibounai danu ese edia kwarana idia koua bona mai taitai ida idia daekau lao.
31 Haida ese Davida idia hamaoroa: “Ahitopela be Abesaloma+ ida hehuni ai palani idia karaia taudia huanai ia noho.”+ Unai neganai Davida ia gwau: “Iehova e,+ mani Ahitopela ena sisiba be kavakava gauna ai do oi halaoa!”+
32 Davida be ororo ena ataiai ia ginidae, taunimanima ese Dirava idia tomadiho henia gabuna unai, bona Araki tauna+ Husai+ be unuseni ia noho, ia ia hedavari henia totona, iena dabua idia hedare bona ena kwarana dekenai kahu ia noho.
33 To Davida be ia dekenai ia gwau: “Bema oi be lau ida oi hanaia, oi ese lau do oi durua lasi.
34 To bema siti dekenai oi giroa lou bona Abesaloma dekenai oi gwau, ‘King e, lau be oiemu hesiai tauna. Guna lau be emu tamana ena hesiai tauna, to hari lau be emu hesiai tauna,’+ bena oi ese lau oi durua bona Ahitopela ena palani do oi koua.+
35 Hahelaga taudia Sadoka bona Abiatara be oi ida idia noho, ani? Namona be king ena ruma amo oi kamonai herevadia ibounai be hahelaga taudia Sadoka bona Abiatara dekenai oi gwauraia.+
36 Itaia, idia ida be edia natudia memero rua, Sadoka ena natuna Ahimasa,+ bona Abiatara ena natuna Ionatana,+ bona oi kamonai hereva ibounai be idia amo lau dekenai do oi siaia mai.”
37 Vadaeni Davida ena turana* Husai+ be siti dekenai ia lao, unai nega ai Abesaloma be Ierusalema dekenai ia vareai noho.
