Samuela Iharuana 17:1-29
17 Ahitopela be Abesaloma dekenai ia gwau: “Mani tatau 12,000 lau abia hidi bona hari hanuaboi Davida ena murinai do ai heau.
2 Bona ia manoka bona ena goada ia ore neganai, lau ese ia do lau tuari henia,+ bona do ia gari dikadika. Bena ia ida idia noho taudia ibounai be do idia heau, bona lau ese king sibona do lau hamasea.+
3 Bena taunimanima ibounai be oi dekenai do lau hakaua giroa mai. Oibe, bema oi tahua noho tauna be ia mase, iena taunimanima ibounai be oi dekenai do idia giroa mai bona maino do ia noho.”
4 Abesaloma bona Israela ena tau badadia be unai lalohadai dekenai idia lalotamona.
5 To Abesaloma ia gwau: “Mani ta ese Araki tauna Husai ia boiria mai,+ bona do ia gwauraia herevana ita kamonai.”
6 Vadaeni Husai be Abesaloma dekenai ia lao. Bena Abesaloma be ia dekenai ia gwau: “Ahitopela be inai lalohadai ia gwauraia. Iena lalohadai hegeregerena do ita karaia, a? Bema lasi, ai oi hamaoroa dahaka do ai karaia.”
7 Unai neganai Husai be Abesaloma dekenai ia gwau: “Ahitopela ese ia gwauraia lalohadai be do ita badinaia lasi!”+
8 Husai ma ia gwau: “Oi diba momokani emu tamana bona iena tatau be mai edia goada,+ bona idia badu dikadika, bea hahinena ese ena natudia ia haboioa neganai ia badu dikadika bamona.+ Danu, emu tamana be tuari tauna goadana,+ ia be hanuaboi ai taunimanima ida do ia noho lasi.
9 Harihari ia be nadi ena matu ta lalonai eiava gabu ma ta ai ia hunia noho.+ Bona bema umui ia tuari henia guna, sivarai idia kamonai taudia be do idia gwau, ‘Abesaloma ena murinai idia raka taudia idia lusi vadaeni!’
10 Bona laiona hegeregerena ia gari lasi tauna*+ be gari dainai do ia manoka, badina Israela taudia ibounai idia diba emu tamana be tau goadana+ bona ia ida idia noho tatau ibounai be gari lasi taudia.
11 Lauegu lalohadai be inai: Israela taudia ibounai be oi dekenai do idia mai, Dano amo ela bona Bere-sieba,+ edia momo be kone ena miri bamona,+ bona tuari dekenai idia oi gunalaia be namo.
12 Bona ia ita davaria gabuna dekenai ia do ita tuari henia, daba paripari be tano ai ia moru hegeregerena. Vadaeni, ia bona ia ida idia noho taudia be do idia roho mauri lasi.
13 Bema siti ta lalonai ia heau vareai, Israela taudia ibounai ese unai siti dekenai kwanau do idia abia lao, bona unai siti do idia veria diho bona laohaia ela bona koura dekenai, nadi ta danu do ia noho lasi.”
14 Bena Abesaloma bona Israela tatau ibounai idia gwau: “Araki tauna Husai ena lalohadai be namo,+ to Ahitopela ena lalohadai be namo lasi!” Badina Iehova be ena lalona ia hadaia vadaeni idia ese Ahitopela ena lalohadai idia badinaia lasi totona,+ unai amo Iehova ese Abesaloma dekenai dika ia mailaia diba.+
15 Gabeai Husai be hahelaga taudia Sadoka bona Abiatara+ dekenai ia gwau: “Ahitopela ese Abesaloma bona Israela ena tau badadia dekenai ia gwauraia lalohadai be inai, bona lau gwauraia lalohadai be inai.
16 Vadaeni karaharaga Davida dekenai hereva umui siaia bona ia umui hadibaia: ‘Hari hanuaboi, taunimanima lasi gabuna ai Ioridane Sinavai ena hanaia gabudia dekenai oi noho lasi, to sinavai oi hanaia, dika king bona ia ida idia noho taudia ibounai idia mase ore.’”+
17 Ionatana+ bona Ahimasa+ be Ene-rogele dekenai idia noho.+ Vadaeni hesiai kekeni ta ia lao bona idia ia hamaoroa, bena idia lao King Davida hadibaia totona, badina idia be siti lalonai idia vareai diba lasi, ta ese idia ia itaia garina.
18 To tau matamata ta ese idia ia itaia bona Abesaloma ia hamaoroa. Vadaeni unai tatau rua idia lao haraga bona Bahurimi ai tau ta ena ruma dekenai idia mai,+ iena ariara ai ranu guri ta ia noho. Bona idia ruaosi be unai ranu guri lalonai idia diho,
19 bona unai tau ena adavana ese ranu guri ena ataiai dabua ta ia atoa bona idia makohia witi uhedia amo ia koua, bona ta be unai ia diba lasi.
20 Abesaloma ena hesiai taudia be hahine ena ruma dekenai idia lao bona idia henanadai: “Ahimasa bona Ionatana be edeseniai?” Unai hahine ia haere: “Idia be idia hanaia vadaeni bona sinavai idia lao henia.”+ Bona unai tatau ese idia rua idia tahua to idia davaria lasi, vadaeni Ierusalema dekenai idia giroa lou.
21 Unai tatau idia lao murinai, idia ruaosi be ranu guri amo idia daekau bona idia lao bona King Davida idia hadibaia. Ia dekenai idia gwau: “Oi toreisi bona karaharaga sinavai ita hanaia, badina Ahitopela ena lalohadai oi totona be inai.”+
22 Maoromaoro Davida bona ia ida idia noho taudia ibounai idia toreisi bona Ioridane idia hanaia. Daba ia rere neganai, idia ibounai be Ioridane idia hanaia vadaeni.
23 Ahitopela ia itaia ena lalohadai idia badinaia lasi neganai, ia be ena doniki ai ia guia bona ena hanua ai ena ruma dekenai ia giroa lou.+ Bona ena ruma bese taudia dekenai hadibaia herevadia ia gwauraia murinai,+ sibona ia tauadae.+ Vadaeni ia mase bona ena sene taudia idia guria gabuna dekenai ia idia guria.
24 Unai nega lalonai, Davida be Mahanaimi dekenai ia lao,+ to Abesaloma be Israela tatau ibounai ida Ioridane idia hanaia.
25 Abesaloma ese Amasa+ ia abia hidi Ioaba ena gabu ia abia bona tuari taudia ia naria,+ Amasa be Israela tauna Itira bona Abigaila edia natuna mero.+ Abigaila be Nahasa ena natuna bona Seruia ena tadina, bona Seruia be Ioaba ena sinana.
26 Israela taudia bona Abesaloma be Gileada tanona ai idia kamepa.+
27 Davida be Mahanaimi dekenai ia ginidae neganai, Nahasa ena natuna Sobi, Amono tanona Raba amo, bona Amiele ena natuna Makiri,+ Lo-debara amo,+ bona Gileada tauna Barasilai,+ Rogelima amo ese ia dekenai
28 mahuta geda, disi, uro, witi, bali, paraoa, gabua bali, bini edia toana idaudia rua, uhe kaukaudia idia mailaia,
29 bona hani, bata, mamoe, bona sisi danu. Oibe, idia ese unai gaudia ibounai idia mailaia Davida bona ia ida idia mai taudia ese idia ania totona,+ badina idia gwau: “Taunimanima be taunimanima momo lasi gabuna ai idia hitolo, idia hesiku, bona idia ranu mase.”+
Futnout
^ Heb., “iena kudouna be laiona ena kudouna bamona.”
