Samuela Iharuana 18:1-33
18 Bena Davida ese ia ida idia noho tatau ia duahidia bona idia totona tuari orea 1,000 ta ta edia gunalaia taudia bona tuari orea 100 ta ta edia gunalaia taudia ia abia hidi.+
2 Bona Davida ese ia ida idia noho tatau be orea toi amo ia siaia: Orea ta be Ioaba+ ese ia gunalaia, bona ta be Ioaba ena tadikaka Abisai+ ese ia gunalaia, ia be Seruia ena natuna,+ bona ma ta be Gata tauna Itai+ ese ia gunalaia. Bena king be unai tatau dekenai ia gwau: “Lau danu be umui ida do lau lao.”
3 To idia gwau: “Namo lasi oi lao,+ badina bema ai heau, idia be ai do idia laloa lasi, bona bema emai orea kahana ta ia mase, idia be ai do idia laloa lasi, badina oi ese tatau 10,000 oi hereaia.+ Unai dainai, namona be heduru totona siti dekenai hereva oi siaia.”
4 King be idia dekenai ia gwau: “Umui dekenai dahaka be namo, do lau badinaia.” Vadaeni king be siti ena geiti badinai ia gini, bona tatau ibounai be orea 100 ta ta bona orea 1,000 ta ta dekenai idia lao.
5 Bena king ese Ioaba, Abisai, bona Itai dekenai inai oda ia henia, ia gwau: “Abesaloma do umui hadikaia lasi, badina ia be egu lalokau natuna.”+ King ese Abesaloma dainai gunalaia taudia ibounai dekenai unai oda ia henia neganai, tatau ibounai ese unai idia kamonai.
6 Vadaeni tatau ibounai idia lao Israela taudia idia tuari henia totona, bona tuari be Eparaima ena uda badana dekenai ia vara.+
7 Unuseniai Davida ena hesiai taudia ese Israela taudia idia halusia,+ bona unai dina ai taunimanima momo herea idia mase, tatau ibounai 20,000.
8 Tuari be tano ibounai dekenai ia hanaia lao. Danu, unai dina ai taunimanima momo herea be uda badana lalonai idia mase, unai namba ese tuari kaia amo idia mase taudia edia namba ia hereaia.
9 Abesaloma be doniki* amo ia lao noho lalonai Davida ena hesiai taudia ia davaridia. Idia ia itaia neganai, ia heau bona au badana ta ena rigi badadia henunai ia lao, ena huina be unai rigi lalonai ia vareai bona ia kamokau, bona ia be au dekenai ia tauadae, to iena doniki be ia heau lao noho.
10 Bena tau ta ese ia vara gauna ia itaia bona Ioaba+ ia hamaoroa, ia gwau: “Lau ese Abesaloma lau itaia, au badana ta dekenai ia tauadae noho.”
11 Ioaba ese unai sivarai ia gwauraia tauna dekenai ia gwau: “Bema unai oi itaia, dahaka dainai unai nega ai ia oi alaia lasi? Bena lau ese mai moale ida oi dekenai siliva moni 10 bona beleta ta do lau henia.”
12 To unai tau be Ioaba dekenai ia gwau: “Ena be lau dekenai siliva moni 1,000 idia henia, to lau ese egu imana be king ena natuna latanai do lau atoa lasi, badina king ese oi, Abisai, bona Itai ia oda henia neganai, ai ese unai ai kamonai, ia gwau, ‘Namo lasi tau ta ese Abesaloma ia hamasea.’+
13 Bema unai oda lau badinaia lasi bona ena natuna ena mauri* lau kokia, king be unai sivarai do ia kamonai, bona oi ese lau do oi gimaia lasi.”
14 Unai neganai Ioaba ia gwau: “Lau be oi dekenai egu nega do lau haorea kava lasi!” Vadaeni ia ese ikoko badadia toi ia abia bona Abesaloma dekenai ia lao, unai nega ai ia be au dekenai ia tauadae noho lalonai, Ioaba ese unai ikoko badadia amo ena kudouna ia gwadaia.
15 Bena Ioaba ena tuari kohu idia huaia hesiai taudia 10 idia mai bona edia tuari gaudia amo Abesaloma idia botaia ela bona ia mase.+
16 Vadaeni Ioaba ese kibi ia hiriria, bona tuari taudia ese Israela taudia idia lulua noho lasi, to idia giroa lou. Unai dala amo Ioaba ese tuari ia hadokoa.
17 Idia ese Abesaloma idia abia bona uda badana ena guri badana ta lalonai idia negea diho, bona ena ataiai nadi momo herea idia haboua.+ Bona Israela taudia ibounai be edia noho gabudia dekenai idia heau lao.
18 Abesaloma be ia mauri noho neganai, ia ese nadi ta ia abia bona King Kourana+ dekenai ia sibona totona ia haginia, badina ia gwau: “Lau dekenai natuna mero ta be lasi egu ladana ia abia hanai totona.”+ Vadaeni ia ese unai nadi dekenai sibona ena ladana ia hatoa, bona unai nadi idia gwauraia Abesaloma Ena Nadi ema bona hari.
19 Sadoka ena natuna Ahimasa,+ ia gwau: “Mani lau heau lao, bona king dekenai inai sivarai lau gwauraia, badina Iehova ese king be ena inai taudia amo ia hamauria neganai, ia ese hahemaoro goevana ia karaia.”+
20 To Ioaba be ia dekenai ia gwau: “Inai dina ai oi be sivarai do oi laohaia lasi. To nega ma ta ai sivarai do oi gwauraia, to hari sivaraina do oi gwauraia lasi, badina king ena natuna korikori be ia mase vadaeni.”+
21 Bena Ioaba be Kusu tauna dekenai ia gwau:+ “Oi lao, bona oi itaia gauna be king dekenai do oi gwauraia.” Unai neganai Kusu tauna be Ioaba dekenai ia tui diho bena ia heau lao.
22 Sadoka ena natuna Ahimasa be Ioaba dekenai ia hereva lou, ia gwau: “Herevana dahaka do ia vara, mani Kusu tauna murinai lau heau lao danu.” To Ioaba ia gwau: “Lauegu natuna e, dahaka dainai do oi heau lao, bema sivarai ta be lasi oi gwauraia totona?”
23 To ma ia gwau: “Herevana dahaka ia vara, mani lau heau lao.” Vadaeni Ioaba be ia dekenai ia gwau: “Oi heau lao!” Bona Ahimasa be Ioridane ena distrik ia lao henia dalana amo ia heau lao, bena Kusu tauna ia hanaia.
24 Davida be siti ena geiti rua edia huanai ia helai noho,+ bona gima tauna+ be magu ena ataiai ia daekau lao. Ia roha lao bona ia itaia tau ta be sibona ia heau mai noho.
25 Vadaeni gima tauna ia boiboi lao bona king ia hamaoroa. Bona king ia gwau: “Bema ia be sibona, ia be lau dekenai sivarai ta ia mailaia noho.” Unai tauna be ia mai kahirakahira neganai,
26 gima tauna ese tau ma ta ia itaia ia heau mai noho. Bena gima tauna be geiti naria tauna dekenai ia boiboi, ia gwau: “Itaia, tau ma ta be sibona ia heau mai noho!” King ia gwau: “Inai tauna danu be sivarai ia mailaia noho.”
27 Gima tauna ia gwau: “Lau itaia ia heau mai guna tauna be Sadoka ena natuna Ahimasa bamona,”+ vadaeni king ia gwau: “Ia be tau namona, bona sivarai namona ia mailaia noho.”
28 Bena Ahimasa be king dekenai ia boiboi lao, ia gwau: “Gau ibounai idia namo!” Unai murinai king dekenai ia tui diho bona ena vairana be tano dekenai ia atoa diho. Bena ia gwau: “Namona be Iehova emu Dirava ita hanamoa, ia ese egu lohia bona king dekenai idia gwau-edeede taudia ia henia hanai vadaeni!”+
29 To king ia gwau: “Lauegu natuna Abesaloma ia namo, a?” Unai neganai Ahimasa ia gwau: “Ioaba ese king ena hesiai tauna bona lau danu* ia siaia neganai, taunimanima idia haboua bona edia regerege bada lau kamonai, to ia vara gauna lau diba lasi.”+
30 Vadaeni king ia gwau: “Oi raka siri, bona iniseni oi gini.” Unai neganai ia raka siri bona unuseni ia gini.
31 Bena Kusu tauna ia ginidae,+ bona ia gwau: “Mani egu lohia bona king ese inai sivarai ia abia dae: Iehova ese hari dina oi idia gwau-edeede henia taudia edia imana amo oi ia hamauria, unai amo ia ese hahemaoro goevana ia mailaia.”+
32 To king be Kusu tauna dekenai ia gwau: “Lauegu natuna Abesaloma ia namo, a?” Unai neganai Kusu tauna ia gwau: “Namona be egu lohia bona king ena inai taudia ibounai bona oi hadikaia totona idia gwau-edeede taudia ibounai be inai tau matamata bamona do idia mase!”+
33 Unai hereva ese king ena lalona ia hahisia bada, vadaeni ataiai daiutuna dekenai ia daekau lao bona ia tai dikadika, mai herevahereva ida ia raka ia gwau: “Egu natuna Abesaloma e, egu natuna, egu natuna Abesaloma! Bema lau mase be namo, to oi lasi, egu natuna Abesaloma, egu natuna!”+
