Samuela Iharuana 2:1-32
2 Unai murinai Davida ese Iehova ia nanadaia,+ ia gwau: “Iuda ena siti ta dekenai lau daekau lao be namo, a?” Iehova be ia dekenai ia gwau: “Oi daekau lao.” Bena Davida ia henanadai: “Edena siti dekenai do lau lao?” Ia haere: “Heberona dekenai.”+
2 Vadaeni Davida be ena adavana rua danu unuseni idia daekau lao, Ieserele hahinena Ahinoama,+ bona Abigaila,+ Karamele tauna Nabala ena vabu.
3 Davida ese ia ida idia noho tatau bona edia ruma bese ia abidia lao danu,+ bona Heberona badibadinai idia noho siti dekenai idia noho.
4 Bena Iuda tatau idia mai, bona unuseniai Davida idia horoa bona ia be Iuda besena ena king ai idia halaoa.+
Idia ese Davida idia hamaoroa: “Iabese-gileada taudia ese Saulo idia guria.”
5 Vadaeni Davida ese gwaukau taudia be Iabese-gileada dekenai ia siaidia bona idia dekenai ia gwau: “Namona be Iehova ese umui ia hanamoa, badina emui lohia Saulo umui guria neganai, ia dekenai lalokau* umui hahedinaraia.+
6 Namona be Iehova ese umui dekenai lalokau* bona kara namo ia hahedinaraia. Umui ese unai bamona umui karaia dainai, lau ese umui dekenai hebogahisi do lau hahedinaraia danu.+
7 Vadaeni namona be umui boga-auka bona gari lasi, badina emui lohia Saulo be ia mase vadaeni, bona Iuda besena ese lau idia horoa edia king ai lau lao totona.”
8 To Nere ena natuna Abinere,+ Saulo ena tuari oreana ena biaguna, ese Saulo ena natuna Isi-boseta+ ia abia bona Mahanaimi dekenai idia hanaia lao,+
9 bona Gileada,+ Asurite taudia, Ieserele,+ Eparaima,+ Beniamina, bona Israela ibounai ena king ai ia halaoa.
10 Saulo ena natuna Isi-boseta be Israela ena king ai ia lao neganai, ena mauri lagani be 40, bona ia be lagani rua ia lohia. To Iuda besena be Davida ena kahanai idia gini.+
11 Davida be lagani 7 bona hua 6 Heberona ai Iuda besena ia lohiaia.+
12 Gabeai Nere ena natuna Abinere bona Saulo ena natuna Isi-boseta ena hesiai taudia be Mahanaimi+ amo Gibeona dekenai idia lao.+
13 Bona Seruia+ ena natuna Ioaba+ bona Davida ena hesiai taudia danu idia lao bona Gibeona ena gohu dekenai idia hedavari. Bona orea ta be gohu ena kahana ta dekenai ia helai, bona orea ma ta be gohu ena kahana ma ta dekenai ia helai.
14 Bena Abinere be Ioaba dekenai ia gwau: “Namona be tatau matamata idia toreisi, bona iseda vairanai idia heatu.” Unai neganai Ioaba ia gwau: “Idia toreisi be namo.”
15 Vadaeni idia toreisi bona Saulo ena natuna Isi-boseta ena orea amo Beniamina tatau 12 idia abia hidi, bona Davida ena hesiai taudia amo tatau 12 idia abia hidi, idia heatu totona.
16 Idia be ta ta edia kwarana idia dogoatao, bona ta ta edia ohena be tuari kaia amo idia gwadaia, bona idia ibounai be nega tamona idia moru diho. Vadaeni Heberona ai, unai gabu ena ladana idia hatoa, Helkata-hasurim.
17 Unai murinai ia vara tuari be ia bada momokani unai dina ai, bona dokonai Davida ena hesiai taudia ese Abinere bona Israela tatau idia halusia.
18 Seruia ena natudia toi+ danu be unuseniai, idia be Ioaba,+ Abisai,+ bona Asahele.+ Asahele be heau haraga tauna, uda dia bamona.
19 Asahele be Abinere murinai ia heau lao, bona ia laga-ani lasi to Abinere ia badinaia noho.
20 Abinere ia giroa bona ena murina ia itaia neganai, ia henanadai, “Asahele e, inai be oi, a?” Bena ia haere, “Oibe, inai be lau.”
21 Bena Abinere be ia dekenai ia gwau: “Lau oi lulua noho lasi, to inai tau matamata ta oi dogoatao bona ia dekenai idia noho gaudia oi abia.” To Asahele ese Abinere ia lulua noho.
22 Vadaeni Abinere be Asahele dekenai ma ia gwau: “Lau oi lulua noho lasi. Oi ura oi lau alaia mase, a? Bema oi lau alaia, oiemu tadikaka Ioaba ena vairanai do lau hemarai.”
23 To Asahele ia ura lasi, vadaeni Abinere ese io amo Asahele ena bogana ia gwadaia,+ bona io be ena doruna amo ia raka-lasi, bona unuseni ia moru bona maoromaoro ia mase. Asahele ia moru bona ia mase gabuna dekenai idia mai taudia ibounai be nega sisina unuseni idia gini.
24 Bena Ioaba bona Abisai be Abinere idia tahua totona idia lao. Dina ia diho noho lalonai, idia be Ama ororona dekenai idia ginidae, unai ororo be Gia tano ia vaira henia bona Gibeona ena taunimanima momo lasi gabuna ia lao henia dalana ai ia noho.
25 Bona Beniamina taudia be Abinere ena murinai idia gini hebou bona orea ta idia karaia, bena ororo ta ataiai idia gini.
26 Bena Abinere ese Ioaba ia boiboi henia, ia gwau: “Tuari kaia amo ta ta do umui tuari henia ela bona edena nega? Oi diba lasi inai tuari ese inai heheni karana do ia havaraia, a? Edena negai emu taunimanima do oi hamaoroa edia tadikaka do idia tuari henidia lasi?”
27 Vadaeni Ioaba ia gwau: “Ia mauri noho Dirava momokanina ena ladanai oi lau hamaoroa momokani, bema unai bamona oi hereva lasi, egu taunimanima ese edia tadikaka do idia lulua lao ela bona daba ia rere.”
28 Unai neganai Ioaba ese kibi ia hiriria, bona iena tatau ese Israela taudia idia luludia noho lasi, bona tuari ia doko.
29 Bena unai hanuaboi ibounai lalonai Abinere bona ena tatau be Arabaha+ tanona idia raka hanaia, bona Ioridane ena kahana ma ta dekenai idia lao. Bena koura idia raka hanaia bona Mahanaimi dekenai idia ginidae.+
30 Ioaba be Abinere ia lulua lao murinai ia giroa lou, bona taunimanima ibounai ia haboudia. Bona ia davaria Davida ena hesiai taudia 19 be idia noho lasi, bona Asahele danu.
31 To Davida ena hesiai taudia ese Beniamina taudia bona Abinere ena tatau idia halusidia, bona edia tatau 360 be idia mase vadaeni.
32 Vadaeni Asahele+ idia abia bona ena tamana ena guria gabuna ai idia guria, unai be Betelehema ai.+ Bena Ioaba bona ena tatau be hanuaboi ibounai lalonai idia raka, bona daba ia rere neganai, Heberona dekenai idia ginidae.+
