Samuela Iharuana 21:1-22
21 Davida ena nega lalonai hitolo bada ia vara,+ bona ia doko lasi ela bona lagani toi idia ore, bena Davida ese Iehova ia noinoi henia, bona Iehova ia gwau: “Saulo bona ena bese taudia be rara dekenai idia kerere, badina ia ese Gibeona taudia ia hamasea.”+
2 Vadaeni king ese Gibeona taudia+ ia boiria bona ia hereva henidia. (Gibeona taudia be Israela taudia lasi, to idia be Amoro taudia+ bona Israela taudia huanai idia noho. Bona Israela taudia idia gwauhamata idia do idia hamasea lasi,+ to Saulo ia ura idia ia hamasea, badina ia ura lasi idia be Israela bona Iuda taudia huanai idia noho.)
3 Davida be Gibeona taudia dekenai ia gwau: “Umui totona dahaka do lau karaia? Bona edena dala ai kara dika davana karaia boubouna lau henia diba, unai amo umui ese Iehova ena taunimanima do umui lalonamo henia?”
4 Gibeona taudia be ia dekenai idia gwau: “Saulo bona ena ruma bese taudia ese ai dekenai idia karaia karana ena davana be siliva eiava golo amo idia haloua diba lasi,+ bona ai ese Israela ai tau ta do ai hamasea lasi.” Unai neganai Davida ia gwau: “Umui gwauraia gauna be umui totona do lau karaia.”
5 Idia be king dekenai idia gwau: “Unai tauna ia ura ai ia hamasea ore bona palani ia karaia ai ta be Israela ena gabu ta ai do ai mauri lasi,+
6 namona be ena bese taudia 7 be ai dekenai oi henia. Ai ese edia mase tauanidia be Iehova ena vairanai do ai tauadae,+ Iehova ena abia hidi tauna Saulo+ ena siti ai, unai be Gibea dekenai.”+ Bena king ia gwau: “Idia be umui dekenai do lau henia.”
7 To Davida bona Ionatana ese Iehova ena ladanai idia karaia gwauhamata metauna dainai,+ king ese Ionatana ena natuna Mefiboseta ia hebogahisi henia.+ Mefiboseta be Saulo ena tubuna mero.
8 Vadaeni king ese Aia ena natuna kekeni Risipa ena natudia memero rua,+ Aramoni bona Mefiboseta ia abidia, Saulo amo ia havaraia natudia unai, bona Saulo ena natuna kekeni Mikala*+ ena natudia memero 5 ia abidia, edia tamana be Adariele.+ Ia be Mehola tauna Barasilai ena natuna.
9 Bena idia be Gibeona taudia dekenai ia henidia, bona idia ese edia mase tauanidia be ororo ai idia tauadae, Iehova ena vairanai.+ Idia ibounai 7 idia mase hebou. Idia be uma ena anina haboua dina ginigunadia ai idia hamasea, unai be bali gogoa matamaia negana ai.
10 Bena Aia ena natuna Risipa+ ese puse dabua ia abia bona nadi latanai ia atoa, uma ena anina haboua matamaia negana amo ela bona guba amo medu be unai mase tauanidia latanai ia moru dinana ai. Ia ese dina ai guba manudia ia koua edia latanai idia helai lasi totona, bona hanuaboi ai dagedage animal ia koudia idia kahirakahira idia mai lasi totona.
11 Haida ese Aia ena natuna Risipa ia karaia karana be Davida dekenai idia gwauraia.
12 Vadaeni Davida ia lao bona Iabese-gileada ena gunalaia taudia amo Saulo bona ena natuna Ionatana edia turia ia abidia.+ Iabese-gileada taudia ese idia ruaosi edia turia be Bete-sana ena ariara gabuna amo idia henaoa, guna Filistia taudia ese Gileboa ai Saulo idia hamasea dinana ai, idia ruaosi edia tauanina be unuseniai idia tauadae.+
13 Ia ese Saulo bona ena natuna Ionatana edia turia be unuseni amo ia mailaia, bona idia hamasea tatau edia turia danu idia haboudia.+
14 Bena idia ese Saulo bona ena natuna Ionatana edia turia be Saulo ena tamana Kisa+ ena guria gabuna ai idia guridia, unai be Beniamina tanona, Sela dekenai.+ King ena oda hegeregerena gau ibounai idia karaia murinai, Dirava ese edia noinoi tano totona ia kamonaia.+
15 Nega ma ta ai Filistia taudia bona Israela taudia huanai tuari ia vara lou.+ Bena Davida bona ena hesiai taudia idia diho lao bona Filistia taudia idia tuari henia, to Davida ena goada ia ore.
16 Repaima ena bese tauna ta+ ena ladana be Isibi-benopa, iena io, kopa amo idia karaia gauna unai, ena metau be 300 sikel*+ bona ia be mai ena tuari kaia matamatana, bona ia ura Davida ia hamasea.
17 Maoromaoro Seruia ena natuna, Abisai,+ be Davida ia durua+ bona unai Filistia tauna ia hamasea. Unai nega ai Davida ena tatau be ia dekenai inai gwauhamata metauna idia karaia, idia gwau: “Namo lasi ai ida tuari dekenai do oi lao lou!+ Namo lasi Israela ena lamepa oi habodoa!”+
18 Unai murinai, Goba dekenai Israela taudia be Filistia taudia ida idia tuari lou.+ Unai nega ai Husa tauna Sibekai+ ese Sapa ia hamasea. Sapa be Repaima ena bese tauna ta.+
19 Bona Goba dekenai Israela taudia bona Filistia taudia+ ma idia tuari lou, bona Betelehema tauna Iare-oregimi ena natuna mero Elehanana ese Gata tauna Goliata ia hamasea. Goliata ena io be bada herea.*+
20 Gata dekenai tuari ma ia vara lou, unuseniai tau badana ta ia noho, iena imana ta ta edia kwakikwaki be 6 bona ena aena ta ta edia kwakikwaki be 6, ibounai be 24. Bona ia danu be Repaima ena bese tauna ta.+
21 Ia ese Israela taudia ia hevasehalaia noho.+ Vadaeni Simei+ ena natuna Ionatana ese ia hamasea. Simei be Davida ena tadikaka.
22 Unai tatau 4 be Repaima ena bese taudia, Gata dekenai, bona idia be Davida bona ena hesiai taudia ese idia hamasedia.+
Futnout
^ Eiava reana, “Meraba.”
^ Heberu toretore ai inai ia noho danu: “Io ena dogoatao auna be turituri taudia edia au hegeregerena.”
