Samuela Iharuana 22:1-51
22 Iehova ese Davida be ena inai taudia ibounai bona Saulo ena imana amo ia hamauria dinana ai,+ ia ese Iehova dekenai inai ane herevadia ia gwauraia.+
2 Ia gwau:
“Iehova e, oi be egu nadi badana bona egu magu aukana,+ bona lau oi hamauria Diravana.+
3 Lauegu Dirava be lauegu nadi badana,+ ia be egu heau mauri gabuna,Ia be egu kesi+ bona lau ia hamauria* doana,* bona egu heau mauri gabuna goadana*+Bona egu hunia gabuna,+ egu hamauria tauna.+ Oi ese dagedage taudia amo lau oi hamauria.
4 Iehova, hanamoa ia abia be maoro Diravana, lau boiboi henia,Bona egu inai taudia amo lau ia hamauria.
5 Mase ia havaraia hurehure ese lau idia koua hagegea,+Anina lasi tatau be abata bamona, lau idia hagaria bada.+
6 Mase Gurina* ena varo ese lau idia hagegea,+Mase tarapudia be lau vairanai idia noho.+
7 Egu lalometau lalonai Iehova dekenai lau boiboi,+Egu Dirava dekenai lau boiboi noho.
Bena ena dubu helaga amo egu gadona ia kamonai,Bona heduru totona lau taitai neganai, ia kamonai.+
8 Tanobada be ia marere lao mai matamaia.+Guba ena badina idia mareremarere+Bona Dirava ia badu dainai idia marere lao mai.+
9 Kwalahu be ena udu baubau amo ia daekau,Bona lahi be ena uduna amo ia raka-lasi bona gau ibounai ia araia ore,+Idia hururu lahi gida be ia amo idia mai.
10 Ia be guba amo ia diho neganai, guba be ia diho bamona,+Bona ori koremadia be ena aena henunai idia noho.+
11 Ia be kerubi latanai ia guia+ bona ia roho diho.
Ia be aneru* ena apena amo ia roho mai.+
12 Bena ia ese dibura be palai bamona ia sibona ia koua hagegea,+Dibura lalonai ranu koremadia bona ori badadia idia noho.
13 Dirava ena vaira kahanai ia hedinarai diari amo lahi gida mai siahuna idia mai.
14 Bena Iehova ia hereva, guba boiboi ia vara,+Ataiai Momokani Diravana ena gadona idia kamonai.+
15 Ia ese ena diba ia pidia lao+ noho bona ena inai taudia be gabu idauidau dekenai idia heau lao.Bona kevaru ia siaia bona idia dekenai daradara ia havaraia.+
16 Davara henunai ia noho tano be ia hedinarai,+Iehova ena hereva aukana dainai tanobada ena badina idia hedinarai,Oibe, ena udu baubau amo ia raka-lasi laga ese tanobada ena badina ia hahedinaraia.+
17 Ia be ataiai amo ena imana ia atoa diho,Bona lau ia dogoatao bona ranu ena dobu gabudia amo ia veria daekau.+
18 Ia ese egu inai tauna goadana amo lau ia hamauria,+Lau idia inai henia taudia edia goada ese egu goada ia hereaia, to ia ese idia amo lau ia hamauria.
19 Dika lau davaria dinana ai, idia be lau idia tuari henia,+To Iehova ese lau ia durua.
20 Ia ese gabu namona dekenai lau ia hakaua lao.+
Ia ese lau ia hamauria badina lau dekenai ia moale.+
21 Iehova ese egu kara maoromaoro hegeregerena, lau dekenai ahuna ia henia.+
Ia ese lau dekenai davana namona ia henia, badina lau be kerere lasi.*+
22 Badina lau ese Iehova ena dala lau badinaia noho,Bona Dirava rakatania karana be kara dikana dainai, lau be Dirava lau rakatania lasi.
23 Iena hahemaoro karadia ibounai+ be lau vairanai idia noho,Lau be iena taravatu amo do lau raka siri lasi.+
24 Mai maoromaoro ida ia vairanai do lau noho,+Bona kerere do lau karaia lasi.+
25 Egu kara maoromaoro hegeregerena, namona be Iehova ese lau dekenai ahuna ia henia,+Bona iena vairanai lau kerere lasi, unai hegeregerena ahuna ia henia.+
26 Oi idia badinaia taudia be oi rakatania lasi.+Oi ese kerere lasi tauna goadana be mai maoromaoro ida oi kara henia.+
27 Oi ese ia goeva noho tauna do oi hanamoa,+To kara gageva tauna be ena kara hegeregerena davana do oi henia.+
28 Oi ese manau taudia oi hamauria,+To hekokoroku taudia oi dadaraia bona idia oi atoa diho.+
29 Badina Iehova e, oi be egu lamepa,+Iehova ese lau ia hagegea dibura ia hadiaria.+
30 Emu heduru amo dadidadi taudia lau tuari henia diba,Bona Dirava ena siahu amo magu ta lau roho hanaia diba.+
31 Dirava momokani ena dala be goevadae.+
Iehova ena hereva be goeva momokani.+
Ia be ia amo heduru idia tahua taudia ibounai edia kesi.+
32 Dirava ma ta ia noho lasi, Iehova sibona, ani?+
Bona iseda Dirava sibona be iseda nadi badana, ani?+
33 Dirava momokani be egu magu goadana,+Bona ia ese egu dala do ia hamaoromaoroa.+
34 Ia ese egu aena be dia edia aena hegeregerena ai ia halaoa.
Ia ese ataiai gabudia dekenai lau ia haginia.+
35 Ia ese tuari totona egu imana ia treinia,Egu imana amo kopa peva lau veria diba.
36 Oi ese lau dekenai kesi oi henia, lau oi hamauria totona,Bona emu manau karana dainai ladana bada lau abia.+
37 Oi ese egu aena atoa gabudia edia dala oi habadaia,Unai amo egu aena do idia dedi lasi.+
38 Lau ese egu inai taudia do lau lulua lao bona hadikaia ore,Do lau giroa lou lasi ela bona idia ibounai lau haorea.
39 Bona lau ese idia do lau haorea bona moia diho, unai amo do idia toreisi lasi,+Idia be egu aena henunai do idia moru.
40 Oi ese lau dekenai goada do oi henia lau tuari totona,+Oi dainai egu inai taudia be lau vairanai do idia moru.+
41 Oi dainai egu inai taudia be lau amo do idia heau siri,+Lau idia inai henia taudia be do lau hadikaia ore.+
42 Idia be heduru totona do idia boiboi, to ta ia noho lasi idia ia hamauria totona,Iehova dekenai idia boiboi danu, to idia ia haere henia lasi.+
43 Lau ese idia do lau moia patapata ela bona tano ena kahu bamona ai do idia lao,Bona lau ese idia do lau moia diho, dala ai ia noho kopukopu bamona.
44 Taunimanima edia maumau karana amo lau do oi hamauria.+
Oi ese lau do oi gimaia, bese momo edia gunalaia tauna ai lau lao totona.+
Lau diba lasi taudia ese lau do idia hesiai henia.+
45 Idau tano taudia be mai gari ida lau dekenai do idia mai,+Lauegu sivarai dainai idia ese lau do idia kamonai henia.
46 Idau tano taudia edia lalona do ia manoka,Idia be edia magu aukadia amo mai heudeheude ida do idia mai.
47 Iehova be ia mauri noho! Egu Nadi Badana hanamoa!+
Namona be egu Dirava, lau ia hamauria nadi badana hanamoa.+
48 Dirava momokani ese lau dekenai dika idia karaia taudia edia davana ia henia,+Ia ese taunimanima be egu siahu henunai ia atoa.+
49 Ia ese egu inai taudia amo lau ia hamauria.
Lau idia tuari henia taudia ataiai lau oi abia isi,+Oi ese dagedage tauna amo lau oi hamauria.+
50 Unai dainai Iehova e, bese momo edia huanai oi do lau tanikiu henia,+Bona emu ladana dekenai hanamoa anedia do lau abia:*+
51 Ia ese kara badadia* ia karaia dainai, ena king ia kwalimu noho,+Ia ese ena horoa tauna dekenai lalokau* ia hahedinaraia,Oibe, Davida bona ena bese dekenai lalokau do ia hahedinaraia ela bona hanaihanai.”+
Futnout
^ Eiava “egu hamauria tauna goadana.”
^ Eiava “kohoro goadana.”
^ Eiava “lai.”
^ Heb., “goeva.”
^ Eiava “miusiki lau karaia.”
^ Eiava “kwalimu kara badadia.”
