Samuela Iharuana 23:1-39
23 Davida ena hereva dokona be inai:+
“Iese ena natuna Davida+ ena hereva,Ataiai dekenai idia abia isi tauna ena hereva,+Ia be Iakobo ena Dirava ese ia horoa tauna,+Ia be Israela taudia edia ane abia namonamo tauna.+
2 Iehova ena lauma be lau amo ia hereva.+Iena hereva be egu malana dekenai ia noho.+
3 Israela ena Dirava ia hereva,Oibe, Israela ena Nadi Badana+ be lau dekenai ia gwau:
‘Taunimanima ia lohiaia tauna ia kara maoromaoro,+Bona Dirava ia gari henia neganai,+
4 Iena lohia dalana be daba ena diari bamona,+Oibe, daba negana ai ori idia noho lasi bamona.
Iena lohia dalana be medu ia ore murinai ia hedinarai diarina bamona,Bona tano amo rei ia hatubua bamona.’+
5 Dirava vairanai egu bese taudia be unai bamona, ani?
Badina ia be lau ida noho hanaihanai gwaubou ia karaia,+Ena hereva ibounai idia torea namonamo bona do idia vara momokani.
Badina unai ena anina be do lau mauri bona do lau moale,Unai dainai ena bese taudia do ia habadaia, ani?+
6 To anina lasi taudia ibounai be au ginigini bamona idia negedia boio,+Badina ta ese idia be iena imana dekenai ia dogoatao diba lasi.
7 Tau ta ese idia ia dogoatao neganai,Ia dekenai auri gauna bona io ta idia noho be namo,Bona namona be lahi ese idia ia gabua ore momokani.”
8 Davida ena tuari taudia goadadia edia ladana be inai:+ Ioseba-basebeta, ia be Hakamoni tauna bona ia be unai taudia toi edia kwarana.+ Nega ta, ia ese ena io ia gaukaralaia tatau 800 ia hamasea totona.
9 Nega ta Filistia taudia be Israela taudia tuari henia totona idia haboua neganai, Davida ida idia noho tuari taudia goadadia toi ese Filistia taudia idia kirikirilaia. Ahohi bese tauna Dodo ena natuna+ Eleasara be idia ta.+ Unai nega ai Israela tatau idia heau.
10 To Eleasara be ena gabu ai ia gini bona Filistia taudia ia hamasea noho ela bona ena imana ia hesiku, to ia ese tuari kaia ia dogoatao noho.+ Vadaeni Iehova ese unai dina ai idia ia hamauria.+ Bona Israela tuari taudia idia giroa lou mase taudia edia kohu idia abia totona.
11 Eleasara ena badinai be Samaha ia gini, ia be Harari tauna Age ena natuna. Filistia taudia be Lehi dekenai idia haboua, unuseniai bini idauidau amo ia honu tano ta ia noho. Bona Israela tuari taudia be Filistia taudia dainai idia heau.
12 To Harari tauna be uma ena huanai ia gini bona unai gabu ia gimaia bona Filistia taudia ia hamasea noho, unai amo Iehova ese idia ia hamauria.+
13 Uma ena anina gogoa negana ai, gunalaia taudia 30 amo tatau toi be Davida dekenai idia diho lao, unai be Adulama ena kohua ai,+ bona Filistia taudia edia tuari oreana ta be Repaima Kourana ai ia kamepa.+
14 Davida be hunia gabuna ta dekenai ia noho,+ bona Filistia taudia edia tuari kamepa ta be Betelehema ai ia noho.
15 Bena Davida ia gwau: “Bema Betelehema ena geiti badinai ia noho ranu guri* amo ranu lau inua be namo!”
16 Unai nega ai, tuari taudia goadadia toi be Filistia taudia edia kamepa dekenai idia lao bona Betelehema ena geiti badinai ia noho ranu guri amo ranu idia abia bona Davida dekenai idia mailaia. To ia ura lasi unai ranu ia inua bona Iehova vairanai ia bubua diho.+
17 Ia gwau: “Iehova e, lau be inai ranu do lau inua diba lasi! Unai tatau be unuseni idia lao karana amo edia mauri idia haboioa diba, bona lau ese edia rarana do lau inua, a?”+ Unai dainai ia ura lasi unai ranu ia inua. Unai be ena tuari tatau goadadia toi ese idia karaia gaudia.
18 Abisai+ be Ioaba ena tadikaka bona Seruia ena natuna,+ bona ia be tuari tatau ma toi edia gunalaia tauna. Nega ta, ia ese ena io ia gaukaralaia tatau 300 ia hamasea totona, bona ia be tuari taudia goadadia toi hegeregerena.+
19 Ena be tuari taudia ma toi amo ia be mai ena ladana bada bona ia be edia gunalaia tauna, to ia ese tuari tatau goadadia toi edia dagi ia abia lasi.
20 Iehoiada ena natuna Benaia+ be gari lasi tauna, bona ia be Kabisele+ dekenai gau momo ia karaia. Ia ese Moaba tauna Ariele ena natudia memero rua ia hamasea, bona sinou bada dinana ai ranu guri lalonai ia diho bona laiona ta ia alaia mase.+
21 Danu ia ese Aigupito tau bada hereana ta ia hamasea. Ena be unai Aigupito tauna ena imana dekenai io ta ia noho, to Benaia ese au ta amo unai Aigupito tauna ia tuari henia bona ena imana amo io ia kokia bona sibona ena io amo unai tauna ia hamasea.
22 Iehoiada ena natuna Benaia ese unai gaudia ia karaia, bona ia be tuari taudia goadadia toi hegeregerena.
23 Ena be unai gunalaia taudia 30 amo ia be ladana bada tauna, to ia ese tuari taudia goadadia toi edia dagi ia abia lasi. To Davida ese ia ia abia hidi iena gima tauna ta ai ia lao totona.
24 Ioaba ena tadikaka, Asahele,+ be unai gunalaia taudia 30 edia orea tauna ta. Unai tatau goadadia haida be inai: Betelehema tauna Dodo ena natuna Elehanana,+
25 Haroda taudia Samaha bona Elika,
26 Pelete tauna Helese,+ Tekoa tauna Ikese ena natuna Ira,+
27 Anatoto tauna Abiesere,+ Husa tauna Mebunai,
28 Ahohi tauna Salamoni, Netopa tauna Maharai,+
29 Netopa tauna Banaha ena natuna mero Helebe, bona Itai, ia be Ribai ena natuna. Ribai be Beniamina taudia edia hanua Gibea amo,
30 Piratono tauna Benaia,+ Gaso kourana amo ia mai tauna Hidai,+
31 Arabaha tauna Abialabono, Bahurimi tauna Asamavete,
32 Salabima tauna Eliahaba, Iasene ena natudia memero, Ionatana,
33 Harari tauna Samaha, bona Harari tauna Sarara ena natuna Ahiama,
34 Elipelete, ia be Ahasabai ena natuna, Ahasabai ena tamana be Makata tauna, bona Gilo tauna Ahitopela+ ena natuna Eliama,
35 Karamele tauna Hesero, Arabia tauna Parai,
36 Soba amo ia mai tauna Natana ena natuna Igala, Gado tauna Bani,
37 Amono tauna Sekele, Beroto tauna Naharai, ia be Seruia ena natuna Ioaba ena tuari kohu huaia tauna,
38 Itiri taudia Ira bona Gareba,+
39 bona Hiti tauna Uria,+ idia ibounai be 37.
