Samuela Iharuana 3:1-39
3 Saulo ena bese bona Davida ena bese huanai tuari ia do noho. Bona Davida be ia goada ia lao noho,+ to Saulo ena bese taudia edia goada ia ore ia lao noho.+
2 Unai nega lalonai, Heberona ai Davida amo natudia memero idia vara.+ Ena vara guna natuna be Aminona,+ ia be Ieserele hahinena Ahinoama+ ese ia havaraia.
3 Iena natuna iharuana be Kilea, ia be Abigaila ese ia havaraia,+ Abigaila be Karamele tauna Nabala ena vabu. Bona ihatoina be Abesaloma,+ ia be Maka ese ia havaraia, Maka be Gesuru ena king, Talamai ena natuna kekeni.+
4 Namba 4 be Adonaisa,+ ia be Hagiti ese ia havaraia, bona namba 5 be Sepataia, ia be Abitala ese ia havaraia.
5 Namba 6 be Itireama, ia be Davida ena adavana Egila ese ia havaraia. Davida be Heberona ai ia noho neganai, unai natudia memero idia vara.
6 Saulo ena bese bona Davida ena bese huanai tuari ia do noho lalonai, Saulo ena ruma bese lalonai Abinere+ ena siahu ia bada ia lao noho.
7 Vadaeni Saulo ena hahine ma ta* ena ladana be Risipa,+ ia be Aia ena natuna kekeni. Gabeai Isi-boseta+ be Abinere dekenai ia gwau: “Dahaka dainai oi be egu tamana ena hahine ida oi mahuta hebou?”+
8 Abinere be Isi-boseta ena hereva dekenai ia badu dikadika bona ia gwau: “Lau be Iuda sisiana ta, a? Ema bona hari dina, lau ese oiemu tamana Saulo ena ruma bese taudia bona ena tadikakadia bona ena turadia dekenai lalokau* lau hahedinaraia, bona Davida ena imana dekenai oi lau atoa lasi. To hari dina hahine ta dainai, oi ura egu kara ena anina lau gwauraia hedinarai.
9 Dirava ese lau, Abinere, do ia panisia, oibe, Dirava ese lau dekenai panisi metauna ia henia, bema Iehova ese Davida dekenai ia gwauhamatalaia gauna lau karaia lasi, gauna be inai:+
10 Saulo ena bese amo basileia do ia kokia bona Davida dekenai do ia henia hanai, bona ia ese Israela bona Iuda do ia lohiaia, Dano amo ela bona Bere-sieba dekenai.”+
11 Isi-boseta ese hereva ma ta ia gwauraia lasi Abinere ia haere henia totona, badina ia be ia dainai ia gari.+
12 Abinere ese maoromaoro gwaukau taudia be Davida dekenai ia siaia, ia gwau: “Tano be daika ena?” Ma ia gwau: “Lau ida gwaubou ta oi karaia, bona lau be gau ibounai do lau karaia oi lau durua, Israela taudia ibounai be oi dekenai lau veria mai totona.”+
13 Unai neganai Davida ia gwau: “Namo! Lau be oi ida gwaubou ta do lau karaia. To oi amo lau noia gauna be inai, lau itaia totona oi mai neganai, namona be Saulo ena natuna, Mikala oi mailaia,+ bema lasi, lau itaia totona oi mai lasi.”
14 Bena Davida ese Saulo ena natuna Isi-boseta dekenai gwaukau taudia ia siaia,+ ia gwau: “Lau dekenai egu adavana Mikala oi henia, lau ese Filistia taudia 100 edia tauanina ena kopina lau henia ena maoheni totona.”+
15 Vadaeni Isi-boseta ese hereva ia siaia, Mikala be ena adavana Palitiela amo idia abia totona. Palitiela+ be Laisi ena natuna.
16 To ena adavana be ia ida ia raka noho, mai taitai danu iena murinai ia raka ela bona Bahurimi dekenai.+ Bena Abinere be ia dekenai ia gwau: “Oi giroa lou!” Unai neganai ia giroa lou.
17 Vadaeni Abinere ese Israela ena tau badadia dekenai hereva ia siaia, ia gwau: “Nega daudau lalonai umui ura Davida be emui king ai ia lao.
18 Vadaeni harihari unai umui karaia, badina Iehova ese Davida dekenai ia gwau: ‘Lau ese egu hesiai tauna Davida ena imana amo+ egu taunimanima be Filistia taudia bona edia inai taudia ibounai edia imana amo do lau hamauria.’”
19 Bena Abinere ese Beniamina taudia ia hereva henidia.+ Danu, Abinere be Heberona dekenai ia lao Davida ia hereva henia totona, Israela taudia bona Beniamina taudia ese idia abia dae herevana ia gwauraia totona.
20 Abinere be tatau 20 ida Heberona ai Davida dekenai idia lao neganai, Davida ese idia totona aria ia karaia.
21 Bena Abinere be Davida dekenai ia gwau: “Mani lau lao bona egu lohia bona king totona Israela taudia ibounai lau haboua, unai amo oi ida gwaubou ta idia karaia diba, bona emu ura hegeregerena taunimanima ibounai oi lohiaia diba.” Vadaeni Davida ese Abinere ia siaia lao, bona ia be mai maino ida ia lao.
22 Unai neganai, Davida ena hesiai taudia bona Ioaba be tuari amo idia lou mai, bona tuari amo gau momo herea idia abia giroa mai. Abinere be Davida ida Heberona ai ia noho lasi, badina Davida ese ia be mai maino ida ia siaia lao vadaeni.
23 Ioaba+ bona ia ida idia lao tuari taudia idia ginidae neganai, haida ese Ioaba idia hamaoroa, idia gwau: “Nere ena natuna+ Abinere+ be king dekenai ia mai, bona ia ese ia siaia lao, bona mai maino ida ia lao.”
24 Vadaeni Ioaba ia vareai bona king dekenai ia gwau: “Dahaka oi karaia? Abinere be oi dekenai ia mai, to dahaka dainai ia oi siaia lao? Hari ia be ia lao vadaeni!
25 Oi be Nere ena natuna Abinere oi diba! Ia be ia mai oi ia koia totona, ia ura emu lao bona mai gabudia ibounai ia diba bona oi karaia gaukara ibounai danu.”
26 Vadaeni Ioaba ese Davida ia rakatania bona gwaukau taudia be Abinere ena murinai ia siaia lao, bona Siraha ena ranu guri* amo ia idia abia giroa mai, to Davida be unai ia diba lasi.
27 Abinere be Heberona dekenai ia giroa lou neganai,+ Ioaba ese ia hakaua siri bona geiti lalonai ia hakaua lao, ia hereva henia totona. To unuseniai ia ese Abinere ena bogana ia gwadaia, bona ia mase.+ Unai ia karaia badina ia ese ena tadikaka Asahele ia hamasea.+
28 Davida be gabeai unai ia kamonai neganai, ia gwau: “Iehova ia diba, lau bona egu siahu henunai idia noho taudia be Nere ena natuna Abinere ena rara dekenai ai kerere lasi momokani.+
29 Namona be Ioaba bona ena tamana ena ruma bese taudia ibounai be panisi idia abia.+ Ioaba ena bese taudia ese edia tauanina amo hura do ia raka-lasi+ eiava lepera gorerena+ do idia abia eiava edia aena do ia dika eiava tuari kaia amo do idia moru eiava aniani dekenai do idia dabu!”+
30 Vadaeni Ioaba bona ena tadikaka Abisai+ ese Abinere+ idia alaia mase, badina Gibeona ai idia tuari neganai, ia ese edia tadikaka Asahele ia alaia mase.+
31 Bena Davida ese Ioaba bona ia ida idia noho taudia ibounai dekenai ia gwau: “Emui dabua umui darea bona puse dabua umui karaia bona Abinere totona umui taitai.” King Davida be mase tauanina idia atoa patana murinai ia raka noho.
32 Idia ese Heberona ai Abinere idia guria, bona king be Abinere ena guria gabuna ai ia taitai bada, bona taunimanima ibounai danu idia taitai.
33 King be Abinere dainai inai lalohisihisi ane ia abia, ia gwau:
“Abinere be kavakava tauna bamona ia mase be namo, a?
34 Emu imana be seini amo idia kwatua lasi,Bona emu aena danu be seini amo idia guia lasi,
Oi be kara kerere taudia vairanai idia moru taudia bamona oi moru.”+
Unai neganai taunimanima ibounai be ia dainai idia taitai lou.
35 Gabeai, dina ia do noho lalonai taunimanima ibounai idia mai bona Davida dekenai paraoa idia henia, ena lalona idia hanamoa totona, to Davida ia gwauhamata, ia gwau: “Bema dina ia do diho lasi bona lau ese paraoa eiava gau ma ta lau ania, namona be Dirava ese lau ia panisia bona unai panisi ia habadaia!”+
36 Taunimanima ibounai be unai idia itaia, bona unai kara dainai idia moale. King ena kara ibounai dekenai idia moale hegeregerena.
37 Vadaeni Davida ena taunimanima ibounai bona Israela taudia ibounai be unai dina ai idia diba, king ese Nere ena natuna Abinere ia alaia lasi.+
38 Bena king be ena hesiai taudia dekenai ia gwau: “Umui diba lasi, a? Israela ai gunalaia tauna ta bona tau badana ta be hari dina ia mase.+
39 Hari dina egu goada ia ore, ena be lau be idia horoa king,+ to lau dekenai inai tatau, Seruia ena natudia unai,+ be dagedage taudia.+ Namona be Iehova ese ia kara dika tauna ena dika hegeregerena davana ia henia.”+
