Samuela Iharuana 4:1-12
4 Saulo ena natuna Isi-boseta+ ia kamonai Abinere be Heberona ai ia mase neganai,+ ia gari bada bona Israela taudia ibounai danu idia lalohekwarahi bada.
2 Saulo ena natuna be mai ena dadidadi tuari oreadia, bona unai orea idia naria tatau rua be inai: Ta ena ladana be Banaha bona ma ta be Rekaba. Idia be Beroto tauna Rimono ena natudia, ia be Beniamina iduhuna amo. (Beroto+ danu be Beniamina siti ta.
3 Beroto taudia be Gitaimi dekenai idia heau lao,+ bona idau tano taudia bamona unuseniai idia noho ema bona hari.)
4 Saulo ena natuna Ionatana+ be mai ena natuna mero ta, bona ena aena be idia dika.+ Ena mauri lagani be 5 neganai, Ieserele amo Saulo bona Ionatana edia mase sivaraina idia kamonai,+ bona ia ia naria hahinena ese ia abia isi bona ia heau, to mai gari ida ia heau noho lalonai, mero ia moru bona ena aena idia dika. Iena ladana be Mefiboseta.+
5 Beroto tauna Rimono ena natudia, Rekaba bona Banaha, be dina tubua ai Isi-boseta ena ruma dekenai idia lao, ia be unai dina tubua negana ai ia laga-ani noho.
6 Bona Rekaba bona ena tadikaka Banaha+ be ruma lalonai idia vareai, toana be witi idia abia noho bamona, bena Isi-boseta ena bogana idia gwadaia bona idia heau boio.
7 Ruma lalonai idia vareai neganai, Isi-boseta be ena daiutu lalonai bedi latanai ia hekure noho, bona idia ese ia idia gwadaia bona idia hamasea, unai murinai ena kwarana idia utua oho. Bena ena kwarana idia abia bona hanuaboi ibounai idia raka, Arabaha ia lao henia dalana dekenai.
8 Bona Isi-boseta+ ena kwarana be Heberona ai Davida dekenai idia mailaia bona king dekenai idia gwau: “Oi ia inai henia bona ia ura alaia tauna,+ Saulo,+ ena natuna Isi-boseta ena kwarana be inai. Inai dina ai, Iehova ese emai lohia bona king totona Saulo bona ena bese taudia edia dika davana ia henia.”
9 To Davida be Rekaba bona ena tadikaka Banaha, Beroto tauna Rimono ena natudia unai, ia haere henidia ia gwau: “Ia mauri noho Diravana, Iehova, metau ibounai lalonai lau ia hamauria Tauna, ena ladana ai oi lau hamaoroa momokani,+
10 tau ta be lau dekenai ia mai bona ia gwau, ‘Saulo ia mase vadaeni,’+ bona ia laloa ia be sivarai namona ia mailaia, to ia lau dogoatao bona Sikilaga ai lau alaia mase.+ Unai sivarai gwauraia tauna ese lau amo unai davana ia abia!
11 To bema kara dika taudia ese kerere lasi tauna ena ruma lalonai idia vareai bona ena bedi latanai ia idia hamasea, unai be dika momokani! Vadaeni iena rara dainai umui dekenai davana do lau henia lasi, a?+ Bona umui be tanobada amo do lau kokia lasi, a?”
12 Vadaeni Davida ese tatau matamata ia oda henidia Rekaba bona Banaha idia hamasedia totona.+ Bena edia imana bona aena idia utudia oho bona Heberona ena gohu badinai idia tauadae.+ To Isi-boseta ena kwarana idia abia bona Abinere idia guria gabuna ai idia guria, unai be Heberona ai.
