Samuela Iharuana 8:1-18
8 Nega sisina ia hanaia murinai, Davida ese Filistia taudia ia tuari henia+ bona ia halusidia,+ bona ia ese Mete-gama hanuana be Filistia taudia edia imana amo ia abia.
2 Ia ese Moaba taudia ia halusia+ bona ia hamaorodia tano ai do idia hekure, bena varo amo idia ia hahetohoa. Varo rua amo ia hahetohoa taudia be do ia hamasea, to varo tamona amo ia hahetohoa taudia be do ia hamauria.+ Bona Moaba taudia be Davida ena hesiai taudia ai idia lao bona ia dekenai edia harihari gaudia idia abia lao.+
3 Rehoba, Soba ena king unai,+ ena natuna Hadadesa be Euperate Sinavai abia totona ia lao noho lalonai, Davida ese ia bona ena taunimanima ia halusia.+
4 Davida ese Hadadesa amo hosi guia tatau 1,700 bona idia raka tuari tatau 20,000 ia abia. Bena Davida ese kariota idia veria hosi ibounai edia aena varovaro ia utudia, to hosi 100 dekenai unai ia karaia lasi.+
5 Damaseko ai idia noho Suria taudia+ be Soba ena king, Hadadesa durua totona idia mai neganai, Davida ese Suria taudia 22,000 ia alaia mase.+
6 Bena Davida ese Suria ena siti Damaseko ai tuari orea ia atodia, bona Suria taudia be Davida ena hesiai taudia ai idia lao, bona ia dekenai harihari gaudia idia henia. Davida ia lao gabudia ibounai dekenai Iehova ese ia durua, ia kwalimu totona.+
7 Danu, Davida ese Hadadesa ena hesiai taudia amo golo kesi ia abia bona Ierusalema dekenai ia abia lao.+
8 Hadadesa ena siti, Beta bona Berota, amo King Davida ese kopa momo herea ia abia.
9 Vadaeni Hamata+ ena king, Toi, ia kamonai Davida ese Hadadesa ena tuari orea ibounai ia halusidia.+
10 Vadaeni Toi ese ena natuna Iorama be King Davida dekenai ia siaia lao, iena noho ia henanadailaia bona ia hanamoa totona, badina ia ese Hadadesa ia tuari henia bona ia halusia (Hadadesa be nega momo Toi ia tuari henia), bona ia ese siliva, golo, bona kopa ia mailaia danu.
11 King Davida ese unai gaudia ia hahelagaia bona Iehova dekenai ia henia, ia halusia besedia amo ia abia siliva bona golo ia hahelagadia danu.+
12 Unai gaudia be Suria bona Moaba,+ Amono taudia, Filistia taudia,+ Amaleka taudia,+ bona Soba ena king, Rehoba ena natuna Hadadesa amo ia abidia.+
13 Danu, Davida ese Damena Koura ai Edoma taudia 18,000 ia alaia bona ia giroa lou neganai, iena ladana idia abia isi.+
14 Bona Edoma ai tuari orea ia atodia. Oibe, Edoma ena tano ibounai dekenai tuari orea ia atodia, bona Edoma taudia ibounai be Davida ena hesiai taudia ai idia lao.+ Davida ia lao gabudia ibounai dekenai Iehova ese ia durua, ia kwalimu totona.+
15 Davida ese Israela ibounai ia lohiaia,+ bona ia be mai maoromaoro ida ena taunimanima ibounai ia hahemaoro henia.+
16 Seruia ena natuna Ioaba+ be tuari taudia ia gunalaia, bona Ahiluda ena natuna Iehosapata+ be rekodi torea tauna.
17 Ahitubu ena natuna Sadoka+ bona Abiatara ena natuna Ahimeleka be hahelaga taudia, bona Seraia be seketere.
18 Iehoiada ena natuna Benaia+ ese Kereti taudia bona Pelete taudia ia biagua.+ Bona Davida ena natudia memero be king durua taudia ai idia lao.
