Sivarai Iharuana 20:1-37
20 Unai murinai, Moaba taudia,+ Amono taudia,+ bona Amonimi taudia* haida be Iehosapata tuari henia totona idia mai.
2 Vadaeni taunimanima haida be Iehosapata idia hamaoroa: “Taunimanima hutuma be oi tuari henia totona idia mai, idia be Edoma+ ena davara* kahana amo idia mai bona Hasasono-tamara dekenai idia noho, unai be Ene-gedi dekenai.”+
3 Unai nega ai Iehosapata ia gari, bona lalona ia hadaia Iehova ia tahua totona.+ Vadaeni Iuda taudia ibounai ia hamaoroa do idia aniani lasi.*
4 Iuda taudia idia haboua Iehova ena heduru idia noia totona.+ Idia be Iuda siti ibounai amo idia mai Iehova ena hakaua herevadia idia abia totona.
5 Bena Iehosapata be Iehova ena ruma ena ariara matamata vairanai Iuda bona Ierusalema taudia ibounai edia vairanai ia gini,
6 bona ia gwau:
“Emai sene taudia edia Dirava Iehova e, oi sibona be guba dekenai oi noho Diravana.+ Oi be bese idauidau edia basileia ibounai oi biagua noho.+ Emu siahu bona goada be bada herea, bona ta ese oi ia tuari henia diba lasi.+
7 Emai Dirava e, oi ese emu taunimanima, Israela taudia vairanai inai tano taudia oi lulua bona unai tano be emu turana Aberahamo ena bese taudia dekenai oi henia idia noholaia hanaihanai totona.+
8 Bona idia be unai tano ai idia noho, bona emu ladana totona dubu helaga idia haginia,+ idia gwau,
9 ‘Bema dika badana ta be ai dekenai ia vara, hegeregere tuari, haida ese ai idia panisia, gorere dikadia, eiava hitolo bada ia vara, ai be inai ruma bona oi vairanai do ai gini bona heduru totona ai noinoi bona emai hisihisi amo ai do oi hamauria, badina inai ruma ai emu ladana ia noho,+ bona mani ai oi kamonai henia bona ai oi hamauria.’+
10 Bona Amono, Moaba, bona Seiri ena ororo gabudia edia tatau be inai.+ Israela taudia be Aigupito amo idia raka-lasi neganai, oi koudia unai taudia edia tano idia abia lasi totona. Bona Israela taudia ese idia rakatanidia bona idia hadikaia ore lasi.+
11 Hari idia mai bona idia ura emu tano amo ai idia lulua, to unai tano be ahuna ta bamona ai dekenai oi henia.+
12 Emai Dirava e, mani idia oi panisia.+ Badina ai tuari henia totona idia mai taudia be hutuma bona ai be goada lasi. Bona ai diba lasi dahaka do ai karaia,+ to emai matana be oi dekenai, badina emu heduru ai ura.”+
13 Unai nega ai, Iuda taudia ibounai be Iehova vairanai idia gini, mai edia natuna maragidia, edia adavadia, bona edia natudia.*
14 Bena Iuda taudia edia huanai, Iehova ena lauma be Iahasiele ena latanai ia diho. Iahasiele be Sekaraia ena natuna mero, Sekaraia be Benaia ena natuna mero, Benaia be Ieile ena natuna mero, Ieile be Levi tauna Matanaia ena natuna mero, ia be Asapa ena bese tauna.
15 Iahasiele ia gwau: “Iuda taudia ibounai bona Ierusalema ai umui noho taudia bona King Iehosapata e, umui kamonai! Iehova be inai bamona ia gwau, ‘Namo lasi inai hutuma bada dainai umui gari, badina tuari be Dirava ena, to umui emui lasi.+
16 Kerukeru idia umui tuari henia totona do umui lao. Idia be Sisi ena dala amo do idia daekau mai, bona umui ese koura ena dokona kahana ai idia do umui davaria, unai be Ieruele ena tano kaukau kahirakahira dekenai.
17 Umui be do umui tuari lasi. Emui gabu dekenai umui gini, umui marere lasi,+ bona Iehova ese umui do ia hamauria dalana do umui itaia.+ Iuda bona Ierusalema taudia e, namo lasi umui gari.+ Kerukeru idia umui tuari henia totona do umui lao, bona Iehova be umui ida do ia noho.’”+
18 Maoromaoro Iehosapata ia goru diho, bona Iuda taudia ibounai bona Ierusalema ai idia noho taudia be Iehova ena vairanai idia goru diho, Iehova idia tomadiho henia totona.
19 Bena Levi taudia, unai be Kohata taudia+ bona Kora taudia edia bese taudia, idia toreisi bona mai gado bada ida Israela ena Dirava Iehova idia hanamoa.+
20 Idia be daba momokani idia noga bona Tekoa ena tano kaukau dekenai idia lao.+ Idia lao noho lalonai, Iehosapata be edia vairana ai ia gini bona ia gwau: “Iuda taudia bona Ierusalema ai umui noho taudia ibounai e, lau umui kamonai henia! Iehova emui Dirava umui abidadama henia, unai amo do umui gini goada.* Iena peroveta taudia umui abidadama henia,+ bona do umui kwalimu.”
21 Iehosapata be taunimanima ida ia herevahereva murinai, ia ese tatau haida ia abia hidi, bona Iehova dekenai ane idia abia+ bona ia idia hanamoa, idia be dabua helagadia idia karaia bona tuari taudia edia vairanai idia raka, idia gwau: “Iehova tanikiu henia, badina iena lalokau* be ia noho hanaihanai.”+
22 Idia be mai moale ida hanamoa anedia idia abia noho lalonai, Iehova ese Iuda taudia tuari henia totona idia mai Amono taudia, Moaba taudia bona Seiri ororo taudia edia lalona ia hadaradaraia, bena ta ta idia hamasea.+
23 Bona Amono taudia bona Moaba taudia be Seiri ororo taudia+ idia tuari henia bona hamasedia ore. Bona Seiri taudia idia hadikaia ore murinai, ta ta idia hamasea.+
24 To Iuda taudia be tano kaukau ai ia noho gima kohorona dekenai idia mai neganai,+ hutuma edia mase tauanidia idia itaia, tano dekenai idia noho kava,+ idia ta ia mauri lasi.
25 Vadaeni Iehosapata bona ena taunimanima idia lao unai mase taudia edia kohu idia abia totona. Idia itaia dabua bona herahera gaudia namodia momo herea idia noho, bona idia sibona totona unai kohu idia abia.+ Unai kohu be momo herea dainai, dina toi lalonai idia huaia lao.
26 Dina namba 4 ai idia be Beraka Kourana ai idia haboua, unuseniai Iehova idia hanamoa. Unai dainai unai gabu ena ladana idia hatoa Beraka* Koura+ ema bona hari.
27 Bena Iuda bona Ierusalema ena tatau ibounai, bona edia gunalaia tauna, Iehosapata be mai moale ida Ierusalema dekenai idia giroa lou, badina Iehova ese edia inai taudia amo idia ia hamauria.+
28 Vadaeni idia be Ierusalema dekenai idia vareai neganai, miusiki gaudia mai edia varo, hap*+ idia gadaralaia bona kibi idia hiriria+ bona Iehova ena ruma dekenai idia lao.+
29 Bona Iehova ese Israela ena inai taudia ia tuari henia ena sivarai be unai tano edia basileia ibounai ese idia kamonai neganai, Dirava dekenai idia gari.+
30 Unai dainai Iehosapata ena basileia be maino ai ia noho, bona Dirava ese ena inai taudia ibounai amo laga-ani ia henia.+
31 Bona Iehosapata be Iuda ia lohiaia noho. Iena mauri lagani be 35 neganai king ai ia lao, bona lagani 25 lalonai Ierusalema ai ia lohia. Iena sinana ena ladana be Asuba, ia be Silihi ena natuna kekeni.+
32 Iehosapata be ena tamana Asa ena kara ia badinaia noho.+ Unai dala ia rakatania lasi, bona Iehova ena vairanai kara maorona ia karaia.+
33 To, ataiai gabudia* idia kokia lasi,+ bona taunimanima be edia sene taudia edia Dirava totona edia kudouna idia hegaegaelaia lasi.+
34 Iehosapata ena sivarai ibounai, matamana amo ela bona dokona, be Hanani+ ena natuna Iehu+ ese ia sivarailaia, unai sivarai be Israela ena King Taudia Edia Buka lalonai ia noho.
35 Unai murinai Iuda ena king Iehosapata be Israela ena king Ahasaia, kara dika momo ia karaia tauna, ida gwaubou ta ia karaia.+
36 Vadaeni idia ruaosi idia gaukara hebou Tarasisi dekenai idia lao bouti idia karaia totona,+ bona bouti be Esiono-gebere dekenai idia karaia.+
37 To, Maresa tauna Dodavahu ena natuna mero Eliesere ese Iehosapata ia perovetalaia, ia gwau: “Oi ese Ahasaia ida gwaubou ta oi karaia dainai, Iehova ese emu gaukara do ia hadikaia.”+ Vadaeni bouti ibounai idia dika,+ bona idia be Tarasisi dekenai idia lao diba lasi.
Futnout
^ Eiava reana, “Meunimi taudia.”
^ Unai be, Mase Davara.
^ Heb., “natudia memero.”
^ Eiava “haheauka.”
^ Anina be “Hahenamo.”
^ Miusiki gauna ta mai ena varo, gita bamona, to ena toana be idau.
