Sivarai Iharuana 33:1-25
33 Manase+ ena mauri lagani be 12 neganai, king ai ia lao, bona lagani 55 lalonai Ierusalema ai ia lohia.+
2 Manase be Iehova ena vairanai ia kara dika, ia be idau bese ese idia karaia kara dika rohorohodia ia badinaia, Iehova ese Israela taudia edia vairana amo ia lulua lao besedia unai.+
3 Ena tamana Hesekaia ese ia hadikaia ataiai gabudia* ia haginia lou,+ bona Bala diravadia totona boubou patadia bona au helagadia* ia karaia. Bona guba gaudia ibounai dekenai ia tui diho bona ia hesiai henidia.+
4 Danu ia ese Iehova ena ruma ai boubou patadia ia haginia,+ to unai ruma totona Iehova be ia gwau: “Ierusalema ai, egu ladana do ia noho hanaihanai.”+
5 Bona ia ese guba gaudia ibounai totona Iehova ena ruma ena ariara rua ai boubou patadia ia haginia.+
6 Bona Manase be Hinoma* Ena Natuna Mero Koura ai+ ena natudia memero be lahi lalonai ia gabua.*+ Meamea karadia ia karaia,+ lauma dikadia edia heduru amo vaira nega ia gwauraia, bona mase taudia edia lauma idia hereva henia taudia bona vaira nega gwauraia taudia ia abia hidi.+ Ia ese Iehova ena vairanai kara dika badadia ia karaia, Dirava ia habadua totona.
7 Manase ese ia karaia kaivakuku be Dirava momokanina ena ruma ai ia atoa,+ unai ruma totona Dirava ese Davida bona ena natuna Solomona ia hamaoroa: “Inai ruma ai bona Ierusalema ai egu ladana do ia noho hanaihanai, unai gabu be Israela ena iduhu edia teritori ibounai amo lau abia hidi.+
8 Bona lau ese Israela taudia edia sene taudia dekenai lau henia tanona amo idia do lau kokia lou lasi, bema idia ese lau henia oda ibounai, Mose amo lau henia Taravatu ibounai, hakaua herevadia bona oda herevadia unai, idia badinaia namonamo.”
9 Manase ese Iuda taudia bona Ierusalema ai idia noho taudia ia hakaua kerere noho, bona kara dika momo idia karaia, Iehova ese Israela taudia edia vairana amo ia hadikaia ore besedia edia kara dikadia idia hereaia.+
10 Iehova be Manase bona ena taunimanima ia hereva henia noho, to idia kamonai lasi.+
11 Vadaeni Iehova ese Asuria ena king ena tuari biagudia ia gaukaralaia Manase idia tuari henia totona, bona huku bona kopa auri rua amo idia guia bona Babulonia dekenai idia abia lao.
12 Bona ena hisihisi negana lalonai, ia be ena Dirava Iehova ena lalonamo abia totona ia noinoi bona ena sene taudia edia Dirava ena vairanai sibona ia hamanaua noho.
13 Ia be Dirava dekenai ia guriguri noho, bona Dirava ena lalonamo abia totona ia noinoi dainai Dirava ese ia hebogahisi henia bona ia kamonai henia, bona Ierusalema dekenai Dirava ese ena king dagi ia henia lou.+ Bena Manase ia diba Iehova be Dirava momokanina.+
14 Unai murinai ia ese Davida Ena Siti ena murimuri magu+ be Gihona ena west kahana ena koura ai ia haginia.+ Bona unai magu be Opele+ amo ia hanaia lao ela bona Gwarume Iduarana dekenai,+ bona magu be ataiai momokani. Ma danu, ia ese Iuda dekenai idia noho siti mai edia magu aukadia ibounai lalonai tuari gunalaia taudia ia abia hidi.
15 Bena ia ese Iehova ena ruma amo idau dirava bona kaivakuku laulaudia ia kokia+ bona Iehova ena ruma ena ororo ai bona Ierusalema ai ia haginia boubou patadia ibounai ia kokia danu,+ bona unai gaudia ibounai be siti ena murimuri ai ia negea.
16 Danu ia ese Iehova ena boubou patana ia hanamoa lou+ bona unai pata latanai maino karaia bouboudia+ bona tanikiu henia bouboudia ia henia matamaia,+ bona ia ese Iuda besena ia hamaoroa Israela taudia edia Dirava Iehova idia hesiai henia totona.
17 To, ena be taunimanima be edia Dirava Iehova sibona dekenai boubou gaudia idia henia, to ataiai gabudia* idia do gaukaralaia noho.
18 Bona Manase ena sivarai ibounai, Dirava dekenai ia gwauraia guriguri, bona matahanai itaia taudia ese ia dekenai Israela taudia edia Dirava Iehova ena ladana ai idia gwauraia herevadia be Israela ena king taudia edia buka lalonai idia torea.
19 Danu iena guriguri+ bona iena noinoi ena haere ia abia dalana, ia karaia kara dikadia ibounai+ bona Dirava badinaia lasi karana, bona ia be sibona ia hamanaua lasi neganai ia haginia ataiai gabudia bona au helagadia*+ bona imana amo idia karaia kaivakukudia ia haginia gabudia, unai gaudia ibounai be iena matahanai itaia taudia edia sivarai lalonai idia torea.
20 Bena Manase ia mase,* bona iena ruma badinai idia guria. Bona iena natuna Amona be king ai ia lao.+
21 Amona+ ena mauri lagani be 22 neganai, ia be king ai ia lao, bona lagani rua lalonai Ierusalema dekenai ia lohia.+
22 Bona Amona be Iehova ena vairanai kara dika ia karaia noho, iena tamana Manase ia karaia bamona.+ Bona ena tamana ese ia karaia kaivakuku idauidau ibounai dekenai boubou gaudia ia henia noho,+ bona unai kaivakukudia ia hesiai henia noho.
23 To ia be Iehova ena vairanai ia manau lasi,+ iena tamana Manase ia manau hegeregerena.+ Amona be ena kara dika ia habadaia noho.
24 Dokonai, ena hesiai taudia ese ia do idia hamasea palani idia karaia,+ bena ia be ena ruma ai idia hamasea.
25 To King Amona ena mase dalana idia karaia taudia ibounai be tano taudia ese idia hamasea,+ bona iena natuna Iosaia+ be king ai idia halaoa.
