Sivarai Iharuana 36:1-23
36 Bena Iuda taudia ese Iosaia ena natuna Iehoahasa idia abia+ bona Ierusalema dekenai king ai idia halaoa.+
2 Iehoahasa ena mauri lagani be 23 neganai, king ai ia lao, bona ia be hua toi Ierusalema ai ia lohia.
3 To, Aigupito ena king ese Ierusalema ai Iehoahasa ena dagi ia kokia bona tano ena davana totona Iuda taudia amo 100 siliva talent* bona golo talent ta ia abia.+
4 Danu, Aigupito ena king ese Iehoahasa ena tadikaka Eliakimi be Iuda bona Ierusalema edia king ai ia halaoa bona ena ladana ia haidaua, Iehoiakimi. To Neko+ ese iena tadikaka Iehoahasa be Aigupito dekenai ia abia lao.+
5 Iehoiakimi+ ena mauri lagani be 25 neganai, king ai ia lao, bona ia be lagani 11 lalonai Ierusalema ai ia lohia. Ia be ena Dirava Iehova vairanai ia kara dika noho.+
6 Babulonia ena king Nebukanesa+ be Iehoiakimi ia tuari henia bona kopa auri rua amo ia guia, unai amo Babulonia dekenai ia abia lao.+
7 Bona Nebukanesa ese Iehova ena ruma ena kohu haida ia abidia bona Babulonia dekenai ia abia lao bona Babulonia ai ena ruma dekenai ia atoa.+
8 Iehoiakimi ena sivarai ibounai, ia karaia kara dika rohorohodia bona ia karaia kerere idauidau, be Iuda bona Israela edia King Taudia Edia Buka lalonai idia torea. Bona iena natuna Iehoiakini be king ai ia lao.+
9 Iehoiakini+ ena mauri lagani be 18 neganai, king ai ia lao, bona ia be hua toi bona dina 10 lalonai Ierusalema ai ia lohia. Ia be Iehova vairanai ia kara dika noho.+
10 Lagani ena matamana ai,* King Nebukanesa ese ena hesiai taudia ia siaia Iehoiakini bona Iehova ena ruma ena dava bada kohu haida be Babulonia dekenai idia abia mai totona.+ Bona ia ese Iehoiakini ena vavana Sedekaia be Iuda bona Ierusalema edia king ai ia halaoa.+
11 Sedekaia+ ena mauri lagani be 21 neganai, ia be king ai ia lao, bona lagani 11 lalonai Ierusalema ai ia lohia.+
12 Ia be ena Dirava, Iehova vairanai ia kara dika noho. Ia be peroveta tauna Ieremia, Iehova ena oda hegeregerena ia hereva tauna unai, ena vairanai ia manau lasi.+
13 Danu ena be Nebukanesa ese Sedekaia ia doria Dirava ena ladanai gwauhamata ta ia karaia totona, to Sedekaia ese King Nebukanesa ia gwau-edeede henia.+ Bona Sedekaia be ena lalona ia ha-aukaia bona ia ura lasi Israela ena Dirava, Iehova dekenai ia giroa lou.
14 Hahelaga taudia idia gunalaia taudia bona taunimanima ibounai ese Dirava badinaia lasi karadia momo idia karaia, idia be edia badina besedia edia kara dika rohorohodia idia badinaia, bona Iehova ena ruma, Ierusalema ai idia hahelagaia rumana unai, idia hadikaia.+
15 Israela taudia edia sene taudia edia Dirava, Iehova be ena gwaukau taudia amo idia ia hadibaia loulou, badina ia be ena taunimanima bona ena dubu helaga* totona ia hebogahisi.
16 To idia ese Dirava momokanina ena gwaukau taudia idia kirikirilaia noho,+ bona ena hereva idia abia dae lasi+ bona ena peroveta taudia idia hevasehalaia+ ela bona hanamoa dalana be lasi. Bena Iehova ena badu be ena taunimanima latanai ia diho.+
17 Vadaeni Dirava ese Kaledea edia king ia gaukaralaia idia ia tuari henia totona,+ unai king ese tatau matamatadia be dubu helaga lalonai tuari kaia amo ia hamasea.+ Memero matamatadia eiava kekeni matamatadia, bona buruka eiava gorere taudia ia hebogahisi henia lasi.+ Dirava ese gau ibounai be ena imana dekenai ia atoa.+
18 Dirava momokanina ena ruma ena kohu ibounai, badadia bona maragidia, bona Iehova ena ruma ena dava bada kohudia bona king bona ena gunalaia taudia edia dava bada kohudia, ibounai be Babulonia dekenai ia abia lao.+
19 Ia ese Dirava momokanina ena ruma be lahi amo ia gabua,+ Ierusalema ena magu ia hamorua,+ magu aukadia ibounai be lahi amo ia gabua, bona dava bada gaudia ibounai ia hadikaia.+
20 Tuari kaia amo idia hamasea lasi taudia be igui taudia ai ia halaoa bona Babulonia dekenai ia abidia lao,+ bona idia be ia bona ena natudia memero edia hesiai taudia ai idia lao+ ela bona Parasa basileiana ia lohia matamaia,+
21 unai amo Iehova ese Ieremia amo ia gwauraia herevana ia guguru.+ Tano ia noho kava ela bona sabati laganidia ia hagugurua.+ Bona tano ia noho kava negana ai, ia laga-ani, ela bona lagani 70 idia guguru.+
22 Parasa ena king, Kurese ena lohia lagani ginigunana ai,+ Iehova ese Parasa ena king, Kurese ena lalona ia veria ena basileia ibounai dekenai hereva ta ia siaia totona, unai amo Iehova ese Ieremia amo ia gwauraia herevana do ia guguru,+ unai hereva be revareva ai ia torea danu,+ ia gwau:
23 “Parasa ena king, Kurese be inai bamona ia hereva, ‘Guba ena Dirava, Iehova be lau dekenai tanobada ena basileia ibounai ia henia,+ bona lau ia oda henia ia totona Ierusalema ai ruma ta do lau haginia, unai be Iuda dekenai.+ Umui huanai idia noho taudia, Dirava ena taunimanima ibounai unai, be Ierusalema dekenai do idia lao, edia Dirava Iehova be idia ida do ia noho.’”+
