Sivarai Iharuana 9:1-31
9 Vadaeni Sieba ena kwini+ ese Solomona ena sivarai ia kamonai. Vadaeni ia be Ierusalema dekenai ia mai bona henanadai aukadia amo Solomona ia tohoa. Ia be mai ena kariota namo hereana, bona kamelo ese balsam* oela bona golo+ bona dava bada nadi momo herea idia huaia. Ia be Solomona dekenai ia lao bona ia ura dibaia gaudia ibounai be ia dekenai ia henanadailaia.+
2 Vadaeni Solomona ese iena henanadai iboudiai ia haerelaia. Solomona dekenai gau ta be auka lasi Sieba ena kwini dekenai ia gwauraia hedinarai totona.
3 Sieba ena kwini ese Solomona ena aonega ibounai,+ ia ese ia haginia rumana,+
4 ena teibolo ai idia noho aniani,+ ena ofesa taudia edia helai gabuna, teibolo ai aniani loalaia taudia bona edia dabua namodia, ena wain bubua taudia bona edia dabua namodia, bona ena gabua bouboudia, Iehova ena ruma dekenai hanaihanai ia henia gaudia unai,+ ia itaia neganai ia hoa dikadika.
5 Vadaeni ia be king dekenai ia gwau: “Oi karaia gaudia bona emu aonega ena sivarai be egu tano ai lau kamonai, bona unai be momokani.
6 To unai sivaraidia lau abia dae lasi ela bona lau mai bona egu matana korikori amo lau itaia.+ Bona momokani, lau dekenai emu aonega bada ena sivarai be kahana sibona idia gwauraia.+ To hari lau hamomokania emu aonega bona emu kohu be bada herea.+
7 Emu taunimanima be idia moale, bona nega ibounai oi ida idia noho hesiai taudia be idia moale, badina idia ese emu aonega herevadia idia kamonai noho!
8 Emu Dirava Iehova hanamoa, ia be oi dekenai ia moale dainai Israela ena terona ai oi ia atoa, emu Dirava Iehova totona do oi lohia. Emu Dirava ese Israela ia lalokau henia hanaihanai dainai,+ ia ese oi be Israela ena king ai ia halaoa, unai amo mai maoromaoro bona momokani ida hahemaoro do oi karaia.”
9 Bena ia ese king dekenai 120 golo talent*+ bona balsam oela bada herea bona dava bada nadi momo ia henia. Sieba ena kwini ese King Solomona dekenai ia henia balsam oela be bada herea, gabeai ta be king dekenai unai bamona ia karaia lasi.+
10 Ma danu, Hirama ena hesiai taudia bona Solomona ena hesiai taudia, Opiri amo golo idia mailaia taudia unai,+ ese sendolwud timba bona dava bada nadi idia mailaia danu.+
11 King ese Iehova ena ruma+ bona king ena ruma totona+ sendolwud timba amo vadavada ia karaia, bona hap* bona miusiki gaudia mai edia varo ia karaia ane abia taudia totona.+ Unai bamona gaudia be guna Iuda ena tano ai idia itaia lasi.
12 Danu King Solomona ese Sieba ena kwini ia ura gaudia bona ia noia gaudia ia henia, Solomona ese ia henia gaudia edia momo be Sieba ena kwini ese ia abia mai gaudia edia momo ia hereaia. Bena kwini be ena tano dekenai ia giroa lou, ia bona ena hesiai taudia.+
13 Bona Solomona ese lagani ta lalonai ia abia golo ena metau be 666 talent,*+
14 bona danu hoihoi taudia bona bisinesi taudia bona Arabia ena king taudia ibounai bona unai tano ena gavana taudia ese Solomona dekenai golo bona siliva idia abia mai.+
15 Bona King Solomona be idia mikisia golo amo kesi badadia 200 ia karaia+ (unai kesi ta ta dekenai ia atoa golo ena metau be 600 sikel*)+
16 bona idia mikisia golo amo kesi maragidia* 300 ia karaia (unai kesi ta ta ai golo ena metau mina* toi ia atoa). Bena king ese unai kesi be ruma ladana Lebanona Uda dekenai ia atodia.+
17 King ese aivori amo terona badana ta ia karaia danu, bona golo goevana amo ia koua.+
18 Unai terona be mai ena vadavada 6, bona terona ena aena atoa gauna be golo gauna, bona terona ena helai gauna ena kahana kahana be mai ena dogoatao gaudia. Bona unai dogoatao gaudia edia badinai laiona rua+ idia gini.
19 Bona laiona 12+ be unai vadavada 6 latanai idia gini, laiona ta ta be unai vadavada 6 edia dokona kahadia ai idia gini. Basileia ma ta be unai bamona terona ta ia karaia lasi.
20 King Solomona ena inuinu kohudia ibounai be golo amo, bona ruma ladana Lebanona Uda ena kohu idauidau be golo goevana amo idia karaia. Siliva amo gau ta idia karaia lasi, badina Solomona ena nega ai siliva idia laloa bada lasi.+
21 King ena bouti be Hirama ena hesiai taudia+ ida Tarasisi dekenai idia lao.+ Lagani toi lalonai Tarasisi ena bouti momo be nega tamona lalonai golo bona siliva, aivori,+ maniki bona tukimi manu* momo herea idia mailaia.
22 Vadaeni King Solomona be tanobada ena king ma haida bamona lasi, ia be taga bada bona aonega tauna.+
23 Bona tanobada ai king ibounai idia ura Solomona idia itaia, unai amo Dirava ese ia henia aonega idia kamonai diba.+
24 Lagani ta ta ai, ia idia vadivadi henia taudia ta ta ese harihari gaudia, hegeregere siliva bona golo herahera gaudia, dabua+ bona tuari dabua bona balsam oela, hosi bona doniki idia mailaia.
25 Bona Solomona ena hosi bona kariota edia ruma be 4,000, bona hosi be 12,000,+ bona kariota bona hosi guia taudia edia siti ai ia atodia bona king kahirakahira idia noho, Ierusalema ai.+
26 Bona Solomona be Sinavai* amo ela bona Filistia taudia edia tano bona ela bona Aigupito ena tano hetoana ai idia noho king ibounai ia lohiaia.+
27 King ese Ierusalema ai siliva momo herea ia karaia, nadi edia momo hegeregerena, bona Sepala ai sida au momo herea ia hadoa, sikamoa au edia momo hegeregerena.+
28 Bona Aigupito bona tano ibounai amo hosi be Solomona dekenai idia mailaia.+
29 Solomona ena sivarai ibounai,+ matamana amo ela bona dokona, be peroveta taudia Natana+ bona Ahaisa,+ Silo tauna unai, bona matahanai itaia tauna Ido,+ Nebata ena natuna Ieroboama totona Dirava amo hereva ia gwauraia tauna,+ ese idia sivarailaia, ani?
30 Solomona be Ierusalema ai Israela ibounai ia lohiaia negana ena daudau be lagani 40.
31 Bena Solomona be ia mase* bona ena tamana Davida Ena Siti dekenai idia guria.+ Vadaeni ena natuna, Rehoboama, be ena gabu ia abia bona king ai ia lao.+
Futnout
^ Miusiki gauna ta mai ena varo, gita bamona, to ena toana be idau.
^ Vaia peva bona diba idia gaukaralaia taudia ese idia dogoatao.
^ Manu ena kala be idauidau bona ena bada be teki bamona. Eng., peacock.
^ Unai be, Euperate.
^ Heb., “ena sene taudia ida ia hekure.”
