Aonega Herevadia 14:1-35
14 Aonega hahine be ena ruma ia haginia,+To kavakava hahine be ena ruma ia hamorua.
2 Kara maoromaoro ai ia raka tauna be Iehova ia gari henia,To kara gageva ia badinaia tauna be Dirava ia inai henia.
3 Kavakava tauna ena hekokoroku herevadia be kwadia auna bamona,To aonega taudia be edia hereva ese do idia gimaia.
4 Bema boromakau oreana be lasi, boromakau idia ubua gabuna be do ia goeva,To boromakau goadadia idia noho neganai, tano be aniani momo do ia havaraia.
5 Hereva hamomokania tauna namona be ia koikoi lasi,To hereva hakoikoia tauna be nega ibounai ia koikoi.+
6 Hekokoroku tauna* be aonega ia tahua to ia davaria lasi,To laloparara tauna be diba ia abia haraga.+
7 Kavakava tauna amo oi noho daudau,Badina ia gwauraia hereva amo diba maorona be lasi.+
8 Laloa kehoa tauna be ena aonega dainai ia lao henia dalana ia diba,To kavakava tauna be ena kavakava lalohadai ese ia koia noho.*+
9 Kavakava tauna be ia kerere neganai, unai ia kirikirilaia,+To kara maoromaoro tauna be ia ura ena kerere ia hamaoromaoroa.
10 Ta ese ena lalona ai ia noho hisihisi be ia sibona ia diba,Bona ta ese ena lalona ai ia mamia moalena be ta ia diba lasi.
11 Kara dika tauna ena ruma be do idia hadikaia,+To kara maoromaoro tauna ena ruma be do ia gini noho.
12 Tau ta ia laloa ia lao henia dalana be maoro,+To unai dala ena dokona be mase.+
13 Ena be ta ia kiri, to ena kudouna be ia hisihisi,Bona moale ena dokona ai lalohisihisi ia vara.
14 Dirava badinaia lasi tauna be ena kara dainai dika do ia davaria,+To kara namo tauna be ena kara dainai davana namona ia abia.+
15 Diba bada lasi tauna ese hereva ibounai ia abia dae,To aonega tauna be do ia karaia gaudia ia laloa namonamo guna.+
16 Aonega tauna be ia naria namonamo bona dika amo ia raka siri,To kavakava tauna be ia laloa namonamo lasi* bona ia hekokoroku.
17 Ia badu haraga tauna be kavakava karadia ia karaia,+To gau ia lalohadailaia namonamo tauna be idia inai henia.
18 Laloa namonamo lasi tauna* be do ia kavakava,To aonega tauna ese diba do ia abia.+
19 Taunimanima dikadia be kara namo taudia edia vairanai do idia tui diho,Bona kara dika taudia be kara maoromaoro taudia edia geiti vairanai do idia tui diho.
20 Ogogami tauna be ena dekena taudia ese idia inai henia,+To taga tauna ena turana be momo herea.+
21 Iena dekena tauna ia inai henia tauna be ia kara dika,To dabu tauna dekenai hebogahisi ia hahedinaraia tauna be ia moale.+
22 Palani dikadia idia karaia taudia be do idia kerere, ani?
To kara namo idia ura karaia taudia be haida ese do idia hebogahisi henia bona abidadama henia.+
23 Mai emu goada ida gaukara idauidau oi karaia be mai ena namo,To hereva kava tauna be do ia dabu.+
24 Aonega taudia dekenai aonega be edia dava bada kohu ta bamona.To kavakava tauna ena kara ese kavakava ia havaraia.+
25 Hereva momokani ia gwauraia tauna be haida ia hamauria,To koikoi tauna be nega ibounai ia koikoi.
26 Iehova ia gari henia tauna be abidadama goada tauna,+Bona unai tauna ena natudia do idia noho namonamo.+
27 Iehova gari henia karana be mauri ena badina,Mase ena tarapu amo ta ia hakaua siri.
28 Taunimanima be momo neganai, unai be king ena hairai,+To bema taunimanima be lasi ia lohiaia totona, king be do ia moru.
29 Badu haraga lasi tauna be laloa kehoa tauna,+To badu haraga tauna be kavakava tauna.+
30 Kudouna namona ese tauanina ia hamauria,To mama karana be turia hadikaia gorerena ta bamona.+
31 Dabu tauna ia koia tauna be ena Havaraia Tauna ia habadua,+To ogogami tauna dekenai hebogahisi ia hahedinaraia tauna be Dirava ia hanamoa noho.+
32 Dika karaia tauna be sibona ena kara dika dainai do ia moru,To kara maoromaoro tauna be Dirava ia badinaia dainai, unai ese ia do ia gimaia.+
33 Aonega be laloparara tauna ena lalona ai ia noho,+To kavakava taudia be edia hereva amo idia ura hahedinaraia idia be mai edia aonega.
34 Kara maoromaoro ese bese ta ia hanamoa noho,+To kara dika be taunimanima dekenai hemarai ia havaraia.
35 King ena hesiai tauna ia aonega neganai, king be ia dekenai do ia moale,+To hemarai karadia ia karaia tauna be king ese do ia badu henia.+
Futnout
^ Eiava “ta ia kirikirilaia tauna.”
^ Eiava reana, “kavakava tauna ese ma haida ia koia.”
^ Eiava “badu dikadika.”
^ Eiava “diba bada lasi tauna.”
