Aonega Herevadia 19:1-29
19 Tau ta ia ogogami bona kara momokani ia badinaia be namo,+To kavakava bona hereva koikoidia ia gwauraia be dika.+
2 Bema tau ta be diba ia abia lasi, unai be namo lasi,+Bona ia laloa lasi bona ia kara haraga* tauna be ia kara dika noho.
3 Tau ta ena kavakava lalohadaina ese ia be dala kererena ai ia hakaua,Bona ena kudouna ai Iehova ia badu henia.
4 Tau ta be ena kohu momo dainai turadia momo idia mai,To ogogami tauna be ena turana ese do ia rakatania.+
5 Sivarai koikoi ia gwauraia tauna be do idia panisia,+Bona nega ibounai hereva koikoidia ia gwauraia tauna be do ia heau mauri lasi.+
6 Taunimanima momo be ladana namo tauna* ena lalonamo idia tahua,Bona harihari gaudia ia henia tauna ena turadia be momo.
7 Ogogami tauna be ena tadikaka ibounai ese idia inai henia,+Iena turadia danu ese idia dadaraia!+
Idia dekenai ia noinoi, to ta ese ia haere henia lasi.
8 Laloa namonamo tauna be ena mauri ia laloa bada.+Aonega ia ura henia bada tauna be do ia kwalimu.*+
9 Sivarai koikoi ia gwauraia tauna be do idia panisia,Bona nega ibounai hereva koikoidia ia gwauraia tauna be do ia mase.+
10 Kavakava tauna be hegeregere lasi taga maurina ia noholaia totona,Unai hegeregerena hesiai tauna ta ese lohia taudia ia lohiaia be maoro lasi!+
11 Laloa namonamo tauna ese ena badu ia hamaragia,+Bona bema oi ia habadua tauna ena dika oi laloaboio, unai be kara namo hereana.+
12 King ena badu be laiona ta ena boiboi bamona,+To ena lalonamo be ava ai ia noho daba paripari bamona.
13 Kavakava merona ese ena tamana dekenai hisihisi ia mailaia,+Bona hepapahuahu momo* hahine be guhi ena matu amo ia diho ranu bamona, ia doko diba lasi.+
14 Tau ta be ena tamana amo ruma bona taga ia abia,To aonega hahine be Iehova ena harihari gauna.+
15 Lahedo tauna ia mahuta momo,Bona hesiku bada tauna be do ia hitolo.+
16 Dirava ena oda herevadia ia badinaia tauna be do ia mauri noho,+To dala kereredia ia badinaia tauna be do ia mase.+
17 Dabu tauna dekenai hebogahisi ia hahedinaraia tauna be Iehova dekenai ia henitorehai,+Bona ia karaia gaudia dainai Dirava ese davana namona do ia henia.+
18 Dala ia noho lalonai emu natuna oi matahakani henia be namo,+Namo lasi iena mase dainai kerere oi abia.+
19 Badu dikadika tauna be dika davana do ia abia,Bema oi ura dika amo ia oi gimaia, unai do oi karaia loulou.+
20 Sisiba oi kamonai bona matahakani oi abia dae,+Unai amo emu vaira negana ai do oi aonega.+
21 Tau ta ena kudouna ai palani be momo,To Iehova ena sisiba* be do ia noho hanaihanai.+
22 Tau ta ese haida dekenai ia hahedinaraia lalokau* be iena hairai,+Bona ogogami tauna ena namo ese koikoi tauna ena namo ia hereaia.
23 Iehova gari henia karana be mauri ia lao henia,+Unai mauri ia abia tauna be do ia laga-ani namonamo, dika ta be lasi.+
24 Lahedo tauna be aniani disi lalonai ena imana ia atoa vareai,To ia ura lasi ena uduna lalonai aniani ia atoa.+
25 Ma haida ia hevasehalaia tauna oi kwadia,+ unai amo diba bada lasi tauna be do ia aonega,+Bona laloparara tauna do oi sisiba henia, unai amo ena diba do ia habadaia.+
26 Bema natuna mero ese ena tamana ia dagedage henia bona ena sinana ia lulua,Ia ese ladana ia hadikaia bona hemarai ia mailaia.+
27 Egu natuna mero e, bema matahakani herevadia oi kamonai lasi,Oi be aonega herevadia amo oi raka siri unai.
28 Sivarai koikoi gwauraia tauna ese kota maoromaoro karana ia kirikirilaia,+Bona kara dika taudia be ma haida hahisia karadia idia moalelaia, aniani idia hadonoa bamona.+
29 Haida idia hevasehalaia taudia be hahemaoro do idia abia,+Bona kavakava taudia edia doruna idia kwadia.+
Futnout
^ Heb., “ena aena ia haraga.”
^ Eiava “hariharibada tauna.”
^ Heb., “namo.”
^ Eiava “hereva momo.”
^ Eiava “ura.”
