Aonega Herevadia 22:1-29
22 Ladana namona ese kohu momo ia hereaia,+Ta matauraia karana ese siliva bona golo ia hereaia.
2 Taga tauna bona ogogami tauna be hegeregere,
Iehova ese idia ia karaia.+
3 Aonega tauna ese dika ia itaia bona ia raka siri,To diba bada lasi tauna be ia lao noho bona dika ia davaria.
4 Bema oi manau bona Iehova oi gari henia,Dirava ese oi do ia hanamoa, hairai do ia henia bona do oi mauri daudau.+
5 Kara dika tauna ena dala ai ava ginigini bona tarapu idia noho,To ena mauri ia laloa bada tauna be unai gaudia amo ia noho daudau.+
6 Mero* dekenai dala maorona oi hadibaia,+Ia buruka neganai unai dala do ia rakatania lasi.+
7 Taga tauna ese ogogami tauna ia lohiaia,Bona abitorehai tauna be henitorehai tauna ena hesiai tauna.+
8 Kara maoromaoro ia karaia lasi tauna ese dika do ia davaria,+Bona mai dagedage ida ia lohia karana* be do ia ore.+
9 Hariharibada tauna be do idia hanamoa,Badina ena aniani be ogogami tauna ida ia haria.+
10 Hemataurai lasi tauna oi lulua,Bona heai do ia ore,Hepapahuahu bona ta hadikaia herevadia do idia ore.
11 Bema tau ta ia laloa goevagoeva bona hereva namodia ia gwauraia,Ia be king ena turana ai do ia lao.+
12 Iehova ese mai ena diba tauna ia gimaia,To Dirava ese koikoi tauna ena hereva ia koua.+
13 Lahedo tauna ia gwau: “Laiona ta be murimuri ai ia noho!
Lau be ariara huanai do ia hamasea!”+
14 Dika karaia hahine* ena uduna be guri dobuna bamona.+
Iehova ese ia gwauraia dika tauna be unai guri lalonai do ia moru.
15 Mero* ena kudouna ai kavakava lalohadai ia noho,+To matahakani auna ese unai do ia kokia.+
16 Iena kohu habadaia totona ogogami tauna ia koia tauna+Bona taga taudia dekenai harihari gaudia ia henia taunaBe do idia ogogami.
17 Emu taiana oi kehoa bona aonega taudia edia hereva oi kamonai,+Unai amo mai kudouna ibounai ida egu diba do oi abia dae.+
18 Badina emu kudouna ai unai diba ia noho be namo,+Unai amo nega ibounai ma haida dekenai do oi herevalaia.+
19 Emu abidadama Iehova dekenai ia goada totona,Hari lau ese oi dekenai diba lau henia noho.
20 Lau ese oi lau tore henia vadaeni,Sisiba bona diba lau henia,
21 Oi dekenai hereva momokani bona hereva maorodia lau hadibaia,Unai amo oi ia siaia tauna dekenai ripoti maorona oi henia diba.
22 Ogogami tauna ena gau ta oi henaoa lasi, badina ia be ogogami,+Bona siti ena geiti ai dagi bada lasi tauna oi hahisia lasi,+
23 Badina Iehova be kota ai idia do ia durua,+Bona koikoi dalanai edia kohu idia abia taudia edia mauri do ia kokia.
24 Ia badu haraga tauna oi bamoa lasiEiava ia badu dikadika tauna ida oi noho hebou lasi,
25 Unai amo iena kara do oi manadalaia lasiBona tarapu ai do oi moru lasi.+
26 Namo lasi gwauhamata karaia totona imana idia udeudea tauna ta ai oi lao,Haida edia abitorehai henia lou totona gwauhamata idia karaia taudia unai.+
27 Bema oi be hegeregere lasi davana henia totona,Emu mahuta patana be oi amo do idia kokia!
28 Idaunegai idia atoa tano hetoana ena maka umui kokia lasi,Unai be emui sene taudia ese idia atoa maka.+
29 Gaukara karaia namonamo tauna ta oi itaia, a?Ia be king taudia vairanai do ia gini.+Ia be ladana maragi taudia vairanai do ia gini lasi.
Futnout
^ Eiava “natuna maragina; matamata tauna.”
^ Heb., “ena badu ena itotohi.”
^ Eiava “natuna maragina; matamata tauna.”
