Apokalupo—Ioane Ia Abia Herevana 14:1-20
14 Vadaeni lau itaia, Mamoe Natuna+ be Siona Ororo+ dekenai ia gini bona ia ida be taunimanima 144,000,+ bona edia baguna ai iena ladana bona iena Tamana ena ladana idia noho.+
2 Guba amo rege ta lau kamonai, unai rege be ia aru haraga ranu bamona bona guba boiboi badana bamona. Oibe, lau kamonai regena be hegeregere ane abia taudia ese edia hap* idia gadaralaia bona ane idia abia bamona.
3 Bona idia be terona vairanai bona mauri gaudia 4+ bona tau badadia+ edia vairanai idia gini, bona toana be ane matamatana idia abia.+ Tau ta be unai ane ia dibaia diba lasi, to taunimanima 144,000 sibona,+ idia be Dirava ese tanobada amo ia hoia.
4 Idia be idia goeva, badina hahine ida idia mahuta hebou lasi. Oibe, idia be idia kara goeva.*+ Bona herevana Mamoe Natuna be edeseni ia lao, idia be ia murinai idia raka noho.+ Idia be huahua ginigunadia bamona,+ bona Dirava ese taunimanima huana amo idia ia hoia,+ bona idia be Dirava bona Mamoe Natuna edia.
5 Bona edia uduna dekenai hereva koikoi ta be lasi, bona idia dekenai miro ta be lasi.+
6 Vadaeni aneru ma ta lau itaia, guba* ai ia roho lao, bona ia ese noho hanaihanai sivarai namona be tanobada ai idia noho taudia, bese ibounai bona iduhu ibounai, gado ibounai, bona kopi idauidau taudia ibounai dekenai ia gwauraia.+
7 Ia hereva badabada, ia gwau: “Dirava umui gari henia bona ia umui hanamoa, badina iena hahemaoro negana be ia ginidae vadaeni,+ unai dainai guba, tanobada, davara,+ bona idia lohilohi ranudia ia karaia Diravana do umui tomadiho henia.”
8 Aneru ma ta, aneru iharuana ia mai, ia gwau: “Unai hahine ia moru vadaeni! Oibe, Babulonia Badana+ be ia moru vadaeni,+ ia ese bese ibounai dekenai ena matabodaga karadia* ena wain* ia henia, idia inua totona!”+
9 Aneru ma ta, aneru ihatoina unai, be idia murinai ia mai, ia hereva badabada, ia gwau: “Bema ta ese dagedage animal+ bona ena laulau ia tomadiho henia, bona ena baguna eiava ena imana dekenai maka ia abia,+
10 ia danu be Dirava ena badu ena wain do ia inua, unai be ranu amo idia mikisia lasi gauna, unai wain be Dirava ena badu+ ena kapusi lalonai do idia bubua, bona aneru helagadia bona Mamoe Natuna vairanai unai tauna be lahi bona salipa amo do idia hahisia.+
11 Bona unai taudia edia hisihisi ena kwalahu be ia daekau ela bona hanaihanai,+ idia be dina bona hanuaboi idia laga-ani lasi. Idia ese dagedage animal bona ena laulau idia tomadiho henia bona ena ladana ena maka idia abia.+
12 Unai dainai helaga taudia, oibe, Dirava ena taravatu idia badinaia bona Iesu ena abidadama idia tohotohoa taudia unai,+ idia haheauka be gau badana.”+
13 Bona guba amo gado ta lau kamonai, ia gwau: “Inai hereva oi torea: Inai nega amo, Lohiabada ida idia hakapua bona idia mase taudia be idia moale.+ Oibe, lauma helaga ia gwau, idia be edia hekwarahi amo idia laga-ani be namo, badina idia karaia gaudia be idia ida nega tamona do idia lao.”
14 Bena ori kurokuro ta lau itaia, bona ia latanai tau ta ia helai, iena toana be taunimanima ena natuna bamona,+ iena kwarana dekenai be golo korona, bona iena imana ai be kaia ta mai matana.
15 Aneru ma ta be dubu helaga ena daiutu helagadia amo ia mai, bona ori latanai ia helai tauna dekenai ia boiboi, ia gwau: “Oiemu kaia oi abia bona anina oi utua, badina anina utua negana be ia ginidae vadaeni, tanobada ena anina be idia mage vadaeni gogoa totona.”+
16 Bona ori latanai ia helai tauna ese ena kaia be tanobada dekenai ia atoa, bona tanobada ena anina ia utua.
17 Bona aneru ma ta danu ia mai, ia be guba ai ia noho dubu helaga ena daiutu helagadia amo ia mai, bona ia danu ese kaia mai matana ia dogoatao.
18 Bona aneru ma ta danu be pata helagana amo ia mai, bona ia be mai ena siahu lahi ia biagua totona. Bona kaia mai matana ia dogoatao tauna dekenai ia boiboi, ia gwau: “Oiemu kaia mai matana oi abia bona tanobada ena vain huahua oi utua, badina vain ena anina be idia mage vadaeni.”+
19 Bona aneru ese iena kaia be tanobada dekenai ia atoa bona tanobada ena vain ia utua, bona Dirava ena badu ena vain huahua moia gabuna badana dekenai ia negea vareai.+
20 Siti ena murimuri ai vain huahua idia moia, bona unai moia gabuna amo rara ia raka-lasi, bona ia bada daekau ela bona hosi ena uduna dekenai, bona ia koua gabuna ena daudau be 1,600 stadia.*
Futnout
^ Miusiki gauna ta mai ena varo, gita bamona, to ena toana be idau.
^ Gr., “rami-hebou taudia.”
^ Inai Grik herevana ese manu idia roho gabuna ia herevalaia.
^ Eiava “matabodaga karadia karaia ena ura goadana.”
