Apokalupo—Ioane Ia Abia Herevana 17:1-18
-
“Babulonia Badana” ena panisi (1-18)
17 Disi 7+ idia dogoatao aneru 7 amo ta ia mai bona lau dekenai ia gwau: “Mai, lau ese oi dekenai inai ladana bada ariara hahine, ranu momo latanai ia helai hahinena, ena panisi do lau hahedinaraia.+
2 Ia be tanobada ena king taudia ida matabodaga karadia* idia karaia,+ bona tanobada ai idia noho taudia be ena matabodaga karadia* ena wain amo idia kekero.”+
3 Bona lauma helaga ena siahu amo unai aneru ese taunimanima lasi gabuna dekenai lau ia abia lao. Bona lau ese hahine ta lau itaia, ia be dagedage animal kakakakana latanai ia helai, unai dagedage animal be Dirava hadikaia ladadia amo ia honu, ena kwarana be 7 bona ena doana be 10.
4 Unai hahine ese pepol+ bona kakakaka dabuana ia hahedokilaia, bona golo, dava bada nadi, bona pel nadi amo sibona ia hahairaia.+ Bona ena imana dekenai golo kapusi ia dogoatao, unai kapusi be gau dika rohorohodia bona ena matabodaga karadia* ena gau mirodia amo ia honu.
5 Iena baguna ai ladana ta ia noho, unai ladana be hunia gauna: “Babulonia Badana, ariara hahinedia bona tanobada ena gau dika rohorohodia edia sinana.”+
6 Bona lau itaia, unai hahine be helaga taudia edia rara bona Iesu idia gwauraia hedinarai taudia edia rara amo ia kekero.+
Ia lau itaia neganai, lau hoa bada.
7 Vadaeni aneru be lau dekenai ia gwau: “Dahaka dainai oi hoa? Lau ese oi dekenai unai hahine bona dagedage animal edia hunia herevana do lau gwauraia.+ Unai hahine be dagedage animal latanai ia helai, unai animal be mai ena kwarana 7 bona doana 10.+
8 Oi itaia vadaeni dagedage animal be guna ia noho, to hari ia noho lasi, to kahirakahira guri dobu masemase amo do ia daekau,+ bona do idia hadikaia ore. Bona tanobada ai idia noho taudia, taunimanima idia vara negana amo ema bona hari, edia ladadia be mauri bukana+ ai idia torea lasi taudia unai, do idia itaia, dagedage animal be guna ia noho, to hari ia noho lasi, bona gabeai do ia hedinarai neganai, do idia hoa.
9 “Mai ena aonega tauna ese inai gauna ena anina do ia diba: Unai kwarana 7+ ese ororo 7 idia laulaulaia, unai hahine be idia latanai ia helai.
10 Bona king 7 idia noho, idia 5 be idia moru vadaeni, bona idia ta be hari ia do noho, to ma ta be ia do ginidae lasi, to ia ginidae neganai, nega sisina do ia noho.
11 Bona unai dagedage animal, guna ia noho, to hari ia noho lasi,+ ia be king namba 8. To ia be king 7 amo ia mai, bona ia be do idia hadikaia ore.
12 “Oi itaia vadaeni doana 10 ese king 10 idia laulaulaia, idia be basileia idia do abia lasi, to hora tamona lalonai dagedage animal ida king siahuna do idia abia.
13 Unai king taudia edia lalohadai be tamona, unai dainai edia goada bona siahu be unai dagedage animal dekenai idia henia.
14 Idia be Mamoe Natuna+ ida do idia tuari, to ia be lohia ibounai edia Lohia+ bona king ibounai edia King dainai, ia ese idia do ia halusia.+ Danu, Dirava ese ia boiria bona ia abia hidi taudia, ia idia badinaia taudia unai, ese unai king taudia do idia halusia danu.”+
15 Aneru be lau dekenai ia gwau: “Oi itaia vadaeni ranu momo, ariara hahine ia helai gabuna unai, ese kopi idauidau taudia, hutuma, bese bona gado idauidau taudia ia laulaulaia.+
16 Bona oi itaia vadaeni doana 10+ bona dagedage animal+ ese ariara hahine do idia inai henia+ bona ena gau ibounai do idia kokia bona kopina kavakava do idia rakatania. Vadaeni iena tauanina do idia ania, bona lahi dekenai do idia gabua ore.+
17 Badina Dirava ese iena palani be edia kudouna dekenai ia atoa, iena ura idia hagugurua totona,+ oibe, edia lalohadai tamona hagugurua totona, idia ese dagedage animal dekenai edia basileia do idia henia.+ Unai bamona do idia karaia ela bona Dirava ena hereva ibounai idia guguru.
18 Bona oi itaia vadaeni hahine+ ese siti badana ia laulaulaia, unai siti ese tanobada ena king ibounai ia lohiaia.”
