Apokalupo—Ioane Ia Abia Herevana 4:1-11
4 Unai murinai, guba dekenai ia kehoa noho iduara ta lau itaia, bona lau kamonai gado ginigunana be kibi ena regena bamona, bona lau ia hereva henia, ia gwau: “Oi daekau mai iniseni, bona do idia vara gaudia be oi dekenai do lau hahedinaraia.”
2 Unai murinai, maoromaoro lauma helaga ena siahu lau abia, vadaeni guba dekenai terona ta lau itaia, bona tau ta be unai terona latanai ia helai.+
3 Bona ia helai tauna ena toana be iasipa nadi+ bona sadio nadi* bamona. Bona kevau ta ese terona ia hagegea, unai kevau ena toana be samaragi nadi bamona.+
4 Terona 24 ese unai terona idia hagegea, bona lau itaia, unai terona latadiai be tau badadia 24 idia helai,+ idia be dabua kurokuro idia karaia, bona edia kwarana ai be golo korona idia noho.
5 Unai terona amo kevaru,+ gado regedia, bona guba ena boiboi idia mai,+ unai terona vairanai lamepa 7 idia araia noho, bona edia anina be Dirava ena lauma 7.+
6 Unai terona vairanai galasi bamona davara ta ia noho+ bona ia diaridiari.
Bona mauri gaudia 4 be terona badinai idia gini hegege,+ edia vairana bona murina be matana amo idia honu.
7 Mauri gauna ginigunana ena toana be laiona bamona,+ mauri gauna iharuana ena toana be boromakau natuna bamona,+ mauri gauna ihatoina+ ena vairana be taunimanima ena vairana bamona, bona mauri gauna namba 4+ ena toana be ia roho ugava manu bamona.+
8 Unai mauri gaudia 4, idia ta ta be mai edia hanina 6, bona inai hanina edia lalona bona murina be matana amo idia honu.+ Dina bona hanuaboi idia hereva noho, idia gwau: “Iehova* Dirava, Siahu Ibounai Diravana be helaga, helaga, helaga,+ gunaguna ia noho, harihari ia noho, bona do ia mai.”+
9 Unai mauri gaudia 4 ese terona latanai ia helai Diravana dekenai hanamoa, hemataurai, bona tanikiu karana idia henia. Ia be ia mauri noho ela bona hanaihanai Diravana. Ia dekenai unai bamona idia karaia negadia ai,+
10 tau badadia 24+ be terona latanai ia helai Diravana, ia mauri noho ela bona hanaihanai Diravana, ena vairanai idia tui diho bona ia idia tomadiho henia, bona edia korona be terona vairanai idia negea diho, idia gwau:
11 “Iehova,* aiemai Dirava e, oi be hegeregere momokani, hairai,+ hemataurai,+ bona siahu oi abia totona,+ badina oi ese gau ibounai oi havaraia+ bona oiemu ura dainai idia noho bona oi havaraia.”
