Apokalupo—Ioane Ia Abia Herevana 5:1-14
5 Bona lau itaia, terona latanai ia helai Diravana+ ena imana idibana ai lokua toretore ta ia noho, bona ena lalona bona murina kahana be mai edia toretore bona maka gaudia 7 amo idia koua momokani.
2 Bona aneru goadana ta lau itaia, ia hereva badabada, ia gwau: “Daika ia hegeregere inai lokua toretore ena koua gaudia ia kokia bona ia kehoa totona?”
3 To guba ai eiava tanobada ai eiava tano henunai, tau ta ia hegeregere lasi unai lokua toretore ia kehoa bona ena lalona ia itaia.
4 Lau tai dikadika, badina tau ta be ia hegeregere lasi unai lokua toretore ia kehoa bona ena lalona ia itaia.
5 To unai tau badadia ta be lau dekenai ia gwau: “Oi tai lasi. Iuda iduhu ena Laiona,+ ia be Davida ena ramuna amo,+ ia kwalimu vadaeni,+ bona ia hegeregere inai lokua toretore ena koua gaudia 7 ia kokia bona lokua toretore ia kehoa.”
6 Bona lau itaia, mamoe natuna ia gini noho, toana be guna ia be ta ese ia hamasea.+ Bona terona badinai mauri gaudia 4 idia gini bona mamoe natuna+ be edia vairanai bona idia be tau badadia ese idia hagegea.+ Bona mamoe natuna be mai ena doana 7 bona matana 7. Unai matana 7 edia anina be Dirava ena lauma 7,+ tanobada ibounai dekenai ia siaia gaudia unai.
7 Mamoe Natuna ia lao, bona terona latanai ia helai Diravana ena imana idibana amo maoromaoro unai lokua toretore ia abia.+
8 Lokua toretore ia abia neganai, mauri gaudia 4 bona tau badadia 24+ be Mamoe Natuna vairanai idia tui diho. Idia ta ta be mai edia hap,* bona mai edia golo urodia, unai uro be bonana namo muramura amo idia honu. (Kwalahu ena anina be helaga taudia edia guriguri.)+
9 Bona idia ese inai ane matamata idia abia:+ “Oi be oi hegeregere lokua toretore oi abia bona ena koua gaudia oi kokia, badina guna oi idia hamasea bona oiemu rara amo iduhu, gado, kopina, bona bese idauidau taudia oi hoia, Dirava idia hesiai henia totona.+
10 Bona oi ese idia be iseda Dirava ena king bona hahelaga taudia ai oi halaoa,+ bona idia be tanobada do idia lohiaia.”+
11 Vadaeni lau itaia, aneru momo ese terona idia hagegea, bona edia gadona lau kamonai. Idia ese mauri gaudia, bona tau badadia idia hagegea danu. Bona idia be 10 tausen momo bona tausen momo.*+
12 Idia boiboi badabada, idia gwau: “Guna idia alaia mase Mamoe Natuna+ be ia hegeregere, siahu, taga, aonega, goada, hemataurai, hairai, bona hahenamo ia abia totona.”+
13 Bona mauri gaudia ibounai guba ai, tanobada ai, tano henunai,+ bona davara ai, oibe, idia lalonai idia noho gaudia ibounai lau kamonai idia gwau: “Terona latanai ia helai Diravana+ bona Mamoe Natuna dekenai,+ hahenamo, hemataurai,+ hairai, bona siahu do idia noho ela bona hanaihanai.”+
14 Unai mauri gaudia 4 idia gwau: “Amen!” Bona tau badadia idia tui diho bona Dirava idia tomadiho henia.
Futnout
^ Miusiki gauna ta mai ena varo, gita bamona, to ena toana be idau.
^ Eiava “ten tausen momo, bona tausen momo.”
