Deuteronomi 1:1-46
1 Ioridane kahirakahira ia noho taunimanima lasi gabuna ai Mose ese Israela taudia ia hereva henia. Unai gabu be Sufu vairanai ia noho, bona ia be Parana, Topele, Labana, Haseroto, bona Disahaba edia huanai.
2 Horeba amo Kadesi-baranea+ dekenai lao ena daudau be dina 11, bona unai dala be Seiri Ororo dekenai ia doko.
3 Lagani namba 40+ ena hua namba 11 ai, unai be hua ena dina ginigunana ai, Mose be Iehova ese ia hamaoroa hereva ibounai be Israela taudia* dekenai ia gwauraia.
4 Ia ese Amoro taudia edia King Sihona,+ Hesebona ai ia noho tauna unai, bona Basana ena king Oga,+ Ederei ena siti Asataroto ai ia noho tauna unai, ia halusidia murinai, unai hereva ia gwauraia.+
5 Moaba tanona ai, Ioridane ena ist kahana ai, Mose ese inai Taravatu ia gwauraia hedinarai,+ ia gwau:
6 “Horeba ai Iehova iseda Dirava be ita dekenai ia gwau, ‘Umui be nega daudau inai ororo gabudia ai umui noho vadaeni.+
7 Umui toreisi bona Amoro taudia edia ororo gabudia+ bona edia dekena hanuadia dekenai umui lao, unai be Arabaha,+ ororo gabudia, Sepala, Negebe, kone kahana,+ Kanana taudia edia tano, Lebanona,*+ ela bona sinavai badana dekenai, unai be Euperate sinavai.+
8 Kamonai, inai tano be umui emui vairanai lau atoa vadaeni. Umui lao bona unai tano umui abia. Iehova ese emui sene taudia, Aberahamo, Isako,+ bona Iakobo+ dekenai ia gwauhamata, unai tano be idia bona edia bese taudia dekenai do ia henia.’+
9 “Lau ese unai negai emui sene taudia lau hamaoroa, ‘Lau be hegeregere lasi umui lau hakaua totona.+
10 Iehova emui Dirava ese emui namba ia habadaia, bona hari umui be momo herea guba ena hisiu edia momo hegeregerena.+
11 Namona be Iehova, emui sene taudia edia Dirava, ese emui namba be nega tausen do ia habadaia+ bona namona be umui ia hanamoa, ia gwauhamata hegeregerena.+
12 Lau ese emui metau bona hekwakwanai be edena bamona lau huaia diba? Bona edena bamona emui hepapahuahu lau haheaukalaia diba?+
13 Emui iduhu amo tatau mai edia aonega, laloparara, bona diba umui abia hidi, bona lau ese idia be emui gunalaia taudia ai do lau halaoa.’+
14 Umui ese lau umui haere henia, umui gwau, ‘Ia namo, ai oi hamaoroa gaudia do ai karaia.’
15 Unai dainai lau ese emui iduhu kwaradia amo mai edia aonega bona diba tatau lau abia bona emui gunalaia taudia ai lau halaoa. Idia haida be tuari orea 1,000 ta ta idia gunalaia, haida be tuari orea 100 ta ta idia gunalaia, haida be tuari orea 50 ta ta idia gunalaia, bona haida be tuari orea 10 ta ta idia gunalaia. Bona emui iduhu edia naria taudia danu lau abia hidi.+
16 “Unai nega ai, emui hahemaoro taudia lau hadibaia: ‘Emui tadikaka edia huanai hekwakwanai idia vara bona emui vairanai idia mai neganai, namona be kara maoromaoro dalanai idia umui hahemaoro henia,+ herevana unai be Israela taudia rua huanai eiava Israela tauna ta bona idau tauna ta huanai.+
17 Namo lasi emui hahemaoro karana lalonai haida sibona umui kara namo henia.+ Ladana bada tauna umui kamonai henia hegeregerena, ladana maragi tauna danu be unai bamona do umui kamonai henia.+ Namo lasi taunimanima dekenai umui gari,+ badina hahemaoro be Dirava ena.+ Bona bema umui dekenai kota herevana ta ia auka, namona be lau dekenai umui mailaia, bona lau ese do lau kamonaia.’+
18 Unai nega ai lau ese umui karaia gaudia ibounai be umui dekenai lau hadibaia.
19 “Bena Horeba ita rakatania bona taunimanima lasi gabuna badana mai garina ita hanaia,+ guna Amoro taudia edia ororo gabudia umui lao henia neganai, unai gabu umui itaia.+ Iehova iseda Dirava ese ita ia oda henia hegeregerena, bena Kadesi-baranea dekenai ita ginidae.+
20 Bena umui dekenai lau gwau, ‘Umui be Amoro taudia edia ororo gabudia ai umui ginidae inai, Iehova iseda Dirava ese inai tano be ita dekenai ia henia.
21 Kamonai, Iehova emui Dirava ese inai tano be umui dekenai ia henia vadaeni. Umui lao bona unai tano umui abia, Iehova, emui sene taudia edia Dirava ese umui ia hamaoroa hegeregerena.+ Namo lasi umui gari.’
22 “To, umui ibounai be lau dekenai umui mai bona umui gwau, ‘Namona be tatau haida ita siaia tano idia sekea totona, bona idia giroa mai bona ita idia hadibaia edena dala amo do ita lao, bona edena bamona siti idia noho.’+
23 Lau laloa edia hereva be namo, unai dainai iduhu ta ta totona tatau 12 lau abia hidi.+
24 Vadaeni ororo gabudia dekenai idia lao+ bona Esakolo Koura dekenai idia ginidae bona tano idia sekea.
25 Idia ese unai tano ena huahua haida idia abia bona ai dekenai idia mailaia bona unai tano ena sivarai idia gwauraia danu, idia gwau, ‘Iehova iseda Dirava ese ita dekenai do ia henia tano be namo.’+
26 To umui ura lasi umui daekau, bona Iehova emui Dirava ena oda hereva umui kamonai henia lasi.+
27 Emui palai rumadia lalonai umui maumau noho, umui gwau, ‘Iehova ese ita ia inai henia dainai Aigupito amo ita ia hakaua raka-lasi bona Amoro taudia dekenai ia henia, ita idia hadikaia ore totona.
28 Ita be edena bamona gabu dekenai ita lao noho? Emai tadikaka ese emai lalona idia hamanokaia,+ idia gwau, “Idia be taunimanima badadia bona latadia momokani, ita hegeregerena lasi, bona edia siti be bada bona mai edia magu aukadia bona latadia,+ bona unuseniai Anakima taudia ai itaia.”’+
29 “Vadaeni umui dekenai lau gwau, ‘Namo lasi idia dainai umui gari.+
30 Iehova emui Dirava be emui vairanai do ia lao bona umui totona do ia tuari,+ guna Aigupito ai emui vairanai ia karaia bamona.+
31 Bona taunimanima lasi gabuna ai umui itaia, Iehova emui Dirava ese umui lao gabudia ibounai dekenai umui ia hakaua ela bona inai gabu ai umui ginidae, tamana ta ese ena natuna mero ia hakaua bamona.’
32 Herevana unai ibounai ia vara, to Iehova emui Dirava umui abidadama henia lasi,+
33 ia be umui emui vairanai ia lao, do umui kamepa gabuna be umui dekenai ia hahedinaraia totona. Hanuaboi ai lahi amo ia hedinarai bona dina ai ori amo ia hedinarai, emui raka dalana ia hahedinaraia totona.+
34 “To unai nega ibounai lalonai Iehova be emui hereva ia kamonai bona ia badu bona inai gwauhamata metauna ia gwauraia,+
35 ‘Inai uru dikana amo idia ta ese inai tano namona, guna lau gwauhamata emui sene taudia dekenai do lau henia tanona unai, be do idia itaia lasi,+
36 to Iepune ena natuna Kaleba sibona. Ia ese unai tano do ia itaia, iena aena amo ia moia tanona be ia bona ena natudia dekenai do lau henia, badina mai ena kudouna ibounai ida Iehova ia badinaia.+
37 (Umui dainai Iehova be lau dekenai ia badu danu, bona ia gwau, “Oi danu be unai tano lalonai do oi vareai lasi.+
38 Umui emui vairanai ia gini tauna, Nunu ena natuna Iosua,+ be unai tano lalonai do ia vareai.+ Ia be goada ia abia,*+ badina ia ese Israela taudia do ia hakaua vareai unai tano idia abia totona.”)
39 Danu, guna umui gwau emui natudia be umui amo do idia abia siri,+ bona hari idia be namo bona dika idia diba lasi, to idia be inai tano dekenai do idia lao, bona idia dekenai do lau henia idia noholaia totona.+
40 To umui be do umui giroa lou bona tano kaukau gabuna dekenai do umui lao, Davara Kakakaka ena dala amo.’+
41 “Unai neganai lau dekenai umui gwau, ‘Ai be Iehova dekenai ai kara dika vadaeni. Do ai daekau bona tuari, Iehova emai Dirava ese ai ia oda henia hegeregerena!’ Unai dainai umui ta ta ese emui tuari kohudia umui abia, bona umui laloa tuari totona ororo dekenai umui daekau be gau maragina sibona.+
42 To Iehova be lau dekenai ia gwau, ‘Idia oi hamaoroa: “Namo lasi umui daekau lao bona tuari, badina lau be umui ida lau noho lasi.+ Bema umui lao, emui inai taudia ese umui do idia halusia.”’
43 Vadaeni umui lau hereva henia, to umui kamonai lasi. Bona Iehova ena oda hereva umui badinaia lasi, umui hekokoroku bona ororo umui daekau.
44 Bena ororo ai idia noho Amoro taudia idia raka-lasi bona umui idia tuari henia, bona idia be nanigo bamona umui idia lulua ela bona Seiri, bena idia lulua lao ela bona Horoma dekenai.
45 Vadaeni umui giroa mai bona Iehova vairanai umui taitai, to Iehova ese umui ia kamonai henia lasi.
46 Unai dainai umui be Kadesi dekenai nega daudau umui noho.
Futnout
^ Heb., “Israela ena natudia memero.”
^ Lebanona ena ororo gabudia.
^ Eiava reana, “Dirava ese ia hagoadaia.”
