Deuteronomi 13:1-18
-
Aposteit taudia kara henia dalana (1-18)
13 “Bema umui huanai peroveta tauna eiava nihi amo vaira nega ia gwauraia tauna be umui dekenai toa eiava hoa karana ta ia karaia,
2 bona ia gwauraia toa eiava hoa karana be ia vara momokani, bena ia gwau, ‘Namona be dirava ma haida murinai ita raka, umui diba lasi diravadia unai, bona idia ita hesiai henia,’
3 namo lasi unai peroveta tauna eiava nihi gwauraia tauna ena hereva umui kamonai henia,+ badina Iehova emui Dirava be umui ia tohoa noho,+ ia ura diba bema umui be mai emui kudouna ibounai bona mauri* ibounai ida Iehova emui Dirava umui lalokau henia.+
4 Namona be Iehova emui Dirava murinai umui raka, ia umui gari henia, iena oda herevadia umui badinaia, iena hereva umui kamonai henia, ia umui hesiai henia, bona ia umui badinaia momokani.+
5 To unai peroveta tauna eiava nihi gwauraia tauna umui hamasea be namo,+ badina ia ese Iehova emui Dirava, Aigupito amo umui ia hakaua raka-lasi bona igui hesiai gaukara umui karaia tanona amo umui ia hamauria Diravana, gwau-edeede henia karana ia havaraia. Ia ura emui lalona ia veria, Iehova emui Dirava ese ia gwauraia dalana umui badinaia lasi totona. Bona namona be emui huanai dika gauna umui kokia.+
6 “Bema emu tadikaka, emu sinana ena natuna mero unai, eiava emu natuna mero eiava emu natuna kekeni, eiava emu adavana lalokauna, eiava emu turana namona ta ese hunia dalanai emu lalona ia veria toho, ia gwau, ‘Namona be ita lao bona dirava ma haida ita hesiai henia,’+ oi eiava emu sene taudia idia diba lasi diravadia,
7 umui idia hagegea besedia ibounai edia dirava unai, herevana idia be umui kahirakahira idia noho eiava daudau idia noho, tano ena kahana ta amo ela bona tano ena kahana ma ta dekenai idia noho,
8 namo lasi ena hereva oi abia dae eiava ia oi kamonai henia,+ bona namo lasi ia oi hebogahisi henia eiava oi gimaia.
9 To, ia oi hamasea be namo.+ Oi ese nadi amo ia oi hodoa guna ia mase totona, unai murinai taunimanima ibounai ese ia do idia hodoa mase.+
10 Namona be nadi amo ia oi hodoa mase,+ badina ia ura Iehova emu Dirava, igui hesiai gaukara umui karaia tano, Aigupito amo umui ia hakaua raka-lasi Diravana amo oi ia hakaua siri.
11 Bena Israela taudia ibounai be unai do idia kamonai bona do idia gari, bona umui huanai unai bamona kara dika ta do idia karaia lou lasi.+
12 “Iehova emui Dirava ese umui ia henia siti ta dekenai bema umui kamonai, idia gwau,
13 ‘Anina lasi tatau haida be umui huanai idia lao vadaeni, edia siti taudia idia hakaua kerere totona, idia gwau: “Namona be ita lao bona dirava ma haida ita hesiai henia,” umui diba lasi diravadia unai,’
14 namona be unai sivarai umui tahua namonamo bona haida umui nanadaia,+ bona bema umui huanai inai gau dika rohoroho be ia vara momokani,
15 namona be unai siti taudia be tuari kaia amo umui hamasea.+ Bona unai siti bona ia lalonai idia noho gaudia ibounai, bona animal danu be tuari kaia amo do umui hadikaia ore.+
16 Bona tuari amo umui abia kohu ibounai be siti ena ariara ena huanai umui haboua bona siti be lahi amo umui gabua, bona unai kohu be gabua ore boubou gauna Iehova emui Dirava dekenai. Unai siti be do ia dika momokani. Umui haginia lou lasi be namo.
17 Umui ese hadikaia ore totona idia atoa siri gauna ta umui abia lasi,+ unai amo Iehova ena badu ena siahu do ia ore bona umui do ia hebogahisi henia bona emui bese do ia habadaia, emui sene taudia dekenai ia gwauhamata hegeregerena.+
18 Namona be Iehova emui Dirava umui badinaia,* bona ena oda herevadia ibounai, hari dina umui dekenai lau gwauraia herevadia unai, umui badinaia, unai amo Iehova emui Dirava ena vairanai kara maorona do umui karaia noho.+
