Deuteronomi 14:1-29
14 “Umui be Iehova emui Dirava ena natudia. Namo lasi mase tauna totona sibona emui tauanina umui utua+ eiava emui matana ena ataiai huina umui sevia.+
2 Badina Iehova emui Dirava dekenai umui be helaga,+ bona Iehova ese tanobada ai idia noho taudia ibounai amo umui ia abia hidi iena taunimanima ai umui lao totona, ia dekenai umui be dava bada kohuna bamona.+
3 “Namo lasi Dirava ese ia inai henia gauna ta umui ania.+
4 To inai animal umui ania diba:+ Boromakau, mamoe, nanigosi,
5 dia idauidau,* uda nanigosi, uda mamoe, bona ororo mamoe.
6 Edia aena koukou* be kahana rua dekenai idia parara bona idia hadonoa aniani idia hadaea bona ania lou animal umui ania diba.
7 To, inai animal do umui ania lasi, idia ese idia hadonoa aniani idia hadaea bona idia ania lou eiava edia aena koukou idia parara, idia be inai: Kamelo, rabiti, bona nadi rabiti,* badina idia hadonoa aniani idia hadaea bona idia ania lou, to edia aena koukou be idia parara lasi. Umui dekenai idia be miro.+
8 Boroma danu do umui ania lasi, badina ena aena koukou ia parara to ia hadonoa aniani ia hadaea bona ia ania lou lasi. Umui dekenai idia be miro. Umui ese edia vamu umui ania lasi eiava edia mase tauanina umui dogoatao lasi.
9 “Ranu lalonai idia noho mauri gaudia ibounai amo inai umui ania diba: Mai edia dere bona unana gaudia.+
10 To dere bona unana lasi gaudia umui ania lasi. Umui dekenai idia be miro.
11 “Umui ese idia goeva manu ibounai umui ania diba.
12 To inai manu do umui ania lasi: Ugava, davara bogibada, valtsa koremana,+
13 bogibada kakakaka, bogibada koremana, bogibada idauidau ibounai,
14 galo idauidau ibounai,
15 ostris,* baimumu, davara manu,* falkon idauidau ibounai,
16 baimumu maragina bona badana, swan,
17 peliken, valtsa, komoren,*
18 noko, heron idauidau ibounai, hopo,* bona mariboi.
19 Orea dekenai idia roho manumanu ibounai danu be idia goeva lasi umui dekenai. Namo lasi umui ania.
20 To idia roho gaudia goevadia umui ania diba.
21 “Namo lasi ia mase kava animal umui ania.+ To emui siti lalodiai ia noho idau tauna dekenai umui henia bona ia ese ia ania diba, eiava idau tauna dekenai umui hoihoilaia diba. Badina umui be helaga Iehova emui Dirava dekenai.
“Namo lasi nanigosi natuna be ena sinana ena milika lalonai umui nadua.+
22 “Emui uma gabu ai umui hadoa uhe ese lagani ta ta ai ia havaraia anina ibounai ena kahana 10 ena kahana ta umui henia be namo.+
23 Umui ese emui witi, emui wain matamata, bona emui oela edia kahana 10 ena kahana ta, bona emui boromakau bona mamoe edia vara guna be Iehova emui Dirava vairanai do umui ania, ena ladana ia noho totona ia abia hidi gabuna dekenai,+ unai amo Iehova emui Dirava gari henia hanaihanai karana do umui dibaia.+
24 “Iehova emui Dirava ese ena ladana ia noho totona do ia abia hidi gabuna+ be ia daudau bona bema umui dekenai unai be laolao daudauna, bona Iehova emui Dirava ese umui ia hanamoa dainai, umui hegeregere lasi unai aniani be unuseniai umui abia lao,
25 vadaeni unai gaudia umui hoihoilaia diba, bona emui moni be imana ai umui dogoatao, bona Iehova ese do ia abia hidi gabuna dekenai umui lao.
26 Bena unai moni amo emui ura gaudia umui hoia diba, hegeregere boromakau, mamoe, nanigosi, wain, bona alkahol gaudia ma haida, bona umui ura gaudia ma haida danu. Bona unuseniai Iehova emui Dirava vairanai do umui aniani bona moale, umui bona emui ruma bese taudia.+
27 Bona namo lasi emui siti lalodiai idia noho Levi taudia umui laloaboio,+ badina umui huanai idia be ahuna lasi.+
28 “Lagani ibounai toi edia dokona ai, namona be lagani ihatoina ena uma aniani ena kahana 10 umui mailaia bona emui siti lalodiai umui atoa.+
29 Bena emui siti lalodiai idia noho Levi taudia, umui huanai ahuna idia abia lasi taudia unai, idau taudia, tamana lasi natuna,* bona vabu be do idia mai bona do idia aniani bona bogakunu,+ unai amo Iehova emui Dirava ese umui karaia gaudia ibounai lalonai umui do ia hanamoa.+
Futnout
^ Heberu toretoredia ese gazelle, roebuck bona antelope ia herevalaia.
^ Animal haida, hegeregere boromakau bona hosi edia aena ena henuna kahana aukana.
^ Ia be rabiti badana ta bamona, iuna lasi, bona nadi momo gabunai ia noho.
^ Eng., ostrich. Ia be kokokoko bamona.
^ Eng., gull.
^ Ia be manu badana bona ena aena be palaka bona ranu lalonai ia daiva bona gwarume ia abia.
^ Inai manu ena bada be pune bamona.
^ Eiava “tama sina idia mase natuna.”
