Deuteronomi 17:1-20
17 “Namo lasi Iehova emui Dirava dekenai umui bouboulaia mamoe eiava boromakau ena tauanina kahana ta be ia dika eiava mai ena bero, badina Iehova emui Dirava dekenai unai be kara dika rohoroho.+
2 “Iehova emui Dirava ese umui dekenai ia henia siti lalodiai, bema umui huanai tau eiava hahine ta be Iehova emui Dirava ena vairanai kara dikana ia karaia bona iena taravatu ia utua noho,+
3 bona dala kererena ia badinaia bona dirava ma haida ia tomadiho henia bona idia dekenai ia tui diho, eiava dina eiava hua eiava guba gaudia dekenai ia tui diho,+ lau ese unai kara dekenai maoro lau henia lasi.+
4 Bema unai sivarai be oi dekenai idia gwauraia eiava unai sivarai oi kamonai, vadaeni namona be unai oi tahua namonamo. Bona bema oi hamomokania+ unai kara dika rohoroho be Israela lalonai ia vara vadaeni,
5 namona be unai kara dikana ia karaia tau eiava hahine be siti ena geiti murimuri ai oi hakaua lao, bona unai tau eiava hahine be nadi amo idia hodoa mase be namo.+
6 Hereva hamomokania taudia rua eiava toi edia hereva sibona dainai ia idia hamasea be namo.+ To namo lasi hereva hamomokania tauna tamona ena hereva dainai ia idia hamasea.+
7 Hereva hamomokania taudia rua eiava toi ese nadi amo ia idia hodoa guna, bona unai murinai taunimanima ibounai ese ia do idia hodoa mase. Namona be emui huana amo dika gauna umui kokia.+
8 “Bema emui siti ta lalonai hekwakwanai badana ta ia vara bona umui hamaoromaoroa diba lasi, hegeregere ta ese ma ta ia hamasea+ eiava ta ese ma ta ia samania, eiava ta ese dagedage karana ia karaia eiava hepapahuahu hereva ma haida idia vara, namona be umui toreisi bona Iehova emui Dirava ese ia abia hidi gabuna dekenai umui lao.+
9 Unai negai idia gaukara Levi hahelaga taudia bona hahemaoro tauna dekenai umui lao+ bona unai gauna be idia dekenai umui herevalaia, bona idia karaia disisen be umui dekenai do idia gwauraia.+
10 Bena unai disisen be Iehova ese ia abia hidi gabuna amo umui dekenai do idia gwauraia, bona unai disisen hegeregerena umui kara. Namona be idia gwauraia hereva ibounai umui badinaia.
11 Namona be umui dekenai idia gwauraia taravatu bona disisen hegeregerena umui kara.+ Namo lasi idia gwauraia disisen amo umui raka siri, idiba eiava lauri kahana dekenai umui lao totona.+
12 Bema tau ta ia hekokoroku bona Iehova emui Dirava ena hesiai gaukara ia karaia hahelaga tauna eiava hahemaoro tauna ia kamonai henia lasi, unai tauna ia mase be namo.+ Israela huana amo dika gauna umui kokia.+
13 Bena taunimanima ibounai ese unai sivarai idia kamonai neganai do idia gari, bona do idia hekokoroku lou lasi.+
14 “Iehova emui Dirava ese umui dekenai ia henia tano umui abia bona umui noholaia neganai, do umui gwau, ‘Namona be king ta ita abia hidi ita ia biagua totona, ita idia hagegea besedia bamona,’+
15 bema unai bamona, namona be Iehova emui Dirava ese ia abia hidi tauna be king ai do umui halaoa.+ Namona be Israela tauna ta umui abia hidi king ai ia lao totona. To umui ese idau tauna, ia be emui tadikaka lasi, umui abia hidi lasi umui ia biagua totona.
16 Bona namo lasi ia ese sibona totona hosi momo ia abia+ eiava taunimanima ia hamaoroa Aigupito dekenai idia giroa lou, hosi ma haida idia abia totona,+ badina Iehova be umui ia hamaoroa vadaeni, ‘Aigupito dekenai umui giroa lou lasi.’
17 Namo lasi ia sibona totona hahine momo ia abia, dika unai ese ena kudouna ia hakaua kerere.+ Eiava namo lasi ia ese sibona totona siliva bona golo momo herea ia haboua.+
18 Ia be ena basileia ena terona latanai ia helai neganai, namona be buka* ta dekenai ia sibona totona inai Taravatu ena kopi ta ia torea, unai taravatu be Levi hahelaga taudia ese idia naria.+
19 “Unai buka be ia dekenai do ia noho, bona ena mauri dinadia ibounai lalonai do ia duahia,+ unai amo iena Dirava Iehova gari henia karana do ia dibaia bona inai Taravatu ena hereva bona oda hereva ibounai do ia badinaia.+
20 Unai amo ia be ena tadikaka huanai sibona do ia abia isi lasi, bona oda herevadia amo do ia raka siri lasi, idiba eiava lauri kahana dekenai ia lao totona. Israela taudia huanai ia be nega daudau ena basileia lalonai do ia lohia, ena bese danu.
Futnout
^ Eiava “lokua toretore.”
