Deuteronomi 20:1-20
20 “Bema umui be emui inai taudia tuari henia totona umui lao bona umui itaia edia hosi, kariota bona tuari taudia edia momo ese emui tuari taudia idia hereaia, namo lasi idia dekenai umui gari, badina Iehova emui Dirava be umui ida, ia ese Aigupito tanona amo umui ia hakaua raka-lasi.+
2 Umui be tuari totona umui lao gwauraia neganai, namona be hahelaga tauna ia lao bona taunimanima ia hereva henia.+
3 Namona be idia ia hamaoroa, ‘Israela taudia e, umui kamonai, umui be emui inai taudia do umui tuari henia. Namo lasi emui lalona idia manoka. Bona namo lasi idia dainai umui gari eiava umui heudeheude,
4 badina Iehova emui Dirava be umui ida ia raka noho, emui inai taudia tuari henia totona, bona umui ia hamauria totona.’+
5 “Danu, namona be ofesa taudia ese taunimanima idia hereva henia, idia gwau, ‘Daika be ruma matamata ia haginia bona ia do noholaia lasi? Namona be ena ruma dekenai ia giroa lou. Dika tuari lalonai ia mase bona ma ta ese ena ruma ia noholaia.
6 Bona daika ese vain umana ia karaia bona ena huahua ia do gogoa matamaia lasi? Namona be ena ruma dekenai ia giroa lou. Dika tuari lalonai ia mase bona ma ta ese ena huahua ia gogoa matamaia.
7 Bona daika be kekeni ta dekenai ia maoheni bona ia do adavaia lasi? Namona be ena ruma dekenai ia giroa lou.+ Dika tuari lalonai ia mase bona tau ma ta ese unai kekeni ia adavaia.’
8 Namona be ofesa taudia ese taunimanima idia nanadaia danu, ‘Daika ia gari momo bona ena lalona ia manoka?+ Namona be ena ruma dekenai ia giroa lou, unai amo ena tadikaka edia lalona do ia hamanokaia lasi.’+
9 Ofesa taudia ese taunimanima idia hereva henia murinai, namona be tuari biagudia idia abia hidi taunimanima idia gunalaia totona.
10 “Bema siti ta tuari henia totona umui lao kahirakahira, namona be ena taunimanima ida maino karaia herevana umui gwauraia danu.+
11 Bema idia be maino dalanai umui idia haere henia bona umui dekenai edia geiti idia kehoa, unuseniai idia noho taudia ibounai be igui hesiai taudia ai do umui halaoa, bona umui do idia hesiai henia.+
12 To bema idia ura lasi umui ida maino idia karaia bona umui idia tuari henia, namona be edia siti umui koua hagegea,
13 bona Iehova emui Dirava ese idia be emui imana dekenai do ia atoa, bona edia tatau ibounai be tuari kaia amo do umui alaia mase.
14 To hahine, natudia, animal, bona siti lalonai idia noho gaudia ibounai, bona edia kohu ibounai be umui sibona totona umui abia,+ bona emui inai taudia amo dava bada gaudia ibounai do umui abia, unai be Iehova emui Dirava ese umui dekenai ia henia gaudia.+
15 “Umui amo idia daudau herea siti dekenai unai bamona do umui karaia, idia be umui kahirakahira idia noho besedia edia siti lasi.
16 Iehova emui Dirava ese unai bese taudia edia siti be emui ahuna bamona umui dekenai do ia henia, umui ese idia ta umui hamauria lasi be namo.+
17 To, namona be Hiti taudia, Amoro taudia, Kanana taudia, Perisi taudia, Hivi taudia, bona Iebusu taudia umui hadikaia ore momokani,+ Iehova emui Dirava ese ia henia oda hegeregerena.
18 Unai amo edia dirava totona idia karaia kara dika rohorohodia be umui dekenai do idia hadibaia lasi, Iehova emui Dirava umui kara dika henia garina.+
19 “Bema umui ese siti ta umui hagegea bona dina momo lalonai umui tuari henia murinai umui abia, namo lasi ira amo ena au umui hadikaia ore. Unai au edia huahua umui ania diba, to umui utudia lasi.+ Dahaka totona au do umui hadikaia, taunimanima umui hadikaia hegeregerena?
20 Huahua umui ania lasi au sibona umui hadikaia diba. Umui utua diba bona umui gaukaralaia umui ia tuari henia siti umui hadikaia totona, ela bona unai siti ia moru.
