Deuteronomi 25:1-19
25 “Bema taunimanima rua huanai hepapahuahu ia vara, idia be hahemaoro taudia dekenai idia lao diba+ bona idia do idia hahemaoro henia, bona do idia itaia daika be ia kerere bona daika be ia maoro.+
2 Bema kerere tauna idia kwadia be maoro,+ vadaeni hahemaoro tauna ese do ia hamaoroa ia hekure totona, bona ena vairanai kerere tauna do idia kwadia. Bona nega hida do idia kwadia be ena kara dika ena bada hegeregerena.
3 Do idia kwadia diba ela bona nega 40,+ to unai idia hanaia lasi. Bema nega 40 ia hanaia bona ia idia do kwadia noho, emui tadikaka be emui vairanai do ia hemarai.
4 “Boromakau be witi ia moia neganai, namo lasi ena uduna oi koua.+
5 “Bema tadikaka be ta ta kahirakahira idia noho bona idia ta ia mase to ia be natuna mero ta ia havaraia lasi, namo lasi ia mase tauna ena adavana be famili idauna dekenai ia headava. Namona be ena nakimi ese unai hahine ia adavaia bona nakimi adavaia karana ena maduna ia hagugurua.+
6 Bona hahine ese do ia havaraia vara guna natuna mero be ena mase adavana ena natuna do idia gwauraia,+ unai amo iena ladana be Israela lalonai do ia boio lasi.+
7 “Bema unai tau ia ura lasi ena nakimi ia adavaia, ena nakimi be siti ena geiti ai idia noho tau badadia dekenai do ia lao bona ia gwau, ‘Lauegu adavana ena tadikaka ia ura lasi ena tadikaka ena ladana be Israela lalonai ia noho. Ia ura lasi lau ia adavaia bona nakimi adavaia karana ena maduna ia hagugurua.’
8 Vadaeni ena siti ena tau badadia ese ia do idia boiria bona do idia hereva henia. Bema ia goada bona ia gwau, ‘Lau ura lasi unai hahine lau adavaia,’
9 vadaeni ena tadikaka ena adavana be ia kahirakahira ia lao bona tau badadia edia vairanai ena nakimi ena sandolo be iena aena amo ia kokia,+ ena vairana dekenai ia kanudi, bona ia gwau, ‘Ena tadikaka ena famili ladana do ia abia hanai lasi tauna dekenai unai bamona do idia karaia.’
10 Unai murinai Israela ai unai tauna ena famili ladana* do idia gwauraia, ‘Sandolo idia kokia tauna ena famili.’
11 “Bema tatau rua idia heatu bona idia ta ena adavana ese ena tau be ia ia botaia noho tauna amo ia koua, bona ia ese unai tauna ena hehuni kahadia ia dogoatao,
12 namona be iena imana umui utua oho. Ia umui hebogahisi henia lasi.
13 “Namo lasi emui puse lalonai metau hahetohoa nadi idaudia rua idia noho,+ nadi badana bona maragina.
14 Namo lasi emui ruma lalonai witi bamona gaudia sikelea konteina idaudia rua* idia noho,+ konteina badana bona maragina.
15 Namona be metau hahetohoa gauna maorona bona sikele momokani umui gaukaralaia, unai amo Iehova emui Dirava ese umui dekenai ia henia tanona ai do umui noho daudau.+
16 Badina unai bamona kara gageva tauna be Iehova emui Dirava ese ia inai henia.+
17 “Aigupito amo umui raka-lasi neganai, Amaleka taudia ese umui dekenai idia karaia karana mani umui laloa,+
18 idia ese dala ai umui idia tuari henia, bona emui murinai idia raka metairametaira taudia ibounai idia alaia mase. Idia ese Dirava idia gari henia lasi.
19 Iehova emui Dirava ese umui noholaia totona do ia henia tano ai, emui inai taudia ibounai amo Iehova emui Dirava ese laga-ani ia henia neganai,+ Amaleka taudia umui laloa lou lasi, unai amo guba ena henunai idia do umui laloatao lasi.+ Unai umui laloaboio lasi be namo.
Futnout
^ Eiava “iena ruma bese ena ladana.” Heb., “iena ladana.”
