Deuteronomi 26:1-19
26 “Iehova emui Dirava ese ahuna bamona umui dekenai ia henia tano ai umui vareai bona unai tano umui abia bona noholaia neganai,
2 tano ena anina* ibounai amo anina ginigunadia haida umui abia, unai be Iehova emui Dirava ese umui dekenai ia henia tano amo do umui gogoa bona bosea lalonai umui udaia, bona Iehova emui Dirava ese ena ladana ia noho totona ia abia hidi gabuna dekenai umui abia lao.+
3 Unai nega ai ia gaukara hahelaga tauna dekenai do umui lao bona umui gwau, ‘Hari dina Iehova emu Dirava dekenai lau hamomokania, lau be Iehova ese iseda sene taudia dekenai ia gwauhamata ita dekenai do ia henia tano ai lau vareai vadaeni.’+
4 “Bena hahelaga tauna ese emu imana amo bosea do ia abia bona Iehova emu Dirava ena boubou patana vairanai do ia atoa.
5 Bena Iehova emu Dirava vairanai oi gwau, ‘Egu tamana be Arama tauna,* ia be loaloa* tauna,+ bona Aigupito dekenai ia lao+ bona unuseniai idau tauna bamona ia noho, ena ruma bese taudia be momo lasi.+ To unuseniai ia be bese badana bona goadana ai ia lao, bona idia be momo herea.+
6 Bona Aigupito taudia ese ai idia kara auka henia bona idia hahisia, bona ai idia doria igui hesiai gaukara metauna ai karaia totona.+
7 Unai dainai ai be emai sene taudia edia Dirava, Iehova, dekenai ai taitai, bona Iehova ese emai gadona ia kamonai bona emai hisihisi, hekwakwanai, bona ai davaria dagedage ia itaia.+
8 Bena Iehova be ena siahu bada amo gari bada karadia, toa bona hoa karadia ia karaia,+ bona Aigupito amo ai ia hakaua raka-lasi.+
9 Bona inai gabu dekenai ai ia abia mai bona inai tano ia henia, ia be milika bona hani amo ia honu.+
10 Vadaeni Iehova ese lau dekenai ia henia tano ena anina ibounai amo anina ginigunadia lau mailaia.’+
“Umui ese Iehova emui Dirava ena vairanai unai gaudia umui atoa bona Iehova emui Dirava ena vairanai umui tui diho.
11 Bena Iehova emui Dirava ese umui dekenai ia henia gaudia ibounai do umui moalelaia, umui, emui ruma bese taudia, Levi taudia bona emui huanai idia noho idau taudia.+
12 “Bena lagani ihatoina ai, emui aniani ena kahana 10 ena kahana ta umui haboua neganai,+ namona be Levi taudia, idau taudia, tamana lasi natudia,* bona vabu dekenai do umui henia. Bona siti lalodiai do idia aniani bona bogakunu.+
13 Bena Iehova emui Dirava vairanai do umui gwau, ‘Lau ese inai helaga gaudia be egu ruma amo lau abia bona Levi taudia, idau taudia, tamana lasi natudia, bona vabu dekenai lau henia,+ lau oi oda henia hegeregerena. Lau ese emu oda herevadia lau dadaraia lasi.
14 Taitai negana lalonai unai gaudia lau ania lasi eiava lau goeva lasi lalonai unai gaudia ta lau dogoatao lasi eiava mase tauna totona lau henia lasi. Lau ese Iehova egu Dirava lau kamonai henia bona oi henia oda hereva ibounai hegeregerena lau karaia.
15 Emu helaga gabuna, guba amo ai oi itaia, bona emu taunimanima Israela taudia oi hanamoa, bona ai dekenai oi henia tano danu,+ milika bona hani amo ia honu tano unai,+ emai sene taudia dekenai oi gwauhamata hegeregerena.’+
16 “Hari Iehova emui Dirava ese umui ia oda henia, inai taravatu bona hahemaoro herevadia umui badinaia totona. Namona be mai emui kudouna ibounai+ bona mauri* ibounai ida umui badinaia.
17 Umui emui kara dainai Iehova ia gwau, bema iena dala dekenai umui raka bona ena taravatu,+ ena oda+ bona hahemaoro herevadia umui badinaia+ bona bema ia umui kamonai henia, ia be emui Dirava ai do ia lao.
18 Bona Iehova ese ia karaia karana dainai, umui gwau umui be iena taunimanima, iena dava bada kohuna bamona ai do umui lao,+ ia ese umui ia gwauhamata henia hegeregerena, bona umui ese iena oda hereva ibounai do umui badinaia
19 bona ia ese bese iboudiai amo umui do ia abia isi,+ umui dekenai hanamoa do ia henia bona ladana bada bona hairai danu, bema emui Dirava Iehova vairanai umui helaga noho,+ ia gwauhamata hegeregerena.”
Futnout
^ Heb., “au huahua.”
^ Eiava “Suria tauna.”
^ Eiava reana, “boio noho.”
^ Eiava “tama sina idia mase natudia.”
