Deuteronomi 28:1-68
28 “Bona bema umui ese Iehova emui Dirava umui kamonai henia bona hari dina umui dekenai lau henia oda hereva ibounai umui badinaia namonamo, vadaeni Iehova emui Dirava ese tanobada ena bese ibounai amo umui do ia abia isi.+
2 Bema Iehova emui Dirava umui kamonai henia noho, ia ese umui dekenai inai hahenamo momo do ia henia:+
3 “Ia ese siti lalonai umui do ia hanamoa, bona uma gabu ai umui do ia hanamoa.+
4 “Ia ese umui do ia hanamoa, bona natudia momo do umui havaraia,+ emui tano ese anina do ia havaraia, bona emui boromakau natudia bona mamoe natudia be do idia momo herea.+
5 “Ia ese emui bosea bona emui paraoa karaia disi do ia hanamoa.+
6 “Ia ese umui lao gabudia ibounai dekenai bona umui karaia gaukara ibounai lalonai, umui do ia hanamoa.
7 “Iehova ese emui inai taudia, umui tuari henia totona idia mai taudia unai, be emui vairanai do ia halusia.+ Umui idia tuari henia totona dala tamona amo do idia mai, to idia be umui amo dala idauidau 7 dekenai do idia heau lao.+
8 Iehova ia gwau emui aniani haboua rumadia bona emui gaukara ibounai lalonai hahenamo do umui abia,+ bona Iehova emui Dirava ese umui dekenai ia henia tano ai umui do ia hanamoa momokani.
9 Iehova ese umui be iena helaga taudia ai do ia halaoa,+ umui dekenai ia gwauhamata hegeregerena,+ badina umui be Iehova emui Dirava ena oda herevadia umui badinaia noho bona iena dala dekenai umui raka.
10 Tanobada taudia ibounai do idia itaia, Iehova ena ladana be umui latanai ia noho,+ bona umui dekenai do idia gari.+
11 “Iehova ese emui sene taudia dekenai ia gwauhamata umui do ia henia tano ai,+ Iehova ese umui dekenai natudia momo bona animal momo herea do ia henia, bona tano ese anina do ia havaraia.+
12 Iehova ese umui dekenai ena kohu haboua ruma namona, guba unai, do ia kehoa bona emui tano dekenai medu be nega korikori ai do ia hadihoa+ bona umui karaia gaudia ibounai do ia hanamoa. Umui ese bese momo dekenai moni do umui henitorehai, to do umui abitorehai lasi.+
13 Bema umui ese Iehova emui Dirava ena oda herevadia, hari dina umui badinaia totona lau henia herevadia unai, umui kamonai henia noho, vadaeni Iehova ese umui do ia abia isi ma haida amo bona idia ese umui do idia biagua lasi. Umui ese ma haida do umui hereaia, bona idia henunai do umui noho lasi.+
14 Namo lasi hari dina umui dekenai lau henia oda herevadia amo umui raka siri, idiba eiava lauri kahana dekenai umui lao,+ unai amo dirava ma haida murinai umui raka bona idia umui hesiai henia.+
15 “To bema Iehova emui Dirava umui kamonai henia lasi, bona iena oda hereva bona taravatu ibounai, hari dina umui dekenai lau henia gaudia unai, umui badinaia namonamo lasi, vadaeni inai dika ibounai be emui latanai do idia mai:+
16 “Siti lalonai dika do umui davaria, bona uma gabu ai dika do umui davaria.+
17 “Ia ese emui bosea bona emui paraoa karaia disi do ia hanamoa lasi.+
18 “Ia ese umui do ia hanamoa lasi natudia momo umui havaraia totona,+ emui tano ena anina do idia momo lasi, bona emui boromakau bona mamoe natudia danu be do idia momo lasi.+
19 “Ia ese umui lao gabudia ibounai bona umui karaia gaukara ibounai dekenai umui do ia hanamoa lasi.
20 “Iehova ese umui karaia gaukara ibounai lalonai, dika, daradara, bona panisi do ia havaraia, ela bona umui dika momokani bona umui mase haraga, badina kara dikadia umui karaia bona lau umui dadaraia.+
21 Iehova ese umui dekenai gorere do ia havaraia, bona unai gorere be umui dekenai do ia noho ela bona do umui abia tanona dekenai umui ia hadikaia ore.+
22 Iehova ese TB gorere, fiva bada,+ kopina ia gudu gorere, bona tauanina do ia siahu bada gorere be umui dekenai do ia henia, ia ese emui inai taudia do ia gaukaralaia umui ia tuari henia totona,+ lai mai siahuna do ia havaraia, bona emui tubutubu gaudia do idia kakoro.+ Bona unai gaudia ese umui do idia hadikaia ela bona umui mase ore.
23 Umui ataiai ia noho guba be kopa ai do ia lao, bona umui henunai ia noho tano be auri ai do ia lao.+
24 Iehova ese emui tano latanai do ia hadihoa medu be pauda bona kahu ai do ia halaoa, bona unai be umui latanai do ia diho ela bona umui ia hadikaia ore.
25 Iehova ese umui do ia rakatania emui inai taudia ese umui idia halusia totona.+ Umui be dala tamona amo do umui lao idia umui tuari henia totona, to umui be idia amo dala idauidau 7 dekenai do umui heau lao. Bona tanobada ena basileia ibounai ese umui dekenai idia vara gau dikadia idia itaia neganai, do idia gari.+
26 Bona emui mase tauanidia be manu bona tanobada ai idia noho animal ese do idia ania, bona ta ese idia do ia hagaria lasi idia heau totona.+
27 “Iehova ese Aigupito taudia edia iohururu be umui dekenai do ia henia, gudu mai ena hura* bona kopina gorere idauidau amo do umui namo lou lasi.
28 Iehova ese umui do ia hakavakavaia bona emui matana do ia hakepulua+ bona daradara do ia havaraia.
29 Umui ese dina tubua ai dala do umui tahua, matakepulu tauna be dibura ai dala ia tahua bamona,+ bona umui karaia gaudia ibounai dekenai do umui kwalimu lasi. Bona hanaihanai emui kohu be koikoi dalana amo do idia abia bona do idia henaoa, ta ese umui do ia durua lasi.+
30 Oi be hahine ta ida do oi maoheni, to ia be tau ma ta ese do ia reipia. Oi ese ruma do oi haginia, to do oi noholaia lasi.+ Oi ese vain umana do oi hegaegaelaia, to do oi gaukaralaia lasi.+
31 Emu vairanai emu boromakau do idia alaia, to do oi ania lasi. Emu vairanai emu doniki do idia henaoa, to do ia giroa lou lasi. Emu mamoe be emu inai taudia ese do idia abia, to oi do ia durua tauna ta be lasi.
32 Emu natudia memero bona kekeni be taunimanima ma haida ese do idia abia,+ bona ena be hanaihanai do oi ura dikadika idia oi itaia, to gau ta do oi karaia diba lasi.
33 Emu uma ena anina bona emu hekwarahi amo idia vara aniani be oi diba lasi taudia ese do idia ania,+ bona hanaihanai emu kohu be koikoi dalana amo do idia abia bona unai ese oi do ia hahisia bada.
34 Oi ese oi itaia gaudia dainai do oi kavakava.
35 “Iehova ese emui aena bona tuina dekenai hisihisi bada bona do ia ore lasi iohururu do ia havaraia, emui aena amo ela bona emui kwarana dekenai.
36 Iehova ese umui bona emui king be umui bona emui sene taudia idia diba lasi besena dekenai do ia lulua lao,+ bona unuseniai umui ese au bona nadi diravadia do umui hesiai henia.+
37 Iehova ese umui ia siaia lao gabudia ai umui ginidae neganai, umui dekenai idia vara gaudia ese unuseniai idia noho taudia do ia hagaria, bona idia ese umui do idia matauraia lasi bona umui do idia hevasehalaia.+
38 “Umui ese uma gabu ai uhe momo do umui hadoa, to anina momo do umui gogoa lasi,+ badina kwadi ese do idia ania ore.
39 Vain umadia do umui karaia bona birulaia, to gau ta do umui gogoa lasi bona wain do umui inua lasi,+ badina biluga ese do idia ania ore.
40 Emui gabu ibounai dekenai olive audia do idia noho, to dehoro amo emui kopina do umui dahua lasi, badina emui olive huahuadia be do idia moru kava.
41 Umui ese natudia memero bona kekeni do umui havaraia, to idia be umui ida do idia noho lasi, badina ma haida ese do idia abia mauri.+
42 Kwadi oreana ese emui au ibounai bona uma ena anina do idia ania ore.
43 Emui huanai idia noho idau taudia edia goada be do ia bada herea, to umui emui goada be do ia maragi ia lao.
44 Idia be umui dekenai do idia henitorehai, to umui be idia dekenai do umui henitorehai lasi.+ Idia be emui gunalaia taudia ai do idia lao, bona umui be idia do umui hesiai henia.+
45 “Inai dika ibounai+ do umui davaria noho ela bona umui idia hadikaia ore,+ badina umui ese Iehova emui Dirava umui kamonai henia lasi bona umui dekenai ia henia oda herevadia bona taravatu umui badinaia lasi.+
46 Bona unai gaudia be umui bona emui natudia dekenai nega daudau do idia vara noho toa bona hoa gaudia,+
47 badina umui dekenai gau momo herea idia noho neganai, umui ese mai moale bona kudou namo ida Iehova emui Dirava umui hesiai henia lasi.+
48 Iehova ese emui inai taudia do ia siaia, umui idia tuari henia totona. Bona umui hitolo, ranu mase, dabua dikadia umui karaia, bona gau ibounai dekenai umui dabu neganai, idia do umui hesiai henia.+ Ia ese emui aiona dekenai auri metauna do ia atoa ela bona umui do ia hadikaia ore.
49 “Iehova ese daudau ai ia noho besena+ be tanobada ena dokona amo do ia siaia umui ia tuari henia totona. Unai bese ena gado do umui lalopararalaia lasi,+ ia be ugava ta bamona emui latanai do ia diho,+
50 ia be dagedage besena, ia ese buruka taudia do ia laloa bada lasi eiava matamata taudia do ia hebogahisi henia lasi.+
51 Idia ese emui animal edia natudia bona uma ena anina do idia ania ela bona umui idia hadikaia ore. Idia ese witi, wain matamata eiava dehoro, boromakau natuna eiava mamoe natuna ta do idia rakatania lasi ela bona umui idia hadikaia ore.+
52 Idia ese emui tano ena siti iboudiai lalonai umui do idia koua ela bona umui abidadama henia magu latadia bona aukadia do idia moru. Oibe, Iehova emui Dirava ese umui dekenai ia henia tano ena siti iboudiai lalonai, umui do idia koua hagegea.+
53 Emui inai taudia ese emui siti idia koua hagegea bona umui idia hahisia dainai, umui ese emui natudia do umui ania, oibe, Iehova emui Dirava ese umui dekenai ia henia natudia memero bona kekeni edia hidio unai.+
54 “Ia manau bona mauri namona ia noholaia tauna ese ena tadikaka eiava ena adavana lalokauna eiava ena natudia, idia do mauri noho natudia unai, do ia hebogahisi henia lasi.
55 Ena inai taudia ese iena siti ibounai idia koua hagegea bona ia idia hahisia bada dainai ia dekenai gau ta ia noho lasi, unai dainai ena natudia edia hidio do ia ania bona ta dekenai do ia henia lasi.+
56 Bona emui huanai ia manau bona mauri namona ia noholaia hahine, ena aena be tano dekenai ia atoa lasi hahine unai,+ ese ena adavana lalokauna eiava ena natuna mero eiava kekeni do ia hebogahisi henia lasi,
57 bona ia havaraia natuna ena hidio be do ia ura lasi idia dekenai ia henia, ia mara murinai ena bogana amo idia raka-lasi gaudia danu. Ia ese unai gaudia be hehuni ai do ia ania, badina emui inai taudia ese emui siti idia koudia bona siti idia dika.
58 “Bema umui ese inai buka lalonai idia torea Taravatu ena hereva ibounai umui badinaia namonamo lasi+ bona Iehova+ emui Dirava ena ladana mai hairaina bona mai garina umui matauraia lasi,+
59 Iehova ese umui bona emui natudia dekenai hisihisi dikadia do ia havaraia, idia be do idia noho daudau hisihisi badadia,+ bona idia noho daudau gorere badadia danu.
60 Umui ese guna Aigupito dekenai umui garilaia gorere idauidau be umui dekenai do ia henia, bona idia be umui dekenai do idia noho.
61 Danu, Taravatu bukana lalonai idia torea lasi gorere eiava hisihisi idauidau be Iehova ese umui dekenai do ia mailaia ela bona umui mase ore.
62 Ena be umui be guba ena hisiu bamona umui momo herea,+ to umui haida sibona do umui mauri,+ badina umui ese Iehova emui Dirava umui kamonai henia lasi.
63 “Bona Iehova be ia ura momokani umui ia hanamoa bona emui namba ia habadaia, unai hegeregerena Iehova be ia ura momokani umui do ia hadikaia ore. Bona kahirakahira do umui abia tano amo umui do ia kokia.
64 “Iehova ese bese idauidau huanai umui do ia lulua lao, tanobada ena kahana ta amo ela bona tanobada ena kahana ma ta ai,+ bona unuseni umui be au bona nadi diravadia do umui hesiai henia, umui bona emui sene taudia idia diba lasi diravadia unai.+
65 Unai bese idauidau huanai maino ai do umui noho lasi+ bona emui aena edia laga-ani gabuna ta be lasi. Danu, Iehova ese unuseniai emui kudouna do ia hametaua+ bona emui matana do idia diari lasi bona emui lalona do ia hahisia.+
66 Emui mauri be do ia dika momokani, bona dina bona hanuaboi ai do umui gari bada. Bona mauri abia dalana do umui diba lasi.
67 Daba ai do umui gwau, ‘Bema adorahi ia mai be namo!’ Bona adorahi ai do umui gwau, ‘Bema daba ia mai be namo!’ Badina emui matana ese do idia itaia gaudia dainai emui kudouna ai do umui gari dikadika.
68 Oibe, Iehova ese umui be bouti amo Aigupito dekenai do ia abia giroa, guna umui lau hamaoroa do umui itaia lou lasi gabuna unai. Unuseniai umui ginidae neganai, do umui ura sibona umui hoihoilaia igui hesiai taudia bamona, to ta ese umui do ia hoia lasi.”
Futnout
^ Inai gudu be kununa lalonai ia vara.
