Deuteronomi 3:1-29
3 “Bena Basana Dala amo ita daekau lao. Bona Basana ena king Oga be ena taunimanima ibounai ida ia mai, Ederei dekenai ita idia tuari henia totona.+
2 Vadaeni Iehova be lau dekenai ia gwau, ‘Namo lasi ia oi gari henia, badina lau ese ia bona ena taunimanima ibounai bona ena tano be oiemu imana dekenai do lau atoa, bona Amoro taudia edia king Sihona, Hesebona ai ia noho tauna, oi halusia hegeregerena, ia danu do oi halusia.’
3 Unai dainai Iehova iseda Dirava ese Basana ena king Oga bona ena taunimanima ibounai be iseda imana dekenai ia atoa, bona idia ita tuari henia ela bona idia ibounai ita hamasea ore.
4 Bena ita ese ena siti ibounai ita abia. Oibe, Aragobo ai idia noho siti ibounai 60 ita abia, unai be Basana ai, Oga ena basileia be unuseniai ia noho.+
5 Unai siti ibounai be mai edia magu aukadia bona latadia, mai edia geiti, bona auri latadia amo idia lokaia, danu idia be mai edia magu lasi hanua momo herea.
6 To, unai ibounai ita hadikaia ore.+ Hesebona ena king Sihona dekenai ita karaia bamona. Ita ese edia siti ibounai ita hadikaia ore, bona tatau, hahine, bona natudia danu.+
7 Bona edia siti ai idia noho animal ibounai bona edia kohu ibounai ita abia.
8 “Unai negai ita ese Amoro taudia edia king rua, Ioridane ena ist kahanai idia noho king rua unai, edia tano ita abidia,+ unai be Aranona Koura amo ela bona Heremona Ororo+
9 (Sidono taudia ese inai ororo idia gwauraia Siriona bona Amoro taudia ese idia gwauraia Seniri),
10 bona tano palakana ai idia noho siti ibounai, Gileada ibounai, bona Basana ibounai ela bona Saleka bona Ederei ita abia,+ unai be Oga ena basileia henunai idia noho siti, Basana ai.
11 Basana ena king, Oga be Repaima tauna ginigabena. Iena mase tauanina idia atoa patana* be auri* amo idia karaia, bona unai be Amono taudia edia hanua Raba dekenai ia do noho. Ena lata be 9 kiubit* bona ena lababa be 4 kiubit.
12 Unai negai ita ese inai tano ita abia: Aroere,+ ia be Aranona Koura badinai ia noho, bona Gileada ena ororo gabudia ena kahana ta. Bona unai gabu edia siti be Rubena bona Gado iduhu dekenai lau henia.+
13 Bona Gileada ena tano oredia bona Basana ena gabu ibounai, Oga ena basileia henunai idia noho gabudia unai, be Manase ena iduhu kahana dekenai lau henia.+ Aragobo ena gabu ibounai, Basana ena kahana unai, idia gwauraia Repaima tano.
14 “Manase ena bese tauna Iairi+ ese Aragobo tano ibounai ia abia+ ela bona Gesuru bona Makata taudia edia tano hetoadia,+ bona unai Basana hanuadia dekenai ena ladana ia hatoa, Havoto-iairi,*+ ema bona hari.
15 Bona lau ese Gileada be Makiri dekenai lau henia.+
16 Bona Rubena iduhu bona Gado iduhu+ dekenai Gileada amo ela bona Aranona Koura lau henia, bona unai koura ena huana kahana be edia tano hetoana. Danu, edia tano be ia lao ela bona Iaboka Koura, unai koura be Amono taudia edia tano hetoana.
17 Bona ela bona Arabaha bona Ioridane Sinavai bona ena isena, bona Kinerete amo ia lao Arabaha Davara, Damena Davara* unai, unai be Pisiga ena henuna kahanai, ist kahana ai.+
18 “Bena idia dekenai inai oda hereva lau henia: ‘Iehova emui Dirava ese umui dekenai inai tano ia henia umui abia totona. Emui tatau goadadia ibounai ese tuari kohudia do idia abia bona emui tadikaka, Israela taudia, edia vairanai do idia hanaia lao.+
19 To emui adavadia, natudia, bona animal sibodia (lau diba emui animal be momo herea), be lau henia siti dekenai do idia noho,
20 ela bona Iehova ese emui tadikaka dekenai laga-ani ia henia, umui dekenai ia karaia bamona, bona Iehova emui Dirava ese Ioridane ena kahana ma ta dekenai idia do ia henia tano idia abia. Unai murinai, umui ta ta be umui dekenai lau henia tano dekenai do umui giroa lou.’+
21 “Unai negai Iosua dekenai lau henia oda hereva be inai:+ ‘Iehova emui Dirava ese unai king rua dekenai ia karaia karana be emui matana amo umui itaia vadaeni. Do umui lao henia basileia iboudiai dekenai, Iehova be unai bamona do ia karaia.+
22 Idia umui gari henia lasi, badina Iehova emui Dirava be umui totona idia ia tuari henia noho.’+
23 “Unai negai Iehova lau noinoi henia, lau gwau,
24 ‘Siahu Ibounai Lohiabadana Iehova e, oi ese emu hesiai tauna dekenai emu hairai bada bona emu imana goadana oi hahedinaraia matamaia vadaeni,+ badina edena dirava guba ai eiava tanobada ai be oi hegeregerena inai siahu kara badadia ia karaia diba?+
25 Mani lau hanaia lao bona Ioridane ena kahana ai ia noho tano namona, inai ororo gabu namodia bona Lebanona lau itaia.’+
26 To Iehova be umui dainai lau ia do badu henia noho+ bona egu hereva ia kamonai henia lasi. Iehova be lau dekenai ia gwau, ‘Hadokoa! Lau dekenai unai gauna oi herevalaia lou lasi.
27 Pisiga Ororo ataiai oi daekau lao+ bona west, not, saut, bona ist kahadia oi itaia, badina oi be unai Ioridane ena kahana dekenai do oi hanaia lao lasi.+
28 Iosua oi abia hidi gunalaia tauna ai ia lao+ bona ia oi hagoadaia, badina ia ese inai taunimanima be do oi itaia tano dekenai do ia hakaua vareai.’+
29 Ita be Bete-peoro vairanai ia noho koura dekenai ita noho neganai, unai ibounai ia vara.+
Futnout
^ Eiava “kofin.”
^ Eiava reana, “nadi koremana.”
^ Anina be “Iairi Ena Palai Ruma Hanuadia.”
^ Unai be, Mase Davara.
