Deuteronomi 4:1-49
4 “Israela taudia e, umui dekenai lau hadibaia taravatu bona hahemaoro herevadia do umui kamonai henia, bona umui badinaia, unai amo do umui mauri+ bona Iehova, emui sene taudia edia Dirava ese umui dekenai ia henia tanona ai do umui vareai, bona do umui abia.
2 Umui dekenai lau henia oda herevadia dekenai hereva ma ta umui atoa kau lasi eiava umui kokia lasi,+ unai amo Iehova emui Dirava ena oda herevadia, umui dekenai lau hadibaia herevadia unai, do umui badinaia noho.
3 “Iehova emui Dirava ese Peoro ena Bala dirava dekenai ia karaia karana be emui matana amo umui itaia. Iehova emui Dirava ese umui emui huana amo Peoro ena Bala dirava murinai idia raka taudia ibounai ia hamasea.+
4 To umui, Iehova emui Dirava umui badinaia taudia ibounai be hari umui mauri noho.
5 Kamonai, lau ese umui dekenai taravatu bona hahemaoro herevadia lau hadibaia,+ Iehova egu Dirava ese lau ia oda henia hegeregerena, unai amo do umui abia tano dekenai unai umui badinadia diba.
6 Namona be unai taravatu ibounai do umui badinaia namonamo,+ badina bese idauidau ese unai taravatu ibounai idia kamonai neganai, do idia itaia umui be aonega+ bona laloparara taudia,+ bona do idia gwau, ‘Momokani, inai bese badana be aonega bona laloparara besena.’+
7 Edena bese badana ena dirava be ia kahirakahira ia noho, Iehova iseda Dirava be ita boiboi negadiai ita kahirakahira ia noho hegeregerena?+
8 Bona edena bese badana be mai ena kara maoromaoro taravatudia bona hahemaoro herevadia, hari dina umui dekenai lau henia Taravatu ibounai hegeregerena?+
9 “Umui naria namonamo bona umui gima noho, unai amo emui matana ese idia itaia gaudia do umui laloaboio lasi bona idia be emui kudouna dekenai do umui atoa, emui mauri dinadia ibounai lalonai. Bona namona be emui natudia bona tubudia dekenai unai umui hadibaia danu.+
10 Horeba ai Iehova emui Dirava ena vairanai umui gini neganai, Iehova be lau dekenai ia gwau, ‘Taunimanima be lau vairanai oi haboua egu hereva idia kamonai totona,+ unai amo edia mauri dinadia ibounai lalonai lau gari henia karana do idia dibaia+ bona edia natudia dekenai do idia hadibaia.’+
11 “Vadaeni umui be ororo kahirakahira umui lao bona ena badinai umui gini, bona lahi be ororo ataiai ia araia noho bona guba dekenai ia daekau, bona gabu ia dibura bona ori koremadia ese ia koua.+
12 Bona Iehova be lahi amo umui ia hereva henia matamaia.+ Umui ese gado regena umui kamonai, to tau ta umui itaia lasi,+ gado regena sibona.+
13 Bona ia ese ena taravatu be umui dekenai ia gwauraia+ bona umui ia oda henia do umui badinaia, unai be Taravatu 10.*+ Unai murinai, nadi palakadia rua dekenai ia torea.+
14 Unai nega ai Iehova ese lau ia oda henia umui dekenai taravatu bona hahemaoro herevadia lau hadibaia totona, unai amo umui vareai bona abia tanona ai do umui badinaia.
15 “Horeba ai, Iehova ese lahi ena huana amo umui ia hereva henia neganai, gau ta umui itaia lasi. Unai dainai umui gima noho
16 bona umui kara gageva lasi bona umui sibona totona gau ta ena laulau umui koroa lasi, tau eiava hahine edia laulau,+
17 tanobada ai idia noho animal edia laulau eiava guba ai idia roho manu edia laulau,+
18 tanobada ai idia rau gaudia edia laulau eiava tanobada ena ranu lalonai idia noho gwarume ta ena laulau umui koroa lasi.+
19 Bona guba dekenai emui matana umui negea bona dina, hua, bona hisiu, guba tuari orea ibounai unai, umui itaia neganai, namo lasi unai ese emui lalona ia veria bona idia dekenai umui igo diho bona umui hesiai henia.+ Iehova emui Dirava ese unai gaudia be guba henunai idia noho taudia ibounai dekenai ia henia vadaeni.
20 To Iehova ese umui be Aigupito amo ia abia raka-lasi, auri havevea lahi gabuna badana amo umui ia kokia bamona, unai amo iena taunimanima* ai umui lao,+ hari umui be iena hegeregerena.
21 “Umui dainai Iehova be lau dekenai ia badu,+ bona ia gwauhamata lau be Ioridane do lau hanaia lasi eiava Iehova emui Dirava ese emui ahuna bamona umui dekenai ia henia tano namona dekenai do lau vareai lasi.+
22 Badina lau be inai tano ai do lau mase. Lau be Ioridane do lau hanaia lasi,+ to umui be do umui hanaia bona unai tano namona do umui abia.
23 Umui naria namonamo, namo lasi Iehova emui Dirava ese umui ida ia karaia gwaubou umui laloaboio,+ bona namo lasi umui sibona totona Iehova emui Dirava ese ia taravatua gauna ta ena laulau umui koroa.+
24 Badina Iehova emui Dirava be gau ibounai ia gabua ore lahina bamona.+ Bona ia ura taunimanima be ia sibona idia tomadiho henia.+
25 “Bema umui be natudia bona tubudia umui havaraia bona inai tano ai nega daudau umui noho, bona umui kara gageva bona gau ta ena laulau umui koroa+ bona Iehova emui Dirava ena matanai gau dikana ta umui karaia ia umui habadua totona,+
26 guba bona tanobada ladanai umui lau hamaoroa, hari umui be Ioridane umui hanaia bona do umui abia tanona ai do umui mase ore haraga momokani. Unai tano ai do umui noho daudau lasi, to do umui mase ore.+
27 Iehova ese umui do ia lulua bona bese idauidau huanai do umui lao.+ To Iehova ese umui ia lulua lao besedia huanai haida sibona do idia mauri.+
28 Unuseniai taunimanima ese edia imana amo idia karaia au bona nadi diravadia do umui hesiai henia.+ Inai diravadia be gau ta idia itaia lasi, kamonai lasi, ania lasi eiava bonaia diba lasi.
29 “Bema unuseni amo Iehova emui Dirava umui tahua,+ bona bema mai kudouna ibounai bona mai emui mauri* ibounai ida ia umui noinoi henia, ia do umui davaria.+
30 Inai hereva ibounai be gabeai umui dekenai ia guguru bona umui lalometau bada neganai, umui be Iehova emui Dirava dekenai do umui giroa lou bona ena gadona do umui kamonai henia.+
31 Badina Iehova emui Dirava be hebogahisi Diravana.+ Ia ese umui do ia rakatania lasi eiava umui do ia hadikaia ore lasi eiava emui sene taudia dekenai ia karaia gwauhamata do ia laloaboio lasi.+
32 “Vadaeni guna umui do vara lasi negana, Dirava ese tanobada ai taunimanima ia karaia negana unai, umui henanadailaia. Guba ena kahana ta amo ela bona ena kahana ma ta dekenai umui tahua. Kara badana ta be guna ia vara, a? Ta ese inai bamona sivarai be nega ta ia kamonai vadaeni, a?+
33 Bese ta ese lahi amo Dirava ena gadona ia kamonai bona mauri noho, umui ese umui kamonai bona mauri noho hegeregerena, a?+
34 Eiava Dirava be nega ta bese ta huana amo bese ma ta be ia sibona totona ia abia, a? Bona unai bese ia abia totona, ia ese hahemaoro karadia, toa bona hoa karadia,+ bona tuari ia havaraia,+ bona siahu bada+ bona goada bada ia hahedinaraia, bona gari kara badadia ia karaia,+ Iehova emui Dirava ese emui matanai umui totona Aigupito dekenai ia karaia bamona, a?
35 Umui dekenai unai gaudia ia hahedinaraia, unai amo do umui diba Iehova be Dirava momokanina,+ bona ma ta be ia hegeregerena lasi.+
36 Umui ia hamaoromaoroa totona, guba amo iena gadona umui kamonai, bona tanobada ai ena lahi badana umui itaia, bona lahi amo ena hereva umui kamonai.+
37 “Badina ia ese emui sene taudia ia lalokau henia bona edia bese ia abia hidi.+ Ia ese ena siahu badana amo iena vairana ai umui be Aigupito amo ia hakaua raka-lasi.
38 Ia ese emui vairana amo umui idia hereaia bese badadia bona goadadia ia lulua, unai amo edia tano dekenai umui ia hakaua vareai bona unai tano be ahuna bamona ia henia, hari dina hegeregerena.+
39 Unai dainai, hari dina umui diba bona umui laloatao Iehova be Dirava momokanina guba bona tanobada ai,+ ma ta be lasi.+
40 Hari dina umui dekenai lau henia taravatu bona oda herevadia umui badinaia be namo, unai amo umui bona emui natudia do umui noho namo, bona Iehova emui Dirava ese umui dekenai ia henia tano dekenai do umui noho daudau.”+
41 Vadaeni Mose ese Ioridane ena ist kahana dekenai siti toi ia abia hidi.+
42 Bema tau ta be ena varavara ta ia alaia, to unai be ia palanilaia lasi gauna, bona guna unai tauna ia inai henia lasi,+ vadaeni ia mauri totona unai siti ta dekenai ia heau lao be namo.+
43 Siti ta be Besere,+ ia be taunimanima lasi gabuna ena tano palakana ai ia noho, unai be Rubena iduhu taudia totona, bona ma ta be Ramoto,+ ia be Gileada ai, unai be Gado iduhu totona, bona ma ta be Golana,+ ia be Basana ai, unai be Manase iduhu totona.+
44 Vadaeni Mose ese Israela taudia totona ia henia Taravatu be inai.+
45 Israela taudia be Aigupito amo idia raka-lasi murinai, Mose ese idia dekenai inai hadibaia hereva, taravatu, bona hahemaoro herevadia ia henia.+
46 Unai hereva ia gwauraia gabuna be Ioridane ai, unai be Bete-peoro ena kahanai ia noho kourana ai,+ Amoro taudia edia king, Sihona ena tano ai, ia be Hesebona ai ia noho,+ Mose bona Israela taudia be Aigupito amo idia raka-lasi murinai, idia ese ia idia halusia.+
47 Bona idia ese Sihona ena tano bona Basana ena king, Oga+ ena tano idia abia, unai Amoro taudia edia king rua be Ioridane ena ist kahanai idia noho.
48 Israela taudia ese Aranona Koura ena isena ai ia noho siti, Aroere+ ibounai idia abia ela bona Sioni Ororo, unai be Heremona.+
49 Bona Arabaha ibounai, unai be Ioridane ena ist kahanai ia noho gabuna, ela bona Arabaha Davara,* ia be Pisiga ena henuna kahanai ia noho.+
