Deuteronomi 7:1-26
7 “Iehova emui Dirava ese do umui abia tano dekenai umui ia mailaia neganai,+ ia ese emui vairanai idia noho bese badadia do ia lulua lao danu, idia be inai:+ Hiti taudia, Girigasa taudia, Amoro taudia,+ Kanana taudia, Perisi taudia, Hivi taudia, bona Iebusu taudia.+ Inai bese 7 ese umui idia hereaia, idia be bese badadia bona goadadia.+
2 Iehova emui Dirava ese idia be umui dekenai do ia henia bona idia do umui halusia.+ Namona be idia umui hadikaia ore momokani.+ Namo lasi idia ida gwaubou ta umui karaia eiava idia umui hebogahisi henia.+
3 Namo lasi idia ida headava gwauhamata umui karaia. Namo lasi emui natudia kekeni be edia natudia memero dekenai umui henia, eiava edia natudia kekeni be emui natudia memero totona umui abia.+
4 Badina idia ese emui natudia edia lalona do idia veria, Dirava hesiai henia karana idia hadokoa totona, bona dirava ma haida idia hesiai henia.+ Vadaeni Iehova ena badu mai siahuna do ia hahedinaraia, bona karaharaga umui do ia hadikaia ore.+
5 “To, idia dekenai inai do umui karaia: Edia boubou patadia umui hadikaia, edia nadi du helagadia umui hamakohia,+ edia au helagadia* umui utua,+ bona idia koroa laulaudia umui gabua.+
6 Badina Iehova emui Dirava dekenai umui be helaga, bona Iehova emui Dirava ese tanobada ai idia noho taudia ibounai amo umui ia abia hidi iena taunimanima ai umui lao totona, ia dekenai umui be dava bada kohuna bamona.+
7 “Umui be bese badana dainai Iehova ese umui ia lalokau henia bona ia abia hidi, a?+ Lasi, bese ibounai amo umui be maragi herea.+
8 To, Iehova ese umui ia lalokau henia bona emui sene taudia dekenai ia karaia gwauhamata ia badinaia dainai,+ Iehova ese ena imana goadana amo umui ia ruhaia, ia ese umui be umui ia guia tanona amo ia hakaua raka-lasi,+ oibe, Aigupito ena king Farao ena siahu* amo.
9 Umui diba momokani Iehova emui Dirava be Dirava momokanina, ia be ena hereva ia badinaia Diravana, bona ia ese ena gwauhamata ia hagugurua bona ia idia lalokau henia bona ena oda herevadia idia badinaia taudia edia uru tausen momo dekenai lalokau* ia hahedinaraia.+
10 To ia idia inai henia taudia edia davana be maoromaoro do ia henia.+ Ia idia inai henia taudia do ia panisia haraga, oibe, edia davana be maoromaoro do ia henia.
11 Unai dainai, hari dina umui dekenai lau gwauraia oda herevadia, taravatu, bona hahemaoro herevadia do umui badinaia.
12 “Bema umui ese inai hahemaoro herevadia umui kamonai bona badinaia noho, Iehova emui Dirava ese ena gwauhamata do ia hagugurua bona emui sene taudia dekenai ia gwauhamatalaia lalokau* do ia hahedinaraia.
13 Ia ese umui do ia lalokau henia bona umui do ia hanamoa bona emui bese do ia habadaia.+ Oibe, emui sene taudia dekenai ia gwauhamata umui do ia henia tanona ai, ia ese umui do ia hanamoa, umui dekenai natudia momo bona aniani momo herea do ia henia, witi, wain matamata, bona oela danu,+ bona emui boromakau bona mamoe natudia edia namba do ia habadaia.+
14 Taunimanima ibounai huanai umui do ia hanamoa bada.+ Umui huanai idia noho tatau eiava hahine ibounai be natudia do idia abia bona animal danu.+
15 Iehova ese umui amo gorere ibounai do ia haorea, bona Aigupito dekenai idia noho gorere dikadia be umui dekenai do ia mailaia lasi.+ To, umui idia inai henia taudia ibounai dekenai unai gorere dikadia do ia havaraia.
16 Iehova emui Dirava ese umui dekenai ia henia taudia ibounai umui hadikaia ore.+ Namo lasi idia umui hebogahisi henia,+ bona namo lasi edia dirava umui hesiai henia,+ badina unai be tarapu ta umui dekenai.+
17 “Bema emui kudouna ai umui gwau, ‘Inai bese taudia edia namba ese iseda ia hereaia. Edena bamona idia ita lulua diba?’+
18 Namo lasi idia dekenai umui gari.+ Namona be Iehova emui Dirava ese Farao bona Aigupito taudia ibounai dekenai ia karaia karana umui laloatao.+
19 Iehova emui Dirava ese hahemaoro kara badadia, toa bona hoa karadia,+ bona mai siahu bada ida umui ia hakaua raka-lasi, bona umui ese unai umui itaia.+ Umui gari henia taudia ibounai dekenai Iehova emui Dirava be unai bamona do ia karaia.+
20 Iehova emui Dirava ese idia huanai lalohekwarahi bada* do ia havaraia, ela bona idia noho taudia oredia+ bona idia hunia taudia ibounai be umui vairanai idia boio ore.
21 Namo lasi idia dainai umui gari bada, badina Iehova emui Dirava be umui ida,+ ia be Dirava badana bona taunimanima ese idia gari henia bona matauraia be namo.+
22 “Iehova emui Dirava ese inai bese taudia be metairametaira emui vairana amo do ia lulua.+ Maoro do ia henia lasi idia umui haorea haraga totona, dika tano do ia noho kava bona uda animal be do idia momo herea bona umui idia hereaia.
23 Iehova emui Dirava ese idia be umui dekenai do ia henia bona umui ese idia do umui halusia ela bona idia ibounai umui haorea momokani.+
24 Ia ese edia king be emui imana dekenai do ia atoa,+ bona guba henunai edia ladana do umui kokia ore.+ Tau ta be umui do ia halusia lasi,+ ela bona idia umui haorea momokani.+
25 Namona be idia koroa diravadia edia laulau be lahi dekenai umui gabua.+ Idia dekenai idia noho golo eiava siliva umui ura henia lasi eiava umui sibona totona umui abia lasi,+ dika unai gaudia ese umui idia tarapua, badina Iehova emui Dirava dekenai idia be gau dika rohoroho.+
26 Namo lasi Dirava ese ia inai henia gaudia ta be emui ruma lalonai umui abia vareai, dika Dirava ese unai gaudia ida umui ia hadikaia ore. Namona be mai emui kudouna ibounai ida unai gaudia umui inai henia, badina idia dika ore be maoro.
