Revareva ta Efeso Taudia Dekenai 5:1-33
5 Unai dainai, Dirava umui tohotohoa,+ badina umui be iena lalokau natudia.
2 Bona lalokau ai do ita raka noho,+ Keriso ese ita* ia lalokau henia bamona+ bona ia ese ita* totona Dirava dekenai sibona ia henia, bonana namo boubou gauna bamona.+
3 Namona be matabodaga karadia,* kara miro idauidau bona mataganigani karadia be umui huanai umui herevalaia lasi,+ helaga taudia edia kara hegeregerena.+
4 Bona hemarai karadia eiava hereva kavakavadia eiava hevaseha mirodia umui herevalaia lasi,+ unai gaudia be maoro lasi, to Dirava do umui tanikiu henia.+
5 Bona inai umui diba momokani, matabodaga* tauna+ eiava kara mirodia ia karaia tauna eiava mataganigani tauna,+ anina be kaivakuku ia tomadiho henia tauna, be ahuna lasi Keriso bona Dirava edia Basileia lalonai.+
6 Namo lasi ta ese anina lasi herevadia amo umui ia koia, badina unai bamona gaudia dainai, kamonai lasi taudia dekenai Dirava ena badu do ia ginidae.
7 Unai dainai, namo lasi idia umui tura henia.
8 Guna umui be dibura lalonai, to hari umui be diari lalonai umui noho,+ badina umui be Lohiabada ena.+ Vadaeni diari natudia bamona do umui raka noho.
9 Badina diari ese namo gaudia idauidau bona kara maoromaoro bona hereva momokani ia havaraia.+
10 Namona be umui tahua namonamo noho edena gaudia be Lohiabada ese ia abia dae.+
11 Bona anina lasi dibura karadia umui karaia lasi,+ to umui hahedinaraia unai kara be idia maoro lasi.
12 Hehuni ai idia karaia karadia herevalaia be mai ena hemarai.
13 Vadaeni diari ese maoro lasi gaudia ibounai ia hahedinaraia, oibe, idia hedinarai gaudia ibounai be diari.
14 Unai dainai Toretore Helagadia ia gwau: “Mahuta tauna e, oi noga, bona mase amo oi toreisi,+ bona Keriso be oi dekenai diari do ia henia.”+
15 Vadaeni emui raka dalana do umui naria namonamo, kavakava taudia bamona do umui raka lasi, to aonega taudia bamona do umui raka.
16 Emui nega do umui gaukaralaia namonamo,+ badina inai nega be nega dikana.
17 Unai dainai idia laloa maoromaoro lasi taudia bamona umui noho lasi, to Iehova* ena ura umui lalopararalaia noho be namo.+
18 Danu, wain amo do umui kekero lasi,+ badina unai ese mauri dikana ia havaraia, to lauma helaga amo do umui honu noho.
19 Ta ta dekenai hereva helagadia umui gwauraia, Dirava hanamoa anedia bona tomadiho anedia do umui abia.+ Emui kudouna ai Iehova* hanamoa anedia umui abia,+
20 iseda Lohiabada Iesu Keriso ladanai,+ gau ibounai dainai nega ibounai iseda Dirava bona Tamana ita tanikiu henia.+
21 Keriso umui matauraia bada dainai ta ta henunai umui noho.+
22 Hahine be edia tatau henunai idia noho be namo,+ Lohiabada henunai idia noho hegeregerena,
23 badina tau be ena hahine ena kwarana,+ Keriso be kongrigeisen ena kwarana hegeregerena,+ kongrigeisen be ena tauanina bona ia be ena hamauria tauna.
24 Oibe, kongrigeisen be Keriso henunai ia noho hegeregerena, hahine danu be gau ibounai dekenai edia tatau henunai idia noho be namo.
25 Tatau e, emui hahine do umui lalokau henidia noho,+ Keriso ese kongrigeisen ia lalokau henia bona ia dainai sibona ia henia hegeregerena,+
26 unai amo ia ese kongrigeisen ia hahelagaia, bona Dirava ena hereva ena ranu amo ia hagoevaia.+
27 Ia ura kongrigeisen be ena matanai ia hairai, ia dekenai miro, makuku, eiava unai bamona gaudia ta be lasi,+ to ia helaga bona goeva.+
28 Unai dala ai tatau ese edia hahine do idia lalokau henidia be namo, sibodia edia tauanina idia lalokau henia hegeregerena. Ena hahine ia lalokau henia tauna ese sibona ia lalokau henia,
29 badina tau ta ese sibona ena tauanina ia inai henia lasi, to ia ubua bona ia laloa bada, Keriso ese kongrigeisen dekenai ia karaia bamona,
30 badina ita be iena tauanina ena kahana ta ta.+
31 “Unai dainai tau ese ena tamana bona sinana do ia rakatania bona ena hahine danu do ia noho, bona idia ruaosi be tauanina tamona ai do idia lao.”+
32 Unai hunia hereva helagana+ be mai anina bada. Lau be Keriso bona kongrigeisen lau herevalaia.+
33 To namona be umui ibounai ese emui hahine do umui lalokau henia,+ sibona umui lalokau henia hegeregerena. Hahine danu ese iena tau do ia matauraia bada be namo.+
