Esekiela 12:1-28
12 Iehova be lau dekenai ma ia gwau:
2 “Taunimanima ena natuna e, oi be gwau-edeede taudia ida oi noho. Idia be gwau-edeede taudia dainai, ena be idia be mai edia matana, to idia itaia lasi, bona mai edia taiana, to idia kamonai lasi.+
3 To oi, taunimanima ena natuna e, emu baege oi abia hegaegae, idau tano dekenai oi lao totona. Bena dina ai oi idia itaia noho lalonai, idau tano dekenai oi lao. Emu ruma oi rakatania bona gabu ma ta dekenai oi lao. Reana idia ese emu kara do idia laloa, herevana idia be gwau-edeede taudia.
4 Dina ai oi idia itaia noho lalonai, igui tauna bamona idau tano dekenai oi lao totona, emu baege oi abia raka-lasi. Bena adorahi momokani ai, oi idia itaia noho lalonai igui tauna ta be idau tano dekenai idia abia lao bamona emu ruma oi rakatania.+
5 “Oi idia itaia noho lalonai, haba dekenai matu ta oi karaia, bona emu baege be unai matu amo oi huaia raka-lasi.+
6 Idia itaia noho lalonai, emu baege be emu pagana dekenai oi atoa bona dibura ai oi huaia raka-lasi. Emu vairana oi koua, unai amo tano do oi itaia lasi, badina Israela besena dekenai oi be toa ta bamona lau halaoa.”+
7 Lau ia oda henia hegeregerena lau karaia. Dina ai, egu baege lau abia idau tano dekenai lau lao totona, bona adorahi momokani ai, egu imana amo haba dekenai matu ta lau karaia. Bona ia dibura neganai, lau idia itaia noho lalonai, egu baege lau abia bona egu pagana ai lau huaia lao.
8 Daba ai Iehova be lau dekenai ma ia gwau:
9 “Taunimanima ena natuna e, Israela besena ena gwau-edeede taudia be oi karaia karana dainai idia henanadai, eiava lasi?
10 Idia oi hamaoroa, ‘Siahu Ibounai Lohiabadana Iehova be inai bamona ia hereva: “Inai hereva metauna be Ierusalema ena iduhu gunalaia tauna+ bona siti lalonai idia noho Israela besena totona.”’
11 “Oi hamaorodia, ‘Umui dekenai lau be toa ta.+ Lau karaia hegeregerena, idia dekenai unai do ia vara. Idia be igui taudia bamona idau tano dekenai do idia abia lao.+
12 Idia huanai ia noho iduhu gunalaia tauna ese ena baege be ena pagana dekenai do ia huaia bona dibura ai gabu do ia rakatania. Ia ese magu dekenai matu do ia karaia bona unai matu amo ena baege do ia huaia raka-lasi.+ Bona ena vairana do ia koua, unai amo tano do ia itaia lasi.’
13 Ia latanai egu reke do lau negea, bona egu reke amo ia do lau tarapua.+ Bena Babulonia dekenai do lau abia lao, Kaledea taudia edia tano unai, to unai tano do ia itaia lasi, bona unuseniai do ia mase.+
14 Bona ia idia hagegea taudia, unai be iena durua taudia bona iena tuari oreana, be gabu idauidau dekenai do idia heau,+ bona tuari kaia amo idia do lau lulua.+
15 Bona idia be idau bese bona tano idauidau dekenai idia do lau lulua lao neganai, do idia diba lau be Iehova.
16 To idia haida be tuari kaia, hitolo bada, bona gorere dikana amo do idia mase lasi, unai amo bese idauidau dekenai idia lao neganai edia kara dika rohorohodia ibounai do idia herevalaia. Bona do idia diba lau be Iehova.”
17 Bona Iehova be lau dekenai ma ia gwau:
18 “Taunimanima ena natuna e, emu aniani be mai heudeheude ida do oi ania, bona emu ranu be mai lalohisihisi bona lalohekwarahi ida do oi inua.+
19 Unai tano taudia dekenai do oi gwau, ‘Siahu Ibounai Lohiabadana Iehova be Israela ai idia noho Ierusalema taudia dekenai inai bamona ia hereva, ia gwau: “Edia aniani be mai lalohekwarahi ida do idia ania bona mai gari ida edia ranu do idia inua, badina unuseniai idia noho taudia edia dagedage karadia dainai tano do idia hadikaia.+
20 Idia noholaia siti ibounai be do idia hadikaia ore, bona tano be do ia noho kava,+ bona do oi diba lau be Iehova.”’”+
21 Bona Iehova be lau dekenai ma ia gwau:
22 “Taunimanima ena natuna e, dahaka dainai Israela taudia be inai hevaseha herevana idia gwauraia, ‘Dina be idia ore idia lao, to matahanai ibounai be idia guguru lasi’?+
23 Unai dainai idia dekenai oi gwau, ‘Siahu Ibounai Lohiabadana Iehova be inai bamona ia hereva, ia gwau: “Lau ese inai hevaseha herevana do lau hadokoa, bona Israela ai do idia gwauraia lou lasi.”’ To idia oi hamaoroa, ‘Nega ia kahirakahira noho,+ bona matahanai ibounai be do idia guguru.’
24 Badina Israela besena huanai matahanai koikoina eiava koikoi dalanai vaira nega gwauraia karana be do ia doko.+
25 ‘Siahu Ibounai Lohiabadana Iehova ia gwau: “Badina lau, Iehova, do lau hereva, bona lau hereva gauna be do ia vara.+ Gwau-edeede taudia e, emui mauri dinadia+ ai lau gwauraia hereva be do lau hagugurua.”’
26 Iehova be lau dekenai ma ia gwau:
27 “Taunimanima ena natuna e, Israela taudia be inai bamona idia hereva noho, ‘Ia itaia matahanai be lagani momo murinai do ia vara, bona ia perovetalaia gauna be vaira nega totona.’+
28 Unai dainai idia do oi hamaoroa, ‘Siahu Ibounai Lohiabadana Iehova be inai bamona ia gwau: “‘Lau gwauraia herevadia ibounai be do idia leiti lasi. Egu hereva ibounai be do idia guguru.’ Unai be Siahu Ibounai Lohiabadana Iehova ena hereva.”’”
