Esekiela 19:1-14
-
Iduhu gunalaia taudia edia lalohisihisi anena (1-14)
19 “Namona be Israela ena iduhu gunalaia taudia dekenai lalohisihisi anena* oi abia
2 bona oi gwau,‘Oiemu sinana be daika? Ia be laiona edia huanai ia noho laiona hahinena.
Bona laiona goadadia edia huanai* ia hekure bona ena natudia ia ubua.
3 Iena natuna ta ia habadaia, bona ia be laiona goadana ai ia lao.+
Ia be animal alaia dalana ia dibaia,Bona taunimanima ia ania danu.
4 Bese idauidau be ena sivarai idia kamonai bona edia guri lalonai ia idia tarapua,Bona ena udu baubau dekenai huku idia atoa bona Aigupito tanona dekenai idia abia lao.+
5 Iena natuna ia naria, to ia laloparara ena natuna do ia itaia lou lasi.
Unai dainai iena natuna ma ta ia abia bona laiona goadana ta bamona ia siaia lao.
6 Ia danu be laiona ma haida ida ia raka loaloa bona laiona goadana ai ia lao.
Ia be animal alaia dalana ia dibaia, bona taunimanima ia ania danu.+
7 Edia kohoro aukadia huanai ia raka loaloa bona edia siti ia hadikadia,Unai dainai taunimanima idia noho lasi tanodia dekenai ena boiboi regena be bada herea.+
8 Kahirakahira idia noho bese idauidau taudia idia mai bona ia latanai edia reke idia negea,Bona edia guri lalonai idia tarapua.
9 Huku be ena udu baubau dekenai idia atoa bona idia veria lao maua ta lalonai bona Babulonia ena king dekenai idia abia lao.
Unuseniai idia guia, unai amo ena gado regena be Israela ena ororo gabudia ai do idia kamonai lou lasi.
10 Oiemu sinana be emu rara lalonai ia tubu vain auna bamona,*+ ranu badinai idia hadoa.
Ranu be bada dainai, ia be huahua ia havaraia bona ena rigi be momo.
11 Rigi* goadadia ia havaraia, bona lohia taudia ese kepata* totona idia gaukaralaia.
Ia tubu daekau bona au ma haida ia koua,Bona taunimanima ese idia itaia diba, badina ia be lata bona mai ena rigi bona raurau momo herea.
12 To mai badu bada ida ia idia kokia+ bona tano dekenai idia negea,Bona ist amo ia mai lai ese ena huahua ia hakakoroa.
Iena rigi goadadia be idia utua bona idia kakoro,+ bona lahi ese ia gabudia ore.+
13 Hari ia be taunimanima momo lasi gabuna dekenai idia hadoa,Unai be ranu lasi bona tano kaukau gabuna.+
14 Lahi be ena rigi* amo ia hanaia lao bona ena raurau matamatadia bona huahua ia gabudia ore,Bona rigi goadana ta ia noho lasi, lohia taudia edia kepata* danu be lasi.+
“‘Unai be lalohisihisi anena, bona nega gabediai danu unai ane do idia abia.’”
Futnout
^ Eiava “mase negana ai idia abia anena.”
^ Eiava “laiona matamata mai edia huina bada huanai.”
^ Eiava reana, “oiemu vain umana lalonai ia tubu vain auna bamona.”
^ Eiava “itotohi.”
^ Eiava “itotohi.”
