Esekiela 27:1-36
-
Lalohisihisi ane Turo ena bouti ia mutu dainai (1-36)
27 Iehova be lau dekenai ma ia gwau:
2 “To oi, taunimanima ena natuna e, Turo totona lalohisihisi anena* oi abia,+
3 bona Turo dekenai oi gwau,‘Oi be davara badinai oi noho,Motumotu taudia momo edia hoihoi gabuna,Siahu Ibounai Lohiabadana Iehova be inai bamona ia hereva:“Turo e, oi sibona oi gwau, ‘Lau be hairai bona namo herea.’+
4 Emu gabu momo be davara huanai idia noho,Bona oi idia haginia taudia ese mai hairai ida oi idia karaia.
5 Bouti bamona, emu timba ibounai be Seniri ena iunipa audia amo idia karaia,+Bona Lebanona ena sida au amo emu palai idia kwatua auna idia karaia.
6 Emu bara audia be Basana ena ouki audia amo idia karaia,Bona emu vaira kahana be saipresi au amo idia karaia bona Kitima motumotu ena aivori amo idia koua.+
7 Aigupito amo idia abia dabua hairaidia amo emu palai idia karaia,Bona emu dehe ena dabua be Elisa motumotu amo idia abia wulu varo bulu bona pepol wulu amo idia karaia.+
8 Sidono bona Aravada ai idia noho taudia+ be emu bara taudia.
Turo e, emu gaukara diba namonamo taudia be emu bouti ai idia gaukara taudia.+
9 Gebala ena gaukara diba namonamo tau badadia+ ese bouti ena matu idia koua, ranu ia vareai lasi totona.+
Bouti ibounai bona bouti ai idia gaukara taudia be hoihoi totona oi dekenai idia mai.
10 Emu tuari orea lalonai be Parasa, Ludi, bona Putu+ tanona edia tatau.
Idia ese edia kesi bona kwara gauna be oi dekenai idia tauadae, bona emu toana idia hanamoa.
11 Emu tuari orea lalonai idia noho Aravada tatau be emu magu ataiai idia gini hegege,Bona tatau goadadia ese emu kohoro idia gimaia.
Emu magu dekenai kesi kuborudia idia tauadae,Bona oi idia hahairaia.
12 “‘“Emu taga be bada dainai, Tarasisi+ be oi ida bisinesi ia karaia.+ Emu kohu idia abia totona, oi dekenai siliva, auri, tini, bona ledi idia henia.+
13 Iavana, Tubala,+ bona Meseka+ be oi ida bisinesi idia karaia, bona emu sitoa kohu idia abia totona, oi dekenai igui hesiai taudia+ bona kopa idia henia.
14 Togarama ena bese taudia+ be emu kohu idia abia totona, oi dekenai hosi bona doniki idia henia.
15 Dedana taudia+ be oi ida bisinesi idia karaia, bona motumotu momo ai hoihoi taudia be oi totona idia gaukara, bona idia ese oi dekenai aivori+ bona eboni be harihari gaudia* bamona idia henia.
16 Edoma be oi ida bisinesi ia karaia, badina emu kohu be momo herea. Emu kohu idia abia totona, oi dekenai tekoisa nadi, pepol wulu, kala idauidau dabua mai edia herahera, dabua namo hereana, korol, bona rubi nadi idia henia.
17 “‘“Iuda bona Israela tanona be oi ida bisinesi idia karaia, emu kohu abia totona, oi dekenai Miniti ena witi,+ aniani namodia, hani,+ oela, bona balsam*+ idia henia.+
18 “‘“Emu kohu bona emu taga be momo herea dainai, Damaseko+ be oi ida bisinesi ia karaia, bona oi dekenai Helebono ena wain bona Sahara ena wulu* ia henia.
19 Emu kohu abia totona, Usala kahirakahira idia noho gabudia, Vedana bona Iavana ese oi dekenai auri manokana, kasia,* bona kalamus* idia henia.
20 Dedana+ be oi dekenai animal edia doruna ai idia atoa dabua* idia henia.
21 Arabia bona Kedara ena gunalaia taudia ibounai be oi totona idia gaukara,+ bona idia ese mamoe natudia, mamoe tatau, bona nanigosi idia hoihoilaia.+
22 Sieba bona Ramaha+ edia hoihoi taudia be oi ida bisinesi idia karaia, bona emu kohu abia totona, oi dekenai bonana namo pefium, dava bada nadi idauidau, bona golo idia henia.+
23 Harana,+ Kane, Eden+ bona Sieba,+ Asuru+ bona Kilimada edia hoihoi taudia be oi ida bisinesi idia karaia.
24 Emu maketi gabunai dabua hairaidia, bulu dabua amo idia karaia kouti, bona kala idauidau dabua mai edia herahera, bona kala idauidau kapet, ibounai be varo amo idia kwatua namonamo, bona unai gaudia be oi dekenai idia henia emu kohu haida idia abia totona.
25 Tarasisi edia bouti+ ese emu sitoa kohu idia abia loaloa,Unai amo davara ena gadobada ai, oi be kohu amo oi honu bona oi metau.*
26 Emu bara taudia ese davara ena hurehure badadia lalonai oi idia abia lao,Ist kahana amo ia toa lai ese gadobada ai oi ia hadikaia.
27 Emu taga, emu kohu, emu sitoa kohu, bona emu bouti ai idia gaukara taudia,Emu bouti edia matu idia koua taudia, emu sitoa kohu idia hoihoilaia taudia,+ bona tuari tatau ibounai+Oi lalonai idia noho hutuma unai,Oi moru dinana ai, idia ibounai be gadobada dekenai do idia diho.+
28 Emu bouti ai idia gaukara taudia idia boiboi neganai, kone badinai idia noho hanuadia be do idia mareremarere.
29 Bara taudia, bouti ai idia gaukara taudia, bona davara ai idia loaloa taudia ibounai,Be edia bouti amo do idia diho bona tano dekenai do idia gini.
30 Edia gadona do idia habadaia bona mai lalohisihisi ida oi totona do idia taitai,+Bona edia kwarana dekenai kahu do idia negea bona lahi ena gida lalonai do idia giroagiroa.
31 Edia kwarana do idia sevia bona puse dabua do idia atoa,Bona oi dainai mai boiboi ida do idia tai dikadika.*
32 Mai taitai ida oi dainai lalohisihisi anena do idia abia:
‘Daika be Turo bamona, hari ia be mai regerege lasi ida davara huanai ia hekure?+
33 Gadobada amo emu kohu idia mai neganai, taunimanima ibounai oi hamoalea.+
Emu taga bona emu sitoa kohu momo herea ese tanobada ena king taudia edia taga ia habadaia.+
34 Oi be davara ese ia hadikaia vadaeni bona davara ena dobu gabuna dekenai oi hekure,+Bona emu sitoa kohu bona taunimanima ibounai be oi ida idia mutu.+
35 Motumotu ai idia noho taudia ibounai be mai hoa ida oi do idia raraia,+Bona edia king be mai gari ida do idia heudeheude,+ bona edia vairana ese gari toana do idia hahedinaraia.
36 Idau besedia edia hoihoi taudia be oi dekenai ia vara gauna dainai do idia wisili.
Oiemu dokona be do ia mai haraga bona dika bada do oi davaria,Bona oi be do oi boio momokani ela bona hanaihanai.’”’”+
Futnout
^ Eiava “mase negana ai idia abia anena.”
^ Eiava “davana,” “takisi.”
^ Eiava “kakakaka bona grei wulu.”
^ Inai au be sinamona auna bamona.
^ Bonana namo sirihona.
^ Eiava “idia hatua dabua.”
^ Eiava reana, “hairai.”
^ Eiava “mai lalohisihisi bada ida.”
