Esekiela 28:1-26
28 Iehova be lau dekenai ma ia gwau:
2 “Taunimanima ena natuna e, Turo ena gunalaia tauna oi hamaoroa, ‘Siahu Ibounai Lohiabadana Iehova be inai bamona ia hereva:
“Emu kudouna ai oi hekokoroku dainai,+ oi hereva noho, ‘Lau be dirava ta.
Davara ena huanai lau be dirava ta bamona egu terona dekenai lau helai.’+
To oi be dirava ta lasi, oi be taunimanima sibona,Ena be emu kudouna ai oi laloa oi be dirava ta.
3 Kamonai! Oi be Daniela ena aonega oi hanaia.+
Hunia herevana ta be oi amo idia hunia lasi.
4 Emu aonega bona laloa kehoa karana dainai oi taga,Bona emu kohu haboua rumana ai golo bona siliva oi haboua noho.+
5 Mai aonega ida bisinesi karadia oi karaia dainai moni bona kohu momo oi haboua,+Bona emu moni bona kohu momo dainai emu lalona ai oi hekokoroku.”’
6 “‘Unai dainai Siahu Ibounai Lohiabadana Iehova be inai bamona ia hereva:
“Emu kudouna ai oi laloa oi be dirava ta dainai,
7 Lau ese idau taudia, do lau mailaia oi idia tuari henia totona, idau besedia huanai idia be dagedage bada taudia,+Bona emu aonega amo oi haboua hairai gaudia ibounai do idia hadikaia oreBona emu hairai do idia hadikaia.+
8 Idia ese guri* lalonai oi do idia negea diho,Bona davara ena huanai mai dagedage ida oi do idia hamasea.+
9 Oi ia hamasea tauna dekenai do oi gwau, ‘Lau be dirava ta,’ a?
Oi idia hadikaia taudia edia imana lalonai oi be taunimanima sibona, dirava ta lasi.”’
10 ‘Idau taudia edia imana amo, oi be kopina idia utua lasi taudia bamona do oi mase,Badina lau ese unai lau gwauraia vadaeni.’ Unai be Siahu Ibounai Lohiabadana Iehova ena hereva.”
11 Bona Iehova be lau dekenai ma ia gwau:
12 “Taunimanima ena natuna e, Turo ena king totona lalohisihisi anena* oi abia, bona oi hamaoroa, ‘Siahu Ibounai Lohiabadana Iehova be inai bamona ia hereva:
“Guna oi be goevadae momokani,Aonega amo oi honu+ bona oi be hairai momokani.+
13 Oi be Dirava ena uma, Eden ai oi noho.
Emu dabua ai dava bada nadi ibounai idia noho—Rubi, topasio, iasipa, krusolito, onuku, iade, sapairo, tekoisa,+ bona samaragi.Bona nadi ta ta be golo ese ia hagegea.
Oi lau havaraia dinana ai unai gaudia lau karaia.
14 Lau ese oi lau horoa gimaia kerubi ai oi lao totona.
Oi be Dirava ena ororo helagana ai oi noho,+ bona nadi mai edia lahi huanai oi raka loaloa.
15 Oi vara dinana amo oi be kerere ta lasi,Ela bona oi ese kara dika oi karaia matamaia.+
16 Emu bisinesi karadia dainai,+Oi be dagedage karadia amo oi honu, bona kara dika oi karaia matamaia.+
Unai dainai Dirava ena ororo amo oi be miro gauna bamona do lau negea,+Gimaia kerubi e, nadi mai edia lahi huana amo oi do lau lulua.
17 Emu hairai dainai emu lalona ai oi hekokoroku,+
Bona emu hairai dainai, oi sibona emu aonega oi hadikaia.+
Oi be tano dekenai do lau negea diho,+
King taudia be mai hoa bona gari ida oi do idia raraia.
18 Emu kara dika bona koikoi bisinesi karadia momo dainai, emu gabu helagadia oi hadikaia.
Oi huanai lahi do lau havaraia, bona oi do ia gabua.+
Oi idia raraia taudia ibounai vairanai oi be tano dekenai lahi ena kahu ai do lau halaoa.
19 Taunimanima huanai oi idia diba taudia be mai hoa ida oi do idia raraia.+
Oiemu dokona be do ia mai haraga bona dika bada do oi davaria,Bona oi be do oi boio momokani ela bona hanaihanai.”’”+
20 Bona Iehova be lau dekenai ma ia gwau:
21 “Taunimanima ena natuna e, Sidono+ do oi raraia bona ia hadikaia herevana do oi perovetalaia.
22 Do oi gwau, ‘Siahu Ibounai Lohiabadana Iehova be inai bamona ia hereva:
“Sidono e, lau be oi do lau inai henia bona oi dekenai do lau karaia karana dainai hairai do lau abia,Oi lau panisia bona lau hahedinaraia lau be helaga Diravana neganai, taunimanima be do idia diba lau be Iehova.
23 Oi lalonai gorere dikana do lau siaia bona taunimanima edia rara be emu dala ai do idia bubua.
Tuari kaia be kahana ibounai amo ia mai neganai, taunimanima be oi huanai do idia alaia mase,Bena do idia diba lau be Iehova.+
24 “‘“Unai amo Israela besena idia kirikirilaia taudia, hisihisi idia havaraia au ginigini bamona taudia ese idia do idia hagegea lasi.+ Bona taunimanima ibounai be do idia diba lau be Siahu Ibounai Lohiabadana Iehova.”’
25 “‘Siahu Ibounai Lohiabadana Iehova be inai bamona ia hereva: “Israela taudia be idia lao gabudia idauidau amo lau haboudia lou neganai,+ idau bese taudia dekenai do lau hahedinaraia lau be helaga Diravana.+ Bona Israela besena be egu hesiai tauna Iakobo dekenai lau henia tanona ai do idia noho.+
26 Unai tano dekenai do idia noho namonamo+ bona ruma do idia haginia bona vain umadia do idia karaia,+ bona idia dekenai idia kirikiri taudia lau panisia neganai, idia be dika do idia davaria lasi.+ Bona do idia diba lau be Iehova, edia Dirava.”’”
