Esekiela 31:1-18
-
Aigupito ia moru, sida au lata herea (1-18)
31 Lagani namba 11* ena hua ihatoina ena dina ginigunana ai, Iehova be lau dekenai ma ia gwau:
2 “Taunimanima ena natuna e, Aigupito ena Farao bona ena hutuma dekenai oi gwau,+‘Daika ena siahu be emu siahu ena bada hegeregerena?
3 Oi be Asuria tauna bamona, bona Lebanona ai ia gini sida auna bamona,Ia be mai ena hairai bona ena rigi be momo bona mai ena ikerukeru, bona ia be au lata herea.Iena dorina be ori lalonai.
4 Ranu ese unai au ia habadaia, bona ranu lohilohidia dainai ia lata herea.
Ia tubu gabuna be sinavai ese idia hagegea.Unai sinavai edia sinavai maragidia ese au ibounai dekenai ranu idia henia.
5 Unai dainai ia tubu lata herea, bona au ma haida ia hereaia.
Iena rigi badadia idia momo herea, bona rigi maragidia idia lata idia laoBadina ena sinavai ena ranu be bada herea.
6 Guba ena manu ibounai be ena rigi badadia dekenai edia ruma idia karaia,Uda animal ibounai be ena rigi momo henunai edia natudia idia havaraia,Bona bese badadia ibounai be ena ikerukeru henunai idia noho.
7 Ia be au hairaina ai ia lao bona ena rigi latadia be mai edia raurau momo,Badina iena ramuna be ranu bada herea gabuna dekenai idia diho lao.
8 Dirava ena uma+ lalonai idia tubu sida audia be ia hegeregerena lasi.
Iunipa audia edia gabana be ena gabana hegeregerena lasi,Bona ena rigi be pleini audia* edia rigi ia hereaia.
Dirava ena uma lalonai idia tubu au ta ese ena hairai ia hereaia lasi.
9 Lau ese raurau momo amo unai au lau hahairaia,Bona Eden umana, Dirava momokanina ena uma unai, lalonai idia tubu au ibounai be unai au dekenai idia mama.’
10 “Unai dainai Siahu Ibounai Lohiabadana Iehova be inai bamona ia hereva: ‘Ia* be lata herea bona ena dorina be ori ia hanaia dainai, iena kudouna ia hekokoroku badina ia be ataiai momokani,
11 lau ese ia be idau besedia edia lohia tauna goadana dekenai do lau henia.+ Ia ese do ia panisia, bona lau ese ena kara dika dainai do lau dadaraia.
12 Bona idau tano taudia, dagedage bada besedia unai, ese unai au do idia utua diho, bona ororo dekenai do idia rakatania, bona ena raurau be koura ibounai dekenai do idia moru, bona ena rigi be do idia makohia bona unai tano ena sinavai ibounai dekenai do idia hekure.+ Tanobada taudia ibounai be ena ikerukeruna do idia rakatania bona ia be sibona do ia gini.
13 Guba ena manu ibounai be ena gabana, ia moru gauna, dekenai do idia noho, bona uda animal ibounai be ena rigi dekenai do idia noho.+
14 Unai murinai ranu momo badinai idia gini au ta be do ia lata lasi eiava ena dorina be ori lalonai do ia noho lasi bona ranu bada ia abia auna be ori dekenai do ia daekau lasi. Badina idia ibounai be do idia mase. Idia be henunai ia noho gabuna dekenai do idia lao, idia bona taunimanima edia natudia memero danu be guri* lalonai do idia diho.’
15 “Siahu Ibounai Lohiabadana Iehova be inai bamona ia hereva: ‘Ia be Mase Gurina* dekenai ia diho dinana ai, taitai bada do lau havaraia. Unai dainai lau ese ranu lohilohidia do lau koua bona edia sinavai edia aru daladia do lau koua, unai amo ranu bada do ia aru lao lasi. Unai sida auna dainai lau ese Lebanona dekenai dibura do lau havaraia, bona au ibounai be do idia kakoro.
16 Idau besedia be ia moru ena regena idia kamonai neganai do idia heudeheude. Lau ese unai au be Mase Gurina* dekenai do lau abia diho, guri* dekenai idia diho lao taudia danu. Bona henunai ia noho gabuna ai, ranu momo idia abia au ibounai be do idia moale, Eden ena au ibounai+ bona Lebanona ena au hairaidia ibounai danu.
17 Idia be ia* ida Mase Gurina* lalonai idia diho, tuari kaia amo idia alaia taudia dekenai idia lao,+ bona ia idia durua taudia danu,* bese idauidau huana amo ena ikerukeru henunai idia noho taudia unai.’+
18 “‘Eden ai au ta ese emu hairai bona siahu ia hereaia lasi.+ To oi be Eden ena au ibounai ida henunai ia noho gabuna ai oi do idia abia diho. Oi be kopina utua lasi taudia bona tuari kaia amo idia alaia mase taudia ida do oi hekure. Unai be Farao bona iena taunimanima hutuma dekenai do ia vara.’ Unai be Siahu Ibounai Lohiabadana Iehova ena hereva.”
Futnout
^ Inai be King Iehoiakini, Esekiela, bona Iuda taudia ma haida edia igui laganina namba 11 ia herevalaia. (Ese 1:2 itaia.)
^ Inai au ena rigi be lata herea bona ena kopina be ia kakoro neganai ia kokia.
^ Heb., “oi.”
^ Eiava “mase gurina.”
^ Eiava “mase gurina.”
^ Unai be, “Lebanona ai ia gini sida auna.”
^ Heb., “imana.”
