Esekiela 32:1-32
32 Bona lagani namba 12,* ena hua namba 12, ena dina ginigunana ai, Iehova be lau dekenai ia gwau:
2 “Taunimanima ena natuna e, Aigupito ena Farao totona lalohisihisi anena* oi abia, bona ia dekenai oi gwau,‘Oi be idau besedia edia laiona goadana bamona,To hari oi idia hadikaia vadaeni.
Oi be davara ena animal badana ta bamona,+ emu sinavai lalonai oi giroagiroa,Emu aena amo ranu lalonai kopukopu oi havaraia bona sinavai oi hamiroa.’
3 Siahu Ibounai Lohiabadana Iehova be inai bamona ia hereva:
‘Idau besedia hutuma do lau gaukaralaia oi latanai egu reke idia negea totona,Bona idia ese egu reke lalonai oi do idia veria daekau.
4 Tano dekenai oi do lau rakatania.Rei gabuna dekenai oi do lau negea.
Guba ena manu ibounai do lau siaia oi latanai idia helai totona,Bona emu tauanina be tanobada ibounai ena uda animal dekenai do lau henia idia bogakunu totona.+
5 Ororo gabudia dekenai emu hidio do lau negeaBona koura gabudia be emu turia amo do lau hahonua.+
6 Emu rara amo palaka bona ororo gabudia do lau haparia,Bona sinavai maragidia be emu rara amo do idia honu.’*
7 ‘Bona oi lau hadikaia ore neganai, lau ese guba do lau koua bona ena hisiu ena diari do lau habodoa.
Lau ese dina be ori amo do lau koua,Bona hua be diari do ia henia lasi.+
8 Oi dainai lau ese guba ai idia diari gaudia ibounai edia diari do lau habodoa,Bona emu tano be dibura amo do lau koua.’ Unai be Siahu Ibounai Lohiabadana Iehova ena hereva.
9 ‘Lau ese emu igui taudia be bese ma haida, oi diba lasi tanodia unai, dekenai lau hakaudia lao neganai,+Taunimanima momo do idia lalohekwarahi.
10 Taunimanima momo dekenai gari bada do lau havaraia,Bona idia vairanai egu tuari kaia lau abia isi neganai, edia king be oi dainai do idia gari bona heudeheude.
Oi moru dinana ai,Idia ta ta be mase garina dainai, do idia heudeheude.’
11 Siahu Ibounai Lohiabadana Iehova be inai bamona ia hereva:
‘Babulonia ena king ena tuari kaia be emu latanai do ia mai.+
12 Lau ese tuari taudia goadadia edia tuari kaia amo emu taunimanima hutuma do lau hamasea,Idia ibounai be idau bese edia dagedage bada taudia.+
Idia be Aigupito ese ia heagilaia gaudia do idia hadikaia ore, bona ena taunimanima hutuma do idia alaia mase.+
13 Ena ranu momo gabudia ai taunimanima ese idia naria animal ibounai be do lau hamasea ore,+Bona taunimanima eiava animal ta ena aena ese sinavai lalonai kopukopu do ia havaraia lou lasi.’+
14 ‘Bona unai nega ai lau ese edia ranu momo gabudia do lau hagoevaia,Bona edia sinavai be dehoro bamona do idia aru.’ Unai be Siahu Ibounai Lohiabadana Iehova ena hereva.
15 ‘Aigupito be ia noho kava tanona ai do lau halaoa, bona ia lalonai idia noho gaudia ibounai do lau hadikaia ore.+Bona ia lalonai idia noho taudia ibounai lau alaia mase neganai,Do idia diba lau be Iehova.+
16 Inai be lalohisihisi anena, bona taunimanima ese do idia anelaia.Idau bese edia natudia kekeni ese do idia anelaia.
Idia be Aigupito bona ena taunimanima hutuma totona do idia ane.’ Unai be Siahu Ibounai Lohiabadana Iehova ena hereva.”
17 Bena lagani namba 12 bona hua* ena dina namba 15 ai, Iehova be lau dekenai ia gwau:
18 “Taunimanima ena natuna e, Aigupito ena taunimanima hutuma totona do oi taitai bona ia be henunai ia noho tanona dekenai do oi abia diho, ia bona bese goadadia edia natudia kekeni, bona guri* dekenai do idia diho taudia ibounai danu.
19 “‘Oi laloa oi be mai emu hairai bada, a? Oi diho lao, bona kopina idia utua lasi taudia ida oi hekure!’
20 “‘Idia be tuari kaia ese ia alaia mase taudia ida do idia moru.+ Ia be tuari kaia amo do idia alaia mase. Ia bona ena taunimanima hutuma do umui veria lao.
21 “‘Mase Gurina* ena dobu gabuna amo tuari taudia goadadia be ia bona ena durua taudia dekenai do idia hereva. Idia be do idia diho bona tuari kaia amo idia alaia mase, kopina utua lasi taudia ida do idia guria.
22 Asuria be unuseniai, ia bona ena taunimanima hutuma. Edia mase gurina be ia* idia hagegea, idia ibounai be tuari kaia amo idia mase.+
23 Iena mase gurina be tanobada ena dobu masemase gabuna dekenai, bona ena taunimanima hutuma ese ena mase gurina idia hagegea. Idia ibounai be tuari kaia amo idia mase, badina guna idia ese mauri taudia idia hagaria bada.
24 “‘Elama+ be unuseniai bona ena taunimanima hutuma be ena mase gurina idia hagegea, idia ibounai be tuari kaia amo idia mase. Idia be mai ladana dikana* ida henunai ia noho gabuna ai idia diho, guna idia ese mauri taudia idia hagaria bada. Hari idia be mai hemarai ida guri* lalonai idia diho taudia ida do idia lao.
25 Idia alaia mase taudia huanai ena mahuta patana idia atoa, ena taunimanima hutuma be iena mase gurina idia hagegea. Idia ibounai be tuari kaia amo idia mase kopina utua lasi taudia, badina guna idia ese mauri taudia idia hagaria bada. Bona idia be mai hemarai ida guri* lalonai idia diho taudia ida do idia lao. Elama be idia alaia mase taudia huanai idia atoa.
26 “‘Meseka bona Tubala+ be unuseniai bona edia taunimanima hutuma danu. Edia mase gurina be ia* idia hagegea. Idia ibounai be tuari kaia amo idia mase kopina utua lasi taudia, badina guna idia ese mauri taudia idia hagaria bada.
27 Idia be idia mase vadaeni kopina utua lasi tuari taudia goadadia, mai edia tuari kohudia ida Mase Gurina* dekenai idia diho taudia danu do idia guria, a? Bona taunimanima ese edia tuari kaia be edia kwarana henunai do idia atodia* bona edia kara dika be edia turia latanai do idia atodia, badina guna inai tuari taudia goadadia ese mauri taudia idia hagaria bada.
28 To oi* be kopina idia utua lasi taudia ida do idia hamasea, bona tuari kaia amo idia alaia mase taudia ida do oi hekure.
29 “‘Edoma+ be unuseniai, ena king taudia bona ena iduhu gunalaia taudia ibounai danu. Ena be idia be tau goadadia, to tuari kaia amo idia hamasea taudia ida idia guria. Idia be kopina utua lasi taudia bona guri* lalonai idia diho noho taudia+ danu do idia guria hebou.
30 “‘Not kahana ena lohia taudia* be unuseniai, Sidono taudia ibounai danu.+ Ena be edia dagedage karadia amo gari bada idia havaraia, to idia be mai hemarai ida idia mase taudia ida idia diho. Idia be tuari kaia amo idia mase kopina utua lasi taudia ida do idia guria bona guri* lalonai idia diho noho taudia danu mai hemarai ida do idia guria hebou.
31 “‘Farao ese idia ibounai do ia itaia bona ena taunimanima hutuma dekenai ia vara gauna dainai lalogoada do ia abia.+ Farao bona ena tuari taudia ibounai be tuari kaia amo do idia mase.’ Unai be Siahu Ibounai Lohiabadana Iehova ena hereva.
32 “‘Ia ese mauri taudia dekenai gari bada ia havaraia dainai, Farao bona ena taunimanima hutuma be tuari kaia amo idia mase kopina utua lasi taudia ida do idia guria.’ Unai be Siahu Ibounai Lohiabadana Iehova ena hereva.”
Futnout
^ Inai be King Iehoiakini, Esekiela, bona Iuda taudia ma haida edia igui laganina namba 12 ia herevalaia. (Ese 1:2 itaia.)
^ Eiava “mase negana ai idia abia anena.”
^ Heb., “Bona sinavai maragidia be oi amo (ida) do idia honu.”
^ Reana inai be hua namba 12 ia herevalaia. Siri 1 itaia.
^ Eiava “mase gurina.”
^ Reana inai be Asuria ena king ia herevalaia.
^ Heb., “kopina utua lasi taudia.”
^ Eiava “mase gurina.”
^ Eiava “mase gurina.”
^ Reana Meseka bona Tubala edia king ia herevalaia.
^ Reana hemataurai hahedinaraia totona, tuari taudia be edia tuari kaia ida idia guria karana ia herevalaia.
^ Reana Farao eiava Aigupito ia herevalaia.
^ Eiava “mase gurina.”
^ Eiava “gunalaia taudia.”
^ Eiava “mase gurina.”
