Esodo 15:1-27
15 Unai nega ai, Mose bona Israela taudia be Iehova dekenai inai ane idia abia:+
“Iehova dekenai ane lau abia, badina ia be mai hairai ida ia kwalimu.+
Hosi bona ena guia tauna be davara lalonai ia negea diho.+
2 Iah* be egu goada bona egu siahu, badina ia ese lau ia hamauria.+
Inai be egu Dirava, ia do lau hanamoa.+ Ia be egu tamana ena Dirava,+ bona ena ladana do lau abia isi.+
3 Iehova be tuari tauna goadana.+ Iehova be iena ladana.+
4 Farao ena kariota bona ena tuari oreadia be davara lalonai ia negea,+Bona ena tuari taudia goadadia be Davara Kakakaka lalonai idia diho vadaeni.+
5 Davara ena hurehure ese idia ia koua, bona dobu gabudia dekenai nadi bamona idia diho lao.+
6 Iehova e, emu imana idibana ena goada be bada herea,+Iehova e, emu imana idibana amo oi ia inai henia tauna oi hadikaia ore diba.
7 Oiemu siahu bada herea amo, oi idia tuari henia taudia oi negea diho diba.+
Emu badu be ia hururuhururu noho, idia be rei kakoro bamona ia gabua ore.
8 Emu udu baubau ena hodahoda dainai ranu be haba bamona ia gini.
Bona unai ranu be gabu tamona dekenai idia haboua.
Davara ena huanai idia daekau noho ranu idia auka.
9 Iseda inai tauna ia gwau, ‘Idia murinai do lau heau lao! Idia do lau dogoatao!
Tuari amo lau abia gaudia do lau haria ela bona egu lalona ia hegeregere!
Lauegu tuari kaia do lau veria raka-lasi! Lauegu imana ese idia do ia hadikaia ore!’+
10 Emu laga oi hiriria, bena davara ese idia ia koua.+
Idia be davara lalonai idia diho, ledi bamona.
11 Iehova e, dirava idauidau edia huanai, daika be oi bamona?+
Oi be helaga herea momokani, daika be oi bamona?+
Taunimanima ese idia gari henia bona hanamoa Diravana, hoa kara badadia karaia Diravana.+
12 Emu imana idibana oi atoa maoromaoro, bona tano ese idia ia hadonoa.+
13 Emu lalokau* lalonai, oi ese oi hoia lou taudia oi hakaua.+
Emu goada amo, oi ese idia be emu noho gabuna helagana dekenai do oi hakaua lao.
14 Taunimanima ese unai do idia kamonai,+ do idia lalohekwarahi.
Filistia taudia be do idia lalometau bada.*
15 Unai nega ai, Edoma ena lohia taudia do idia gari dikadika.
Bona Moaba ena siahu bada king taudia do idia gari dikadika.+
Kanana ai idia noho taudia ibounai do idia lalomanoka.+
16 Idia be do idia gari bada.+
Iehova e, emu imana goadana dainai, idia be nadi bamona do idia marere lasiEla bona emu taunimanima idia raka hanai,+Oibe, ela bona oi hoia lou taudia idia raka hanai.+
17 Oi ese idia do oi mailaia bona emu ororo korikorina dekenai do oi atodia,+Iehova e, oi sibona ese oi noholaia totona oi karaia hegaegae gabuna unai,Iehova e, emu dubu helaga dekenai, emu imana amo oi haginia gauna unai.
18 Iehova be do ia king ela bona hanaihanai.+
19 Farao ena hosi mai edia kariota bona ena hosi guia tuari taudia be davara lalonai idia raka vareai neganai,+Iehova ese davara ena ranu be idia latanai ia mailaia,+To Israela taudia be davara ena huanai tano kaukau amo idia raka hanai.”+
20 Bena peroveta hahine Miriama, Arona ena taihuna unai, ese tambarin ia abia, bona hahine ibounai be mai edia tambarin ida ia murinai idia raka bona idia mavaru.
21 Miriama ese ane amo tatau edia ane herevadia ia haloua:
“Iehova dekenai ane abia, badina ia be mai hairai ida ia kwalimu.+
Hosi bona ena guia tauna be davara lalonai ia negea diho.”+
22 Gabeai Mose ese Israela taudia be Davara Kakakaka amo ia hakaua siri, bona Suhuru ena taunimanima lasi gabuna ai dina toi idia raka, to ranu idia davaria lasi.
23 Idia be Mara* dekenai idia ginidae,+ to Mara ai ranu idia inua diba lasi, badina ranu be idita. Unai dainai ena ladana ia hatoa Mara.
24 Vadaeni taunimanima be Mose dekenai idia maumau matamaia,+ idia gwau: “Dahaka do ai inua?”
25 Mose be Iehova ia noinoi henia+ bona Iehova ese ia dekenai au maragina ta ia hahedinaraia. Ranu lalonai unai au ia negea diho neganai, ranu ena mamina ia namo.
Unuseniai Dirava ese idia totona taravatu bona hahemaoro do idia abia ena badina ia haginia bona unuseniai edia kamonai karana ia tohoa.+
26 Ia gwau: “Bema Iehova emui Dirava ena hereva umui kamonai henia momokani, bona iena vairanai kara maoromaoro umui karaia bona ena oda herevadia umui kamonai henia bona ena taravatu ibounai umui badinaia,+ Aigupito taudia latanai lau mailaia gorere be umui latanai do lau mailaia lasi,+ badina lau be Iehova, emui gorere hanamoa tauna.”+
27 Unai murinai Elima dekenai idia ginidae, unuseniai ranu guri 12 bona pama au 70 idia noho. Bona unuseniai ranu badinai idia kamepa.
Futnout
^ “Iah” be Iehova ena ladana kwadogina.
^ Heb., “mara ena hisihisi do idia abia.”
^ Anina be “Idita.”
