Revareva ta Filipi Taudia Dekenai 2:1-30
2 Umui be Keriso ida umui hakapua. Lalokau dainai ma haida umui hagoadaia bona durua. Ma haida umui lalodia bada, umui lalokau henidia bona umui hebogahisi henidia.
2 Egu moale be do ia bada, bema emui lalona be tamona, emui lalokau be tamona, umui be tauanina tamona bamona, bona emui lalohadai be tamona.+
3 Namo lasi umui heiriheiri+ eiava sibona umui abia isi,+ to mai manau* ida do umui laloa ma haida ese umui idia hereaia,+
4 umui sibona emui namo do umui laloa lasi,+ to ma haida edia namo do umui laloa danu.+
5 Keriso Iesu ena lalohadai do umui dogoatao noho.+
6 Ena be ia be Dirava ena toana hegeregerena,+ to ia laloa lasi Dirava ena dagi do ia abia bona ia ida do ia hegeregere.+
7 Lasi, to gau ibounai ia rakatania bona hesiai tauna bamona ai ia lao.+ Ia be taunimanima ta ai ia lao.*+
8 Ma danu, taunimanima ta bamona ia mai* neganai, ia sibona ia hamanaua bona kamonai karana ia hahedinaraia ela bona ia mase,+ oibe, hisihisi auna* dekenai ia mase.+
9 Unai badina dainai, Dirava ese ia dekenai dagi hereadaena ia henia+ bona mai hariharibada ida, ia dekenai ladana ibounai ia hereaia ladana ta ia henia,+
10 unai amo guba, tanobada, bona tano henunai idia noho taudia ibounai be Iesu ena ladanai do idia tui diho.+
11 Bona namona be taunimanima ibounai ese do idia gwauraia hedinarai, Iesu Keriso be Lohiabada,+ unai amo Dirava iseda Tamana do idia hanamoa.
12 Unai dainai, egu lalokau taudia e, hanaihanai egu hereva umui kamonai bamona, lau noho negadia sibona lasi, to hari lau noho lasi negadiai danu emui kamonai karana do umui habadaia. Mai gari bona mai heudeheude ida unai do umui karaia noho. Unai amo hahemauri umui abia diba.
13 Dirava be emui goada ena badina,* bona umui dekenai ura bona goada ia henia, ia ura henia gaudia umui karaia totona, badina ia ura unai ia karaia.
14 Gau ibounai umui karaia neganai, umui maumau lasi+ bona hepapahuahu lasi,+
15 unai amo do umui kerere lasi bona mai momokani ida do umui noho. Bona inai uru gagevana bona dikana huanai+ umui be Dirava ena natudia+ bona umui be goeva. Inai tanobada ai, umui be diari bamona umui diaridiari noho,+
16 mauri ena hereva umui dogoatao auka noho.+ Bena Keriso ena dina ai do lau moale, badina lau diba lau heau kava lasi, eiava lau hekwarahi kava lasi.
17 Ena be hesiai gaukara helagana dainai lau be wain boubou hegeregerena+ boubou latanai idia bubua,+ to lau be umui ida lau moale hebou, badina emui abidadama ese inai gaukara dekenai umui ia hakaua mai danu.
18 Unai hegeregerena, umui danu be lau ida umui moale be namo.
19 Lau naria noho bema inai be Lohiabada Iesu ena ura, vadaeni Timoteo be umui dekenai do lau siaia haraga,+ unai amo emui sivarai lau kamonai neganai, goada do lau abia.
20 Badina lau dekenai ta ia noho lasi Timoteo hegeregerena, ia ese umui do ia durua momokani.
21 Badina ma haida be sibodia edia ura idia tahua noho, to Iesu Keriso ena ura idia tahua lasi.
22 To umui diba Timoteo ia hamomokania ia be ia hegeregere. Natuna ta+ be tamana ida ia gaukara hebou bamona, ia be lau ida ia gaukara goada sivarai namona harorolaia gaukarana ai habadaia totona.
23 Unai dainai lau ura ia be umui dekenai lau siaia, to lau dekenai do idia vara gaudia lau diba murinai, ia do lau siaia.
24 Oibe, lau diba momokani, inai be Lohiabada ena ura dainai, nega sisina murinai lau danu do lau mai.+
25 To hari lau laloa namona be umui dekenai Epafrodito do lau siaia, ia be egu tadikaka, egu gaukara hebou tauna bona Keriso ena tuari tauna. Guna ia be lau dekenai umui siaia, lau durua totona,+
26 ia ura bada umui ibounai do ia itaia bona ia lalometau badina iena gorere sivaraina umui kamonai.
27 Oibe, ia gorere bona kahirakahira ia mase, to Dirava ese ia hebogahisi henia. To ia sibona ia hebogahisi henia lasi, to lau danu, unai amo egu lalohisihisi do ia bada lasi.
28 Vadaeni ia lau siaia haraga inai, unai amo ia umui itaia neganai do umui moale lou bona do lau lalohekwarahi bada lasi.
29 Unai dainai mai moale ida ia umui welkam henia, vaia Lohiabada idia badinaia taudia dekenai umui karaia bamona. Bona unai bamona tadikaka do umui lalodia bada noho,+
30 badina Keriso* ena gaukara dainai kahirakahira ia mase, bona herevana kahirakahira dika ia davaria, to ia ura lau ia durua, badina umui noho lasi lau umui durua totona.+
Futnout
^ Eiava “lalomanau.”
^ Gr., “taunimanima ena toana ia abia.”
^ Gr., “taunimanima ena toana bamona ia hedinarai.”
^ Eiava “Dirava ese umui ia hagoadaia.”
^ Eiava reana, “Lohiabada.”
